المشاركة الأصلية كتبت بواسطة agmgranturismo2006
الدبرياج فايدته وصل و فصل حركة العربية عن طريق انه بيزق اسطوانة الدبرياج على حدافة الموتور تقوم موصله الفتيس بالموتور او يسحبها فتفصلهم بس الزقة ديه محتاجة قوة جامدة عشان كده اتعمل الماستر ده و هوا جزئين واحد متوصل بالدواسة بتاعتك وواحد متوصل بالفتيس و بينهم خط حديد جواه زيت انت بتزق برجلك يقوم الماستر اللى فوق عامل زى الحقنة بيتحرك جواه صباع متوصل بدواستك يزق الزيت يمشى فى الخط الحديد يو صل للماستر التانى اللى على الفتيس يزق صباع تانى جواه الصباع ده متوصل بالفورش بتاع الدبرياج او المعلقة يقوم زاقق الاسطوانة و يحصل الفصل او التعشيق
الماستر اللى فوق اللى متوصل بالدواسة تقدر تشوف الصباع بتاعه من جوا العربية فى اخر دواسة الدبرياج و هوا نفسه تشوفه من ناحية الموتور جمب ماستر الفرامل مكان ما بتحط زيت الفرامل كده و له خزان للزيت لوحده بيبقا علبة صغيرة
التانى بقا اللى فى الفتيس هاتلاقيه فوق الفتيس على طول و عليه كوتشة وواصل له خط حديد و لو حد قعد فى العربية وداس دبرياج هاتشوفه بيتحرك
الماسترين دول مش غاليين قوى لو حبيت تغيرهم و بيتغيروا لو لقيتهم جابوا زيت يعنى الكبس بتاعهم خلاص تعب و بيسيلوا و تقدر تشوفها بنفسك ده لو المشكلة منهم
و مشاكل الفتيس المانيوال عموما سهلة انت ممكن تستنى على الفتيس ده يجيب اخره لو المساتر سليمه و ترميه و تجيب استيراد و ممكن تفتحه و تشوف اللى فيه و تصلحه و هالخصلك الحل تانى:
1-راجع على المساتر العمومى و الفرعى و تسريب الزيت منها
2-راجع على زيت الدبرياج و زوده لو ناقص بزيت الفرامل بس اتاكد من على غطا خزان الزيت على النوع dot3 or dot 4
3-راجع على عصاية الفتيس نفسها شيل الكوتشة بتاعتها اللى فى الكونسول الوسطى و شحم الكابلات بتاعتها و شوف التربيط بتاعهم و من ناحية الموتور كمان
4-اخبار اسطوانة الدبرياج ايه جرب تطلع على الاول بدون بنزين دبرياج بس و شوف هاتطلع و لا و العربية بتجمع على طول و لا لأ؟
5-شوف زيت الفتيس و غيره فى اى بنزينة لو بقاله مدة بزيت موبيل 90
6-أخبار الكبالن ايه فيه طقطقة فى الملفات و لا حاجة؟
7-الحل الاخير خالص انك تفتح الفتيس و تكون المشكلة من جواه فى التروس او الغوايش و الهلالات
و دول كام فيديو فيهم الحاجات اللى فاتت ديه وشغالة ازاى
youtube - how clutches work youtube - how manual transmission works
المفضلات