الموضوع: خايفة اسوق في مصر !!

يااااه فكرتيني كنا راجعين من الكويت ولسه شاريين عربيه زيرو ووالدي اول مرره يسوق في مصر (كان بقاله 11 سنه بيسوق في الكويت) واول ما طلع من المعرض كنا هنلبس في تاكسي بيجو والناس بتزنق بطريقه اول مرره نشوفها وفضلنا سنه كل ما نمشي في الشارع نتخانق مع الناس ونشتم ونعمل وبعد السنه دي مش عايز اقولك ،انا ووالدي واخويا اتحولنا لبلطجيه وبناخد غرز عجيبه وبنركن صف تاني وصف اربعتاشر وبناخد اليوترن عالواسع وبنغير الحاره براحتنا عن طريق (البوز بيز)
واللي يزنق عادي خالص افرض مستعجل!! وبقينا مصريين عادي خالص والدنيا ماشيه

عارفه اليافطه اللي في الكويت بتاعت الاولويه في الدوار للقادم من اليسار؟؟
انسيها خالص الاولويه هنا للي يمد بوزه الاول ومش هيرحمك لو لمستي بوزه

أضيف برضه....
يبقى الواحد سايب مسافة بينه و بين اللى قدامه عشان لو فرمل فجأة ملبسش فيه تلاقى واحد حاشر نفسه من الحارة اللى جنبى قدامى (شاطر يا ولا!)

أبقى عايز أخد الحارة الشمال من اليمين عشان يو تيرن و أدي الأشارة و مفيش حد مدي فرصة...أهدي عشان أخد الشمال من بدري بدل ما أكسر مرة واحدة و برضه محدش بيستنىو اللى جاي من بعيد بيزود سرعته جامد عشان يخلينى أفقد الأمل لدرجة أنى ساعات بهدي لحد لما أقف خالص أو الحل المصري انى أجري جامد عشان أسبق اللى شمالى و أكسر عليه بس مبحبش كده

واحد يبقى عايز يقطع الشارع قدامك من الشمال و انت ماشي بسرعة صعب تهدي يقوم رامى وش العربية يقطع عليك و يخليك تدوس فرامل جامد و تقف غصب عنك و الحل المصري انك تكمل بسرعتك و تفادي وش عربيته بس تتأكد أن يمينك فاضى

أنا شايف أهم حاجة فى السواقة فى مصر انى أكبر دماغى ... سيب اللى يسبق يسبق و اللى ياخد مكانك ياخد طالما الموضوع فيه ريسك. الفكرة مش واحد شاطر و واحد خايب...ممكن يتبصلها من وجهة نظر تانية أن واحد مستهتر و واحد حكيم. أه هوصل مشواري متأخر شويه بس ده أحسن لما أنشف دماغى و العربية تتحك و للأسف فى ناس بيمشوا بنظام (خدوهم بالصوت) و ينزل زعيق حتى و هو غلطان و يطلعك غلطان فى الأخر...مفيش احساس بالذنب...مفيش أحساس انه بيظلم اللى قدامه...مفيش كسوف. كل ده بيسموه شطارة!

اولا الف حمدالله عالسلامه مش عاوزك تخافى بس تعالى نحسبها بالعقل والحسابات
لو قلنا اننا 80 مليون وعندنا مليون سياره يعنى مليون انسان وانسانه هانقول ان السيدات منهم الثلث مثلا يعنى 300000 انسانه
نمسك بقى ال 300 الف انسانه دول ونقول ان الشخصيات والطبائع بين البشر بتختلف ونقدر نصنفهم مثلا الى 300 صنف او نوع من انواع الشخصيات واكيد سيادتك تصنفى تبع احد تصنيفات الشخصيات ال 300 اذا بالحساب والمنطق والنسبه والتناسب سعادتك والف واحده زى سعادتك بس هما الى موجودين من ال 300 الف دول وبرضو انتى وال الف الى موجودين وسط ال 80 مليون حلو اوى كده تعالى بقى نقول انتى هاتقابلى مين فى طريقك هانمسك ال 700 الف الباقين الى هما الرجاله الوحشين الى انتى خايفه منهم هانقول ان فى بس 600 الف وحشين منهم والباقى 100 الف حلوين من وجهة نظرك ال 600 الف دول بقى كلهم اىل بلطجى والى مهمل والى مغامر والى متشرد ولاى والى والى يعنى حوالى 300 صنف برضو يعنى الوحشين اوى او الاسوأ دول هما الى خايفه تقابليهم هما ال 2000 مجرم و2000 مهمل و2000 بلطجى
اذا انتى والاف زملائك معرضين تقابلو 2000 فى اسواحال و2000 وسط وهكذا يعنى النسبه الان انتى مش واحده بتقابل 80 مليون لا انتى واحده بتقابل حوالى 100 فى الطريق 60 راجل و40 سيده ال 60 راجل دول اكيد فيهم 20 كويسين و20 وسط و20 زباله يعنى انتى تخافى من ال 20 الزباله بس يعنى ما تتشائميش قوى وتقولى انا هاسوق ازاى وسط 80 مليون همجى
وكمان لازم تعرفى ان فى حاجات كتير قوى ممكن تعمليها قللى استخدامك كسواقه يعنى سوقى المشاوير المهمه فقط وكمان انزلى بدرى السواقه بدرى متعه وروقان وراحه
والناس المهمله دول ربك بيخلص يمهل ولا يهمل يعنى السرعه الان فى مصر تكاد تكون صفر ايوا تكاد تكون صفر يعنى صعب تلاقى حد متهور فى السرعه الا قليل ولو لقتيه هايبقى مستعجل ما بيصدق يعمل غرزه عشان يعدى ويفتح
قولى يا باسط فى مئات النساء مثلك ومحترمين وبيخافو وكل حاجه بس بردو عايشين وبيستحملو
احمدى ربنا غيرك مش لاقى اصلا السياره الى تحميه من بلاوى البشر ولو فى عربيتم ومخنوقه من تصرفات الناس حواليكى يبقى افضل مليون مره من الناس الى مخنوقه من تصرفات الناس معاها
اسف على الاسلوب واستخدام الالفاظ بس حبيت اوضح
وربنا يوفق الجميع

مصر ام الدنيا


اللى ماسقش فى مصر


مدخلش الدنيا