الموضوع: تويوتا , 70 عاما من التقليد!

"طيب ما دام معلوماتك غزيره كدا مرسيدس و فولكس جرووب و جنرال موتورز كلها

بتاخد مضخات الديزل من مين و ارجو الاجابه و عدم التطنيش"

بالنسبة لمرسيدس معرفش بالضبط, غالبا بوش.
بالنسبة لجنرال موتورز هى عندها شركة اسمها "دلفى", دى شركة أمريكية شهيرة جدا زى "بوش" و دى السبلاير الخاص بتاع كل سيارات جنرال موتورز, و بتصنع مضخات ديزل و أنظمة حقن حديثة.
عموما بوش و دلفى أشهر شركتين فى هذا المجال, هناك شركات أخرى صغيرة غير مشهورة.
فولكس معرفش. أنا بقول الى بعرفه حضرتك أما الى مليش علم بيه بقول معرفش أو مبقولش, و دول الى انا أعرفهم.

"

عشان متعرفش التقييم بيتعمل ازاي بيجيبوا كل المحركات و عليها نفس نوع الزيت و نفس نوع الوقود و يشغلوها متواصل علي اعلي دورات

اكثر محرك يصمد لاطول وقت فهو الافضل الكلام مش عايم انت اللي كلامك كله عايم "

مفيش حاجة اسمها كده؟!
عمر المحرك بيعتمد على عامل مهم جدا, هو قدرته علىالعمل بكفاءه و استخراج كامل عزمه على سرعات قليلة, عشان كده المحركات الكبيرة مثلا عمرها أطول من المحركات الصغيرة, و عشان كده و لأسباب أخرى عمر محرك الديزل أطول من محرك البنزين.


"
طيب بعد كدا بعد ما البترول يخلص ابقي شغله بمخلوط البيبسي مع السيفن اب هههههههههههههه

و راعي التركيز كويس ههههههههههههه"

بعد نهاية حقبة البترول لن يصبح هناك وجود لا للسيارات الهيبريد و لا غيرها, و المصير الذى ينتظر البشرية مؤلم للغاية فى نظرى!

" الارقام توضح بشده ان هناك الملايين من العملاء لتويوتا - والسيارات اليابانية بشكل عام- عملاء راضون جدا عن المنتج. وهذه الملايين لا يمكن ان تكون كلها مخطئة
3- السيارات التي دائما ما يستشهد بها الاستاذ فادي هي سيارات بائده كالديناصورات كانت اقوى الحيوانات على الأرض لا أحد ينكر ذلك ولكن انقرضت وحل محلها من هو اصلح للحياة واقدر على التكيف.
4- قدم الأخوة في المنتدي آراء خبراء محايدين في السيارات اليابانية ومعظمها ان لم يكن كلها في صالح هذه السيارات
5- حب الوطن غير كافي ابدا لتقدمه بل العمل المخلص الدؤوب في مناخ يشجع هذا العمل ويكافئ المتفوق ويحاسب المقصر/الفاسد

أرجو الا اكون أطلت كما اؤكد على ان الخلاف في الرأي لا يفسد للود قضية"

شكرا على المقدمة الجميلة و أسلوبك الراقى. أنا أحب النقاش الهادىء الخالى من العصبية و الذى للأسف أصبح عادة الزملاء منذ أن فتحت موضوع السيارات اليابانية.
سوف أوضح لك عدة نقاط:
أولا, السيارات التى أستشهد بها ما تزال حية, فى شكل الموديلات الأوروبية الحديثة, و مثلا ان سلسة محركات فيات مثلا من 131 الى البرافا/برافو متشابهة الى حد كبير و لم يطرأ عليها الا بعض التغييرات البسيطة, و الأمر ذاته يسرى على معظم الشركات.
و لكن يجب أن نذكر أن صناعة السيارات دائما ما تتجه الى الأسفل, بل ربما هى الصناعة الوحيدة التى تسير الى الخلف, و يتجلى هذا فى بعض النقاط :
- عندما بدأت الشركات باعتماد تجهيزات اضافية لراحة الركاب و تجهيزات تتعلق بالسلامة ( تكييف, مساعد المقود, الوسائد الهوائية,... الخ) ازداد وزن السيارة بشكل كبير, (عكس ما يتوقع الكثيرون السيارات الحديثة هى أثقل وزنا دائما من السيارات القديمة), و انعكس ذلك سلبيا على الأداء, و لكنه انعكس ايجابيا على الراحة( السيارات ثقيلة الوزن أكثر راحة على الطريق), و لكن الشركات خضعت الى ضغوط لتخفيف أوزان سياراتها لتقليل استهلاك الوقود, مما أدى بالشركات الى اعتماد تقنيات مضحكة مثل صنع جسم السيارة من البلاستيك المقوى الى غير ذلك من الكوارث التى نراها الأن.و رغم أن هذا يبقى مبررا فى سيارة رياضية مثلا حيث تعتبر خفة الوزن نقطة حرجة, الا انه غير مبرر فى سيارة سيدان أو سيارة دفع رباعى.
- اضطر الصانعون الى تخفيف سمك الصاج المستخدم فى صناعة جسم السيارة, و الى تخفيف الشاسيهات و غير ذلك, ما انعكس سلبا على صلابة السيارة و تماسكها على الطريق.

