كيف تكون سائق جيد
التركيز: لازم تركز كويس قوى فى السيارات التى تسير حولك ... وبانتظام حافظ على نظافة المرايات هههههههههه انا اعرف ناس كثير بتقفل المرايات عشان خايف عليها ههههههه وموش مهم العربية وموش مهم انه يستخدمها ويخبط فى اللى حواليه .... المهم انك لازم تتوقع تحركات السيارات اللى حواليك وايه اللى ناوى يعمله السائقين اللى حواليك ... دى اهم حاجة فى القيادة الآمنه ... التوقع وعدم السرحان والمشى بالسيارة زى الآلة ... انا آسف ... لكن دى هى الحقيقة .
السماح للسيارات الاخرى بالمرور: اذا حصل ووجدت ان بعض السيارات تسير بسرعة عالية اكثر من المسموح به ... لازم تعرف انك موش فى سباق سيارات ... يعنى موش مطلوب منك انك انت كمان تزود سرعتك اكثر من اللازم وتدخل السباق ... وتعرض نفسك للخطر مع السيارات الاخرى .... لازم تكون ماشى فى المسار المناسب لسرعتك .... الا اذا كنت ناوى تتخطى سيارة اخرى ... طبعا فى الحالة دى لازم تزود سرعتك ... وطبعا لو كنت ناوى الدخول فى شارع جانبى ناحية اليمين ... يبقى الافضل انى احاول ان التزم اليمين ... ونفس الكلام لو كنت ناوى انى ادخل شارع ناحية اليسار ... يبقى الافضل انى التزم الحارة اليسرى .... وطبعا من الغباء ههههههه انا آسف ... ان الواحد يكون ماشى فى الحارة اليسار ... ومرة واحدة يفكر انه يدخل شارع ناحية اليمين .... هايعمل مصايب ومشاكل لا قدر الله ... ونفس الكلام ... تكون ماشى فى الناحية اليمين ... ومرة واحدة تقرر انك تدخل شارع جانبى ناحية الشمال
استعمال الاشارات فى توقيت مناسب: استخدام الاشارات يا جماعة ليس فقط عند الدخول يمين او شمال ... لازم تستخدم الاشارات حتى لو قررت انك تغير المسار اللى انت فيه ... يعنى مثلا تكون ماشى فى الحارة الوسطى وقررت انك تسير فى الحارة اليسرى ... فى الحالة دى لازم تستخدم الاشارات ... ولازم تستخدمها فى وقت مبكر ... يعنى موش بمجرد انى استخدم الاشارة ... على طول اتحرك يمين او شمال .... لا ... لازم استخدم الاشارات فى وقت مبكر شوية ... عشان مثلا لو كنت هادخل يمين ... فى الحالة دى سائق السيارة التى فى الخلف هايعمل حسابه ويتحرك بعيد عنك ... طبعا الكلام ده بيعمله الناس القديمة ... انما الناس اللى مابتفهمش .... بتتحرك يمين وشمال زى ما هى عايزة وبدون اى اشارات ويمكن يتوقف امامك بدون مقدمات تغيير المسار: من اخطر الحوادث يا جماعة ... انك تكون بتعدى تقاطع ومرة واحدة تقرر انك تغير مسار السيارة من حارة الى اخرى ... وكمان خطر جدا جدا جدا انك تحاول تعدى الاشارة بسرعة فى الوقت اللى كان لونها برتقالى ... يعنى معروف انها هاتكون حمراء فى اى وقت .... يعنى ممكن فى اى لحظة تلاقى العربيات قفلت عليك ده اقل واجب .... ولا قدر الله ممكن يحصل مشاكل كبيرة .. ضحى بدقيقتين من وقتك احسن ما تكسر الاشارة احترس من كسر الاشارة: اذا كان لون الاشارة اصفر وعندك وقت للتوقف بشكل آمن خلاص احسن تتوقف ... وطبعا افضلك من توفير دقيقة او دقيقتين من وقتك ... تعرض نفسك للخطر
اكبر خطأ انك تقود سيارتك فى الوقت اللى مفروض انك تكون نايم فيه او مرهق ... كمان احترس من استخدام الفرامل بشدة عشان تسمح لسيارة اخرى بالمرور ... فى الحالة دى السيارة التى فى الخلف سوف تصطدم بك على طول .... اذا حصل ده لا قدر الله على الطريق السريع ... سوف تعرض حياة السائق اللى فى الخلف الى الخطر ... لا قدر الله ممكن يموت فيها ... عشان كده لازم تكون حريص جدا
