الموضوع: خايفة اسوق في مصر !!

السلام عليكم الاخ اللى بيقول استمتعى بالكويت اى استمتاع فى جنهم الحمرا دى درجة الحرارة فوق الستين بلا مبالغة وشوية مجانين سايقين ديناصورات على سرعة 180 وطالع مفيش اقل من كدة الحادثة بموتة على طوال وبعدين الاخت اللى بتقول انها سايقة بقالها سنة ف الكويت يعنى من الشغل للبيت بس فى اقصى اليمين لان الحارة الشمال هنا معنهايا الشهادة او الاعاقة او بعدما توصل بيتك تحمد ربنا انك وصلت للبيت وانت سليم خبرة 14 سنة ف الكويت يكون من خبرتى فمصر الذ واحسن سواقة لان الكل مابلتزمش باى قواعد للمرور فبتكسر على اللى جنبك وانت مش خايف يخبطك لانه عامل حسابه زى ما انت برضه عامل حسابك ومفيش سرعات عالية زى اللى هنا الا على الصحرواى دة انا كنت بامشى زراعى على ال80 احسن انى طاير فوق ههههههههههههه

المشاركة الأصلية كتبت بواسطة tamertamer

80 مليون بلطجية اة الكلام دة انا مصرى وبرفض هذا الوصف اليسىء خالص اذا تكلمت عن الشياء الغير جيدة
ميبقاش بالاسلوب دة انا برفضة ان لم تخطا فلم تتعلم

متشردين
الكلمة دية انا مش هقدر اقول غير لا تعليق ارجو مرجعة الكلام قبل كتبتة لنى بجد دة شىء ياذى مشاعر اى مصرى محترم ححححححتى وانت عارف احنا مش ملتزمين اة لكن مش متشردييييييييييييين ابدا

+99999999
متفق جدا مع حضرتك و معجب بموقفك الصراحه انا كنت داخل هتكلم بس لقيت حضرتك قولت كل اللى في نفسي شكرا ليك

الاسلوب سئ جداااا و ما شاء الله على كمية الذنوب اللى خدتها عن ال80 مليون متشرد الا 100

المشاركة الأصلية كتبت بواسطة tamertamer

نحن هنا لا نتكلم بالكنايات اى كل الشعوب بها عيوب كثيرة نحن شعب بالعربى على طبعتة
وخلى بالك انى من اشد المتشددين بتاريخ وطنى جدا والاماكن قلى كنتى فيها تشهد على كدة الكويت كمثال مين قلى سعدها اصلا عشان تشوف النور دة لا يمنع ان الادارة الفاشلة من لالحكومة الفاسدة خلتنا نرجع للخلف كتير بس دة لا يمنع ان الشعب المصر فى اى مكان فى العالم بيحترم نفسة لو لقاء التعليم والرعاية والنظام وغير مخترقى للنظام فى دول كتير ولاكن التاسيس الخطاء هو السبب فيما يحدث خارج مصر
ثانيا انا ارفض وبشدة تعبيراتك التى اذت مشاعرى بشكل يستدعى منى الكلام وبحدة لانى مصرى فى المقام الاول لكل الشعوب اخطاء وسوفا نتدارجها قريبا انا لا اجمل المجتمع المصرى ولاكن لاذال هناك امال مثل ما قال الزعيم الراحل لا ياس مع الحياة ولا حياة مع الياس
ارجو من الادارة اغلاق الموضوع نهئيا
ايمان الانسان بوطنة هو شعور لا يجب على الانسان نسيانة
ساراسل الادارة

متفق جدا للمره الثانيه

ربنا يغفرلها بقي اللى هي خدته في الكلمتين دول

اللي يسوق في مصر او القاهره تحديدا لازملو حاجه من 2 ملهاش تالت
1-يا اما يكون مستبيع و سايق عربيه حديد قديمه زي اللادا مثلا او 128 و تكون مش فارقه معاه لا خبطات ولا حوادث و يبلطج علي يبلطج عليه.
2-و دا الاحسن انو يكون معاه عربيه شروكي او رانجلر الجديده و اللي يتغابي عليه يتحمل اللي يحصلو بقي

المشاركة الأصلية كتبت بواسطة tamertamer

نحن هنا لا نتكلم بالكنايات اى كل الشعوب بها عيوب كثيرة نحن شعب بالعربى على طبعتة
وخلى بالك انى من اشد المتشددين بتاريخ وطنى جدا والاماكن قلى كنتى فيها تشهد على كدة الكويت كمثال مين قلى سعدها اصلا عشان تشوف النور دة لا يمنع ان الادارة الفاشلة من لالحكومة الفاسدة خلتنا نرجع للخلف كتير بس دة لا يمنع ان الشعب المصر فى اى مكان فى العالم بيحترم نفسة لو لقاء التعليم والرعاية والنظام وغير مخترقى للنظام فى دول كتير ولاكن التاسيس الخطاء هو السبب فيما يحدث خارج مصر
ثانيا انا ارفض وبشدة تعبيراتك التى اذت مشاعرى بشكل يستدعى منى الكلام وبحدة لانى مصرى فى المقام الاول لكل الشعوب اخطاء وسوفا نتدارجها قريبا انا لا اجمل المجتمع المصرى ولاكن لاذال هناك امال مثل ما قال الزعيم الراحل لا ياس مع الحياة ولا حياة مع الياس
ارجو من الادارة اغلاق الموضوع نهئيا
ايمان الانسان بوطنة هو شعور لا يجب على الانسان نسيانة
ساراسل الادارة

لا اله الا الله .. حضرتك عملت الموضوع سياسة وتاريخ كده ليه ؟
معرفش انت مكبر الموضوع ليه كده

عموما ماليش دعوة كون ان حضرتك فهمت الموضوع غلط .. او انك مضايق شوية وخلطت الامور ببعض ..