نأتى للنقطة الثانية, أراء الخبراء.
يجب أن نتذكر شيئا بسيطا, رأى الخبراء الحقيقى شىء, و رأيهم على الجرائد و مجلات السيارات شىء أخر, سوف أعيد تذكيركم بهذه النقطة, مجلات السيارات تعيش على مائدة صانعى السيارات, لذا فهى لا تستطيع أن تتبنى رأيا سلبيا معاديا لاحدى الشركات أو احدى السيارات, الا لو أرادت المجلة مثلا لفت نظر الشركة الفلانية الى عدم وجود اعلانات لها على صفحاتها!
و تحاول بعض المجلات الموازنة بين المصداقية و ضغوط الشركات, فنرى عبارات من عينة : "الثبات لا بأس به و لكن سوف تلاحظ بعض الانحناءات غير المستحبة فى المنحنيات".
و صدقنى أنا رأيت خبراء أيضا على الجانب الأخر يسخرون من السيارات اليابانية منهم مثلا مهندس سيارات ذو خبرة طويلة فى هذا المجال يعمل فى احدى توكيلات السيارات الأوروبية الشهيرة.
بالنسبة للتجارب, فيجب أن تعرف مثلا أن التجربة تختلف من شخص لأخر, يعنى أنا مثلا عندى شاهين 1600 و العربية عاملة فوق ال40 ألف و من غير أى مشكلة مع انى مش من الناس الى بيعتنوا بسياراتهم و دائما ما أتأخر عن مواعيد الصيانة الدورية , و مع واحد صاحبى شاهين معدية ال100 ألف و من غير مشاكل, و أعرف واحد تانى معاه شاهين و بتقف بيه فى اليوم مرتين! ليه؟ ديه بتختلف من شخص لشخص, و حسب الاستعمال و حسب الحظ! و فيه نقطة مهمة أخيرة, حسب نوعية قطع الغيار المتوفرة , يعنى أنا كان معايا 128 و أقدر أقولك حوالى 90% من أعطالها كانت من قطع غيار لسه مركبها (سير كاتينة, سير دينامو, ترموستات مروحة). بجد أنا مرة غيرت سير الدينامو 3 مرات ورا بعض فى شهر واحد لأنه كل مرة كان بيتقطع بعد أسبوع من التركيب و طبعا منقدرش نلوم ال128 كسيارة على عطل مثل هذا.
نيجى للنقطة الأخيرة, مصر.
أحب أقولك انو مصر عندها قاعدة قوية جدا فى الكثير من الصناعات, و لكن للأسف ينقصها الانتشار, و الانتشار سياسة أكثر منه جودة منتج, صناعة الحديد و الصلب عندنا متقدمة جدا بشهادة الروس, بالاضافة الى اننا نمتلك خبرة هائلة فى مجال البترول و الحفر, و شركات البترول المصرية تنتشر بشكل كبير فى الوطن العربى بل و خارج الوطن العربى أيضا, اضافة الى صناعة السيارات التى وصلت الى مستوى لا بأس به أبدا فى مصر, ينقصها فقط الرغبة فى صناعة سيارة مصرية(ماركة مصرية بمعنى أصح) و ايجاد أسواق مناسبة لتصريف تلك السيارة. و لا تنسى الصناعات الحربية أيضا المتقدمة فى مصر الى حد ما.

