الموضوع: خلااااااص...جبت اخري عايز اهاجر

المشاركة الأصلية كتبت بواسطة م/مصطفى محمود

علشان كل الأسباب اللى حضرتك قولتها ، ولما كان مُهمة الإنسان فى الكون إعمار الأرض ، ولما كان على الإنسان السعي وليس النتائج ، وعلشان دي مرحلة بتمر بيها جميع الأمم ، وعلشان النجاح بيتعدى حدود الفرد ليشمل أرض أستُخلف فيها

فأنا قررت إني أفضل فى بلدي ، أكافح وأتعب وأستحمل ، وهتتغير بينا بإذن الله

(أنا أتفق معاك مليون فى المية إن الحال أصبح سيئ بكتيير و و و و و و ) لكن كل ده لازم يتصلح ، وبينا مش بغيرنا

كل الأمم مرت بفترات ضعف ، ومنهضتشي غير بأولادها ، اللى قرروا يكونوا عندهم رؤية كبيرة ، كبيرة بجد ، قرروا يكونوا إيجابيين بجد ، قرروا أنهم يقدروا ، قرروا إن المصير بأديهم ، عرفوا إن لكل نجاح ثمن ، وقروا يدفعوه

يقول تعالى

"إن يمسسكم قرح فقد مس القوم قرح مثله وتلك الأيام نداولها بين الناس وليعلم الله الذين آمنوا منكم ويتخذ منكم شهداء والله لا يحب الظالمين"

ويقول تعالى

"أَمْ حَسِبْتُمْ أَنْ تَدْخُلُوا الْجَنَّةَ وَلَمَّا يَأْتِكُمْ مَثَلُ الَّذِينَ خَلَوْا مِنْ قَبْلِكُمْ مَسَّتْهُمُ الْبَأْسَاءُ وَالضَّرَّاءُ وَزُلْزِلُوا حَتَّى يَقُولَ الرَّسُولُ وَالَّذِينَ آمَنُوا مَعَهُ مَتَى نَصْرُ اللَّهِ أَلَا إِنَّ نَصْرَ اللَّهِ قَرِيبٌ"


أنا مش طير
أنا مش طير ولاعاشق لأرض الغير
تهبي ياريح وماتهشي أنا دراي هنا وعشي
ولون القمح من وشي سنابل في الوريد بتسير
وأنا مش طير ولا عاشق لأرض الغير
ولابجناحي بتغرب وساعة الجد بتهرب
أنا قلبي هنا اتشرب سنين مرة وساعة خير
وأنا مش طير ولا عاشق لأرض الغير
حرير المهد كان حجرك شربت الشهد من صدرك
وتنسيني أنا فاكرك ومن حقي عليكي أغير

يا باشمهندس

انك تاخد قرار انك تستنى بدون رؤية واضحة لهدف أمل واضح في تغيير الحال ...يبقى انتحار بدعوى الولاء

و حضرتك بتقول ان كل أمة بيعدى عليها أوقات صعبة ...طب ياريت تفكرني بأوقات مصر الحلوة كده ...

البلد دي جميلة و طيبة ...و أهلها أحسن ناس

بس طيبين ..بزيادة

المشاركة الأصلية كتبت بواسطة msobhy

صدق أو لا تصدق
مفيش حد فى الدنيا ممكن يحب مصر زى ما انا بحبها
مفيش حد ممكن يكون بيغير على مصر قدى

ولكن .......

مفيش حد نفسه يسيب مصر قدى
بجد انا نفسى مصر تختفى من حياتى - بحبها واتربيت فيها لكن فعلا اكتفيت جدا جدا جدا من نيلها
مصر اجمل بلاد الدنيا - لكن الناس اللى فيها نجحوا بمجهودتهم وتعبهم ليل نهار انهم يحولوها اقبح بقاع الدنيا
حاجة بقت اشبه للمسخ
حاجه ملهاش لون ولا طعم لكن ليها ريحه عفنه
والله بحبك يا مصر لكن ولادك (وانا من ضمنهم) بنتفنن فى اننا ندمرك
نصيحة لصاحب الموضوع أى فرصة تيجى لحضرتك اهررررررررررررررررررررررر ررررررب
أوعى تمشى مع التيار وتفكر فى الشغل والعربية والجواز - أى حد بضحكوا عليه فى البداية بالافكار ديه
اللى يقول لك اجتهد وبكره هاتشوف - احب اعرفك انك مش هاتشوف غير حلمة ودنك فى البلد ديه