تذكر: لازم الله يكرمكم ... لازم تحافظ على مسافة كافية بينك وبين السيارة التى امامك ... اوعى تسرح وتقرب من السيارة التى امامك حتى ولو سمعت ثلاثين كلاكس خلفك .... لو حصل ان السيارة التى امامك توقفت فى الحالة دى انت كمان هاتتوقف بشكل آمن ومريح ... او هاتقدر تنتقل الى حارة اخرى فى وقت مناسب وبشكل آمن ومريح ... طبعا المسافة بينك وبين السيارة التى امامك لازم تكون كبيرة شوية خصوصا لو كانت فيه امطار على الطريق او زيوت او ما شابه ذلك
اعمل حساب الاطفال والدراجات والناس اللى بتعدى الشارع ... وتوقع دائما اى شىء غير عادى .... ناس تخرج لك من بين العربيات مثلا .... عربية ماشية فى الاتجاه المعاكس .... عجلة ... موتوسيكل ... اى شىء غير عادى لازم تكون واخد بالك منه
بالنسبة لسيارت النقل والاوتوبيس ... لازم تعرف انها تتوقف بصعوبة .... يعنى اوعى تفكر تعدى قبله او امامه وتفتكر انه هايقدر يتوقف بسهولة عشان خاطرك .... اذا كنت ناوى تعدى من السيارة النقل التى امامك لازم تلاحظ التالى .... اذا كنت ترى سائق السيارة النقل فى المراية الخاصة بالسيارة النقل .... يبقى فى الحالة دى .... سائق النقل هو كمان شايفك ... وتقدر تمر منه بأمان ... اما اذا كنت ماشى خلفه ولا تراه فى المرايه الخاصة بالسيارة النقل ... يبقى مافيش داعى لشغل الجيم والاتارى وتحاول مرة واحدة تطلع للسيارة النقل وتحاول تعدى منه وتعرض نفسك للخطر
كن مهذب مع كبار السن : كبار السن يحتاج الى القيادة بشكل طبيعى مثل اى سائق .... لكن بالنسبة لك لازم تترك مسافة كافية بين وبينه ... ولازم تتوقع من كبار السن اى حاجة ... مثلا يغير المسار بدون سابق انذار ههههههههههه او يتوقف فجأة ... او يدخل يمين او شمال بدون اشارات ... يعنى تقدر تقول عليه انه بيتعلم جديد
استخدم ذكاءك ... اذا كنت ترى بعض المشاكل على الطريق ... حاول الالتزام بالطريق السالك ... ولا تحاول التحرك الى الطريق المعاكس لكسب الوقت ... يعنى لا قدر الله ممكن تلاقى اى حادث على الطريق ... وفى الحالة دى يظهر الناصح زيادة عن الازم ويحاول السير فى الشارع الخاص بالسيارات المعاكسة ... وطبعا احتمال كبير جدا تقابله سيارات اخرى ... وبالطريقة دى كل الشارع سوف يتوقف ... لا الرايح ولا الجاى .... ويمكن يعرض نفسه لخطر كبير
فهم ماذا يحدث حولك ... السرعة التى تسير بها السيارات التى حولك ... المسارات التى تسير فيها ... التوقع والتنبؤ ... الحوادث لا قدر الله ممكن تحصل فى اى وقت .... لكن انت لازم تكون مصحصح وتتوقع كل شىء ممكن يحصل للسيارات التى حولك وتحاول الابتعاد عنها ... يعنى انت شايف واحد غشيم بيجرى جنبك .... هدى نفسك شوية ... عشان لا قدر الله لو حصل حاجة تكون انت بعيد ... وربنا الستار فى الاول والآخر
آخر حاجة : انت موش هاتاخد نشان لما تعدى من العربيات يمين وشمال بشكل غير آمن ... ومافيش حد هايسألك انت عديت من كام عربية النهاردة ... الافضل انك تسير بشكل آمن وتوصل بيتك بالسلامة
مع اطيب التمنيات
اخوكم حسين غزالة
المفضلات