نرجع بقى لموضوعنا تاني عن السواقة في مصر
امبارح بليل خرجت مع اخويا الساعة 12 بليل على اساس ان الدنيا تكون فاضية شوية والزحمة خفت واغير فكرتي عن السواقة هنا واتجرأ شوية ..
والله لقيت عربية واخدة شارع الحجاز زجزاج يمين وشمال وغرز مابين العربيات ولا كأنها بتلعب بلاي ستيشن .. والله العن من اللي بيمشو في الحارة الشمال على 180 في الخليج !!!
لا والصدمة بقى ان اللي سايقاها .. كانت بنت .. :)

المشاركة الأصلية كتبت بواسطة islam7070

قلبتي علية المواجع وانا نازل مصر بعد كام يوم .. أنا اتعلمت السواقة برة مصر على أصولها وذوقها وتاني سنة نزلت زيك اسوق في مصر وكنت مرعوب وكنت نازل بسيارتي من برة (تويوتا كريسيدا) الكلام دة من 16 سنة .. أفتكر اني سمعت نصيحة رفيقي على الطريق وكان أخبر مني وقالي نصيحة بسيطة جدا هقولهالك .. قالي خلي إيدك على الكلاكس طول ما انت في مصر وخ ليك بارد .. إستفدت جدا من حكاية الكلاكس أما البرود ففشلت فيه ساعتها جدا جدا وافتكر اني كنت كل ما اروح مشوار اتخانق مع الناس واتعصب واتحولت لإنسان عصبي لغاية ما مشيت من مصر بس حسيت اني رجعت بني آدم مرة تانية .. دي كانت بداية تجربة سواقتي في مصر وتوالت تجاربي على مدى ال15 سنة الماضية .. أما الآن فنصيحتي ليكي بعد خبرة 15 سنة سواقة بالقاهرة عشان تعرفي تسوقي في مصر للأسف كالتالي: عليكي بالبرود ثم البرود ثم البرود وتسلحي بالسفالة وقلة الأدب والبلطجة ولا تحترمي أحد في الشارع لا راكب ولا ماشي .. واقنعي نفسك أنك تقودي سيارتك في فناء مستشفى كبير للمجانين .. وإذا سافرتي على أي طريق سريع إعلمي تماما أن 90% من قائدي السيارات اللي معاكي على الطريق ليسوا أصحاء نفسيا وأغلبهم يعمي أعينهم الغشم الشديد النابع من جهل مدقع وخصوصا سائقي المايكروباص والنقل .. وتوقعي دائما أن تواجهك سيارة قادمة عكس السير في أي مكان في مصر وبينورلك العالي عشان توسعيله (وهذا لا يحدث إلا في مصر فقط) .. ثقافة شعب للأسف ..
أنا عارف ان كلامي هيزعل البعض ولكن هذه هي الحقيقة .. واللي هيزعل أنصحه يسافر أي دولة عربية (مش أوروبية) وهوة هيفهم كلامي .. لأن طول ما احنا مش شايفين غير شوارع وطرق مصر بس ومش بنسوق غير في مصر بس مش هنكون واعيين المفروض الآدمي يعيش ازاي .. وبرضو إيدك على الكلاكس دايما ماتنسيش .. لغاية ما تسافري وأعصابك ترجع لطبيعتها وأخيرا تاخدي نفس عميق وتستريحي وتنامي بعمق

والله فعلاااااااااااااااااااااا خدت بالي جدااا من موضوع الكلاكس ده .. تلاقي واحد ماشي يضرب كلاكس في اي حتة وعلى اي حاجة عشان يعمل قلق ويخلي الكل يوسع .. وعجبتني الفكرة جداااااا جدا :) ( انا في حياتي مفتكرش اني استعملت الكلاكس مرتين تلاتة على بعض والله )

والله جبت من الاخر وقلت كل اللي انا عايزه اقوله ..
شكرا انك فهمتني

بالمناسبة انا مستمتعة جدا بحركة المرور في مصر .
بس مش السواقة
الفرجة فقط
بشوف حاجات عمري ماشفتها ولا هشوفها :)
حقيقي بجد مستمتعة

السلام عليكم
ياجماعة انا شايف ان الموضوع بسيط وخد ابعاد تانية بعيد جدا عن موضوعنا
واحنا كلنا بنعانى من الموضوع ده مش انتم لوحدكم
دى بلدنا ودى ظروفها واحنا مستحملينها على كدة اللى عاوز يمشى فيها على كدة ماشى والى مش عاوز او مش عارف ربنا معاه ويستحمل استغلال التاكسيات وزحمة الميكروباصات انا من رأى الشخصى كل واحد يبدأ بنفسه يلتزم اخلاقيات المرور السليمة نوصل كلنا بسلام