الموضوع: قلة ادب وعدم تربيه ... معقول حالنا وصل لكده؟؟؟

أنا جيت الموضوع متاخر ، بس لو تفسحولي جنبكم أقول رايي المتواضع وأمشي
اللي عمله ياقوت مش صح ...تاني مش صح
المنظر مش حلو ،،،مش عجبك و مش عاجب ناس تانيين ، البلد بتاعتنا محافظة ومحدش اتربي علي كدة ..الاخلاق العامة ، والدتي أو أختي معايا .كل داه أنا معك فيه .بس لو كل واحد ادي نفسه الحق إنه يصلح أخطاء غيره هتبقي غابة
يعني ياقوت مش عاجبه انهم بيحضنو بعض ..ممكن واحد متشدد شوية ييجي بعد كده ميعجبوش انهم يمسكو ايد بعض أو يركبو مع بعض عربية لوحدهم ،حتي لو مخطوبين ، ممكن واحد أكتر ميعترفش إن رجل وست من غير ماتكون فيه علاقة مابينهم يقابلو بعض..أو إنه يشوف وجهها .ذي السعودية.(مش عايز أخش في جدال السعودية صح ولا لأ . احنا دوله إسلامية ..أنا عارف كل داه كويس)

وبكده كل واحد هيحاكم اللي قدامه وينصب نفسه قاضي بالطريقة اللي تعجبه .لأن مفيش قانون..أو كل واحد ليه قانونه اللي بيطبقه علي غيره.
الحل .. إن ياقوت كان بلغ اداره النادي ،أو الأمن . وهما كانو يتصرفو..دول اللي ليهم السلطة القانونية انهم يتخذوا القرار ، مش إنت ولا الناس اللي قاعدة معكم ودمها فاير
ولو مفيش أمن في النادي بلغ الشرطة ، ولو مفيش شرطة يبقي حاول تشوف مكان تاني لو المكان دة مدايئك ...لأنك ملكش سلطة قانونية علي حد في الشارع أو في النادي أو أي مكان عام أنك تقيمه أو تعترض علي أفعاله .ونقطة أخر السطر

غير إنه لازم يبقي فيه تحضر في علاج المشكله..أنا راي إن المشكله إتعلجت بهمجية ، وكانت ممكن تقلب بخناقة أو دم ذي ما ياقوت وضح..همة يستنوك برة وإنت تلم أصحابك وندور المطحنة

الجماعة اللي شايفين إن ضرب الراجل للولد حتي ولو غلطان داه صح وشايفينه عمل بطولي ..أنا أسف ديه جنحة يعاقب عليها القانون ويمكن أشد من اللي الواد عمله ..
وداه اللي بقول عليه ..تصرف غلط من الولد مع عدم إتباع الطرق الصحيحه لتصليحه ..أدي لغلط تاني وتالت ...ودة اللي بنسمع عنه في الجرايد ، مشاجرة أدت لوفاه عشرتشر بسبب معاكسه ، وعندما ذهب الرجل لنهره عما فعله ،،وكل الكلام بتاع الجرايد اللي حافظينه

موضع مارينا ..كل الناس عارفة إيه اللي فيها ، وانا فعلاً بسأل ..اللي بيروح مارينا مرة واتنين وتلاتة ، ازاي بيبقي مش عاجبه الوضع داه وبينتقده بشدة ..ومازال بيروح ، لأ ومواظب علي المرواح ؟؟؟ أكيد بيروح علشان يشوف هل هما إتغيرو ولا لسة ذي ما هما.
شكرا ..وياريت اللي عايز ينتقد اللي كتبته يتفضل ، بس باسلوب راقي في الحوار من أجل مناقشة هادفه..وليس من أجل الجدال وخلاص