اقتباس:
المشاركة الأصلية كتبت بواسطة أم عمر
السلام عليكم ورحمة الله وبركاته
أنا اشتركت في الموقع ده علشان الموضوع ده عجبني وبقالي كام يوم كل يوم أقرالي كام صفحة منه ولسة مخلصتهوش
وربنا يجازي أستاذ حسين كل خير هو وكل إللي نصحوا المبتدئين إللي زي حالاتي بالنصايح المهمة دي
أما عني فأنا ولله الحمد طلعت الرخصة من حوالي 3 شهور واتدربت قبلها علطول مع مدربة حوالي 8 حصص كنت قبلها ما أعرفش حاجة في السواقة خالص
واتعطلت شوية بسبب الجو والأولاد المهم إني اتصلت بيها من كام يوم علشان تدربني على النزول في الشارع وفعلا نزلت معاها حصة واحدة في عز الزحمة وكنت متوترة جدا ومتلخبطة وكل شوية حد من السواقين يتريق ويقولي كلام بايخ وخصوصا لما بطلت العربية مني على بداية الكوبري وريحت مني على ورا واترجرجت جامد علشان وقفت ع التاني وجيت أطلع وأنا ناسية إني ع التاني
المهم إني رجعت البيت حالتي النفسية وحشة وبفكر إني ما أركبهاش تاني
المشكلة إني محتاجاها بدل بهدلة المواصلات بالعيال ولإن جوزي شكله مش ناوي يتعلم السواقة فاضطريت إني أنا إللي أتعلم علشان عيالي
فربنا يكرمكم تشوروا عليا أكمل في التدريب ولا لأ لإني بجد اتخنقت وتملكني إحساس إني ممكن أكون سبب لموت شخص أو إيذاءه بسبب سواقتي
وآسفة على التطويل وربنا يجازيكم كل خير
السلام عليكم ورحمة الله وبركاته
اهلا وسهلا بحضرتك
كل اللى حضرتك شرحتيه هو السبب فى المشاركة دى .... ان كثير من المبتدأين فى تعلم القيادة يشعر بالخوف الشديد حتى بعد تعلم اساسيات القيادة ... انا عن نفسى كنت بفكر ابيع العربية فى نفس الاسبوع اللى اشتريتها فيه
بالنسبة للمشكلة دى مطلوب حاجتين:
الاول: التخلص من الخوف
وعشان حضرتك تتخلصى من الخوف ... لازم تمشى بالسيارة فى الصباح الباكر الساعة 6 او 7 الصبح قبل اى زحام ... وفى أيام الاجازات ... اخرجى بالسيارة مع اى حد ... حتى ولو كان مبيعرفش يسوق .... امشى كثير فى الشوارع الخالية من السيارات
موش مهم المدة اللى هاتمشى بيها اد ايه .... شهر ... شهرين ... موش مهم
المهم انك تتتخلصى من الشعور بالخوف
بعد كده اخرجى بالسيارة مشاوير قريبة ومهمة .... مثلا توصيل الاولاد للمدرسة
او اخرجى للمول اشترى بعض الحاجات وارجعى للبيت تانى
يعنى دايما تكون المشاوير حوالين المنزل موش بعيد
تجنبى الخروج فى الشوارع الطوالى السريعة ... لان السير فيها خطر
بعد فترة ابدأى بالخروج بالسيارة لوحدك ... حتى ولو كنتى هاتلفى حوالين المنزل
الجزء التانى:
وده متواصل وهو .... انك تقرأى المشاركات بصفة يومية ... وتتعلمى من المواقف المكتوبة ومن الشرح بالصور .... وكل يوم الواحد بيتعلم حاجة جديدة
المهم ان الواحد يفهم باسلوب علمى مقنع جميع المواقف اللى بيمر بها واساسيات القيادة فى كل المواقف .... العملية علمية فى المقام الاول وبعد كده كل شىء هايكون تمام التمام
يعنى مثلا : موضوع التوقف على الكوبرى .... ببساطة ارفعى فرامل اليد ... واول ما العربية تتحرك الى الامام ... على طول نزلى فرامل اليد .... اكيد هاتكون اعصابك هادئة ... لان العربية عمرها ما هاترجع للخلف
طبعا المواقف كثير جدا ... وتحديد اسلوب القيادة مهم ... والافضل للمبتدأين هو "القيادة الدفاعية" وده اغلب اللى مكتوب فى المشاركة
حاولى تكتبى المواقف اللى بتمرى بيها ... وكلنا معاكى نحاول نقول لك احسن الحلول من وجهة نظرنا
فى الآخر لازم تتأكدى انك إن شاء الله هاتتخلصى من مشكلة الخوف من القيادة
واحنا كلنا تحت امرك فى اى وقت
مع اطيب التمنيات
اخوكم حسين غزالة