"زمان كانوا بيصنعوا السيارات من الصلب و الحديد ووووووووووو

دلوقتي بقت السياره من الالمنيوم و بعض اجزاء الجسم من الكاربون فايبر

اللي اخف بكتير من الحديد

علي العموم مثال حي من فيات فيات بونتو 93 كان وزنها 1040.1 kg


لكن في 1999 1020.1 kg

20 كيلو فرق في الوزن في اقل من 6 سنوات


تخيل لو جبنا سياره اقدم كان حصل ايه "

مستر برو, العربيات وزنها زاد مش خف.
انت بتتكلم على البونتو, طب كويس عارف ايه العربية الى قبل البونتو, التيبو, و قبلهم الريتمو, و قبلهم ال128
عارف ال128(1100) وزنها كام؟ 805 كغ بالتمام و الكمال!! يعنى أخف من البونتو ب 215 كغ.
طب الفئة الى أكبر شوية, ال131(1.3 لتر) وزنها حوالى 950 كغ, تعالى بقى نشوف النهاردة الستيلو 2005 وزنها كام؟
الستيلو(1.2 لتر) وزنها 1090 كغ! مع ان المحرك أصغر. و طبعا ممكن تتابع التسلسل الأتى 131- ريجاتا- تمبرا- برافا/برافو- ستيلو هتلاقى الوزن بيزيد كل مرة أو ثابت.
ممكن من نفس الموقع تتأكد من المعلومات ديه.
و على فكره لازم تعرف حاجة عنى, أنا لما بقول معلومة ببقى متأكد منها و الا مبقولهاش, ممكن مكونش فاكر المصدر بس ببقى متأكد من المعلومة. و لو انت مش واثق فى كلامى ده موضوع تانى.

"نفسي اشوف سياره لفائقه الجوده فيات اكتر من 4 سلندر "

موجود حضرتك و فيه 5 سلندر, عموما فيات شركة متخصصة فى صناعة السيارات الصغيرة و المتوسطة و الاقتصادية, و هى ناجحة تماما فى هذا المجال, أما فى الفئة الأكبر فتجد الألفاروميو (السيدان الرياضية) و اللانسيا, و عندك المازيراتى (الفئة الرياضية الفاخرة) ثم تصعد الى الفيرارى (الفئة السوبر رياضية) و على فكرة كل سيارات ألفاروميو و لانسيا هى سيارات فيات, تماما مثل أودى و فولكس مثلا, و قطع الغيار واحدة, يعنى مثلا انزل هات سير كاتينة لعربية تمبرا أو شاهين الجديدة(محرك التمبرا) هتلاقى السير مكتوب عليه (فيات, ألفاروميو, لانسيا).

"طيب دلوقتي انت كنت بتقعد تقول ان اليابانيين محركاتهم مش معمره عشان حجمها صغير
و بتعمل دورات اقل وووووووووووووووووووووووو

كل الكلام دا ايه اللي يفرق فيه عن فيات دلوقتي "

يفرق انو لو عندنا محرك فيات 1600 سى سى و محرك بنفس السعة لسيارة يابانية هنلاقى انو محرك الفيات بيستخرج عزمه عند دورات أقل, و نقطة العزم الأقصى مثلا عند 3000 مثلا, بينما سوف نجد السيارة اليابانية تستخرج عزمها عند ال4400 لفة مثلا. ده الطابع الغالب و لكن ممكن تلاقى بعض الاستثناءات.

"طيب سؤال سريع

مين اللي اشتري مين

فيات اللي اشترتهم ولا هما اللي اشتروها ؟؟؟

دا سؤال مع اني عارف اجابته

كحال كل العلامات الفخمه (مايباخ رولز رويس اودي بنتلي لنكولن ميركوري كاديلاك )

كل دي سيارات غاليه في الاخر عندها تقنيه بس مبتبعش كتير

تيجي الشركات تشتريهم عشان تستفيد بتكنولوجيتهم


فيات اللي بتستفيد بيهم مش هما اللي بيستفيدوا بيها"

لا الحالة هنا مختلفة تماما.
فيات هى التى أعادت احياء طرازات لانسيا و ألفاروميو الى الوجود, فبعد أن عانت تلك الشركات من خسائر متوالية و ركود غير عادى, و أدى ذلك الى انتاجهم سيارات دون المستوى, بدأت فيات -و هذا يحسب لها- مسيرة اعادة احياء هذه الماركات, فصممت لألفاروميو 156 ثم 166 التى أعادتها مرة أخرى الى المنافسة, و حاولت مع لانسيا و مازالت تحاول, و لكن لانسيا مازالت ترفض القيام, كما حاولت مع مازيراتى و أعطت ادارتها لفيرارى التى نجحت فى اعادة احيائها مرة أخرى, هذه الشركات (باستثناء فيرارى) هى التى أخذت من تكنولوجيا فيات و ليس العكس, و يتجلى هذا فى سيارات من نوعية (ألفاروميو 155- ثم 156), لانسيا ديدرا و دلتا و غير ذلك. و يقول الكثيرون أن هذه الشركات الخاسرة هى احدى أهم أسباب أزمة فيات المالية التى ما لبثت و انتهت منذ عامين فقط.
تماما مثل "مينى" التى أخذت من بى ام و ليس العكس.