الحمد لله - قدر الله وماشاء فعل
من اكثر الاسباب اللى فعلا مأثره فيه انى اتجوزت بدرى - ان حلم الهجرة بيموت يوم بعد يوم

ملحوظة على الماشى
انا متجوز وعندى طفلين - وعند أول فرصة تجى لى انى اسيب حبيبتى مصر مش هاستنى ولو حتى لحظة واحدة

الغريبة انى فعلا بدأت ازهق من كتر ما الناس بتتكلم فى الموضوع ده

دانت زيي بالتمام

متجوز بدري و عندي ان شاء الله طفلين

ماتقولش ان عندك 29 سنة بقى

وتفتكر يعنى هتهاجر هتروح فين
اى بلد سواء عربية او اجنبية المصريين بيبهدلوا هناك
اذا كان المصرين محدش بيحترمهم فى بلدهم
حد هيحترمهم بره
المطلوب مننا مش نهاجر ونسيب بلدنا ونروح نتغرب فى بلد تانية
المطلوب مننا نهجر الناس اللى خاربينها
لازم نبقى ايجابين ونتصرف بعقل
ونحاول نصلح من نفسنا عشان نعرف نصلح من بلدنا

المشاركة الأصلية كتبت بواسطة kono

وتفتكر يعنى هتهاجر هتروح فين
اى بلد سواء عربية او اجنبية المصريين بيبهدلوا هناك
اذا كان المصرين محدش بيحترمهم فى بلدهم
حد هيحترمهم بره
المطلوب مننا مش نهاجر ونسيب بلدنا ونروح نتغرب فى بلد تانية
المطلوب مننا نهجر الناس اللى خاربينها
لازم نبقى ايجابين ونتصرف بعقل
ونحاول نصلح من نفسنا عشان نعرف نصلح من بلدنا

نصلح من نفسنا ؟؟!!!!!
صعب اوي يا باشمهندس
خلاص احنا وصلنا لمرحلة اللاعودة

طبعاً كل الناس قالتلك تقريباً اللي انا عايز اقوله (( خصوصا دكتور احمد سامي ))

الموضوع بكل بساطه في كلمه واحده... هــــــــــــــــــــــــ ــــاجــــر

موضوع المنح ده صعب جدا جدا, و مش اي حد يقدر يجيب منحه و عادي

قدامك حل من اثنين...

1- يا تسافر للدراسه على حسابك الخاص (دبلومه, ماجيستير.....)
2- يا تسافر على فيزا Skilled Worker, و دي بردو ليها شروط

الموضوع بردو راجع للبلد اللي انت ناوي تهاجر ليها...

البلاد اللي الهجره ليها منتشره و انك تاخد الجنسيه فيها مش معقد نسبياً هم

كندا, استراليا, امريكا, المملكه المتحده

انا شخصيا اقدر افيدك لو محتاج اي شئ عن كندا بإذن الله

لكن الموضوع مش بسيط, و محتاج ترتيبات كتييييييير لازم تبدأ فيها من دلوقتي
لو انت فعلا واخد القرار, و ناوي تهاجر بجد, و لازم تقرر تهاجر فين
و كل مكان ليه مميزاته و ليه عيوبه, و انت و اللي يناسبك

اهم شئ, استخير ربنا الأول, و بعدين ابدأ دور, و هتحتاج تقرأ كتيييير قوي
و اوعى تتخيل ان ممكن اي حد يقولك ايه احسن, لأن انت بس اللي تعرف اللي يناسبك

ربنا يوفقك, و انت احسن من غيرك, لأنك اكتشفت الموضوع ده بدري, و سنك صغير

ربنا يوفقك للخير ان شاء الله

المواضيع دي والردود فيها بقت فعلاً بتوجع القلب زيادة

المشاركة الأصلية كتبت بواسطة أبو حمزة

المواضيع دي والردود فيها بقت فعلاً بتوجع القلب زيادة

انا اخصائى اجتماعى ولو اشتغلت هنا مرتب 300 جنيه دة مش يوجع القلب !!! بالنسبة لشاب لسة متخرج وهيبدا حياته

بالاضافه للاسباب اللى قالها احمد فى اول الموضوع كله بقا عايز يسيبها

وبرغم حبى ليها بقيت غريب فيها

والله انفع شاعر