الموضوع: افطــــار رمضان الرابــع لنايل موتورز (رمضان 1431) (أغسطس 2010)

السلام عليكم ورحمة الله وبركاته
تقبل الله منا ومنكم جميعا وأسأل الله أن تكون هذه الخطوات في ميزان الحسنات وأن يجمعنا على الخير دائما في الدنيا وفي الآخرة إخوانا على سرر متقابلين

أشكر كثيرا كل من ذكرني بخير وأسأل الله أن أكون خيرا مما تظنون وأن يغفر لي ما لا تعلمون

أبو الوليد كان بيقول إنه حاسس إني كنت متضايق عشان الطحينة..إحساسك مش صحيح يا صديقي..إنتم عندي أحسن وأغلى من أكبر برطمان طحينة في العالم..حتى لو كان البرطمان ده حلواني إخوان من الغالي

إحساسي بالسعادة لمقابلة الأحبة كان سابق على اليوم بكثير واستمر حتى اللحظة..لي فترة طويلة وأنا شاعر بانضغاط وضيق لعدة أسباب ولم يخرجني من هذه الحالة إلا هذا اللقاء المفعم بالمحبة والود بين الجميع
كنت حاطط أمل على اليوم ده إنه يفرق معايا والحمد لله دلوقتي الواحد فوق فوق فوق

كل الناس حبايبي اللي متعودين نقابلهم في مقابلات المنتدى أو اللي قابلتهم مرة واحدة في إفطار العام الماضي فمفيش كلام هيوفي قدر سعادتي بتجدد رؤياهم ومفيش مكان يكفي لمجرد ذكر أسماءهم ومشاعري تجاههم
هما عارفين نفسهم

والعين تعرف في عيني محدثها ....إن كان من حزبها أو من أعاديها
عيناك قد دلتا عيني على...أشياء لولاهما ما كنت أدريها

المحبة الصافية الخالية من الأغراض لها في النفس أثر السحر
والابتسامة الصادقة عند اللقاء تدخل القلب بلا استئذان

والناس اللي كان نفسي أقابلهم من زمان وأول مرة أقابلهم زودوا سعادتي لما يفوق الوصف..
أحمد نوح وشاركي ودامصري ود شريف منسي وأكرم ومصطفى اللي على طول لابس خوذة وراكب بسكلتة في الأفاتار بتاعه ومهاب وكريم كربتون وأبو ليلى وأحمد برودرايف وسيف اللي طلع أهدأ مما كنت أتخيل بمليون مرة..وده طبعا غير العصابة الصغيرة..غزالي وحامد وعز
ربنا يوفقهم في حياتهم وييسر لهم كل خير

كام حاجة لفتت نظري
- الباشمهندس ممدوح ...اللي مقابلوش قبل كده زي حالاتي يفتكره شخصية شديدة جدا ومبيقلعش السيفتي..لكن سعدت بالكلام معه لفترة جعلتني أتضاءل أمام عقليته وطيبته وهدوءه ولا أزكيه على الله
وأتاري الناس كانت كلها كانت واخدة بالها من اللقاء الجانبي وإحنا اللي كنا فاكرين نفسنا قاعدين بعيد

- الدكتور محمود جزاه الله خيرا خلاني أشعر إني نفسي أرجع طفل تاني عشان ألعب بالحاجات العجيبة اللي خطفت عقول الأولاد..جزاكم الله خيرا يا دكتور..من أحب الناس إلى قلبي في العالم كله من يعتنون بنفسية الأطفال ويحرصون على تنميتهم...
- ياقوت الراجل الجدع اللي مش بيسيب مقابلة إلا ويتصل يسلم على الناس كلها
- أستاذ كريم بذل مجهود كبير جدا وكان مضغوط طول الوقت عشان يطمئن على أوضاع الأعضاء فجزاه الله خيرا...وعلى فكرة الأكل كان كويس ومشبع برغم إن أنا وشنوري كنا معترضين على حجم الطاجن ده..ولما تيجي اسكندرية إن شاء الله هاعزمك على طاجن مكرونة على حساب شنوري ومسؤوليته الشخصية هيخلي معاييرك ونظرتك الفلسفية لفكرة الطواجن تتغير إن شاء الله

بيدو كان عاوز ياخد جنيه من كل عضو مقابل إنه يسلم عليه وقافش إنه ميكلمش حد وسلم علينا بالعافية وفي الآخر بيسأل كريم بكل حزن ومأساوية..(فين الجنيه)...الواد ده له مستقبل على فكرة خصوصا لما عرفت إنه كان مقضيها لعب مع البنات..كده هو عارف طريقه كويس..محدش يمسك إيده

- دكتور سامي..سيبك إنت من موضوع انضمام ممدوح بك للجماعة..ممكن الموضوع ده ياخد وقت شوية..إنما إحنا مش كنا ناويين نتخانق يومها حول مشاريعك غير الوطنية وكنت هاخليك تمضي عقد رسمي بانضمامك...مرة واحدة خلعت على فين؟!!!

- في ناس كتير كنت عاوز أقضي معاها وقت أطول خصوصا الحاج أحمد إبراهيم لكن الوقت كان ضيق جدا بعد الإفطار والتراويح ويادوب عرفت أتكلم شوية مع ممدوح بك وأحمد نوح ودامصري وغزالي..وده طبعا غير القعدة اللي كانت قبل الإفطار
وربنا يسامحه بقى أحمد علاء أصر إنه يكلمني في شوية حاجات خزعبلية ومعرفناش نقعد مع الناس ولا حتى نخلص موضوعنا ..ولما رجعنا لقينا فرقة الضياع للإبداع الفني ابتدت تطبل وتغني على أساس إنهم عاوزين يوصلوا رسالتهم للجمهور المتعطش لقطرات إبداعهم العذبة

كان يوم أكثر من رائع
وكل عام وأنتم بخير ونعمة وعافية في الدين والدنيا

المشاركة الأصلية كتبت بواسطة ahmadalaaeldin

حبيب قلبي والراجل صاحب الحضور المميز والخلق النادر والكلام السديد صاحب أعلى الأوسمة في شتى المجالات وربنا يبارك فيه وعليه ويحفظه دكتورنا بحري.
.

دول بس الكلمتين اللي إنت قدرت عليهم..أمال أنا كنت قاعد باظبطك عشان تكروتني كده قدام الناس..مش كنت قعدت أنا الشوية دول مع حد تاني بيعرف يقول شعر مديح من طراز (كأنك شمس والنجوم مش باينة خالص)..عموما دكتور محمد إسماعيل كان بيقوللي مرة:..فكرني وإحنا رايحين المشوار الفلاني ناخد شوية تراب من الشارع عشان أحدفهم على واحد معين ...-مش هتصدق لما أقولك اسمه-.. بسبب موضوع المديح المبالغ فيه ده..في الحديث (احثوا في وجوه المداحين التراب)...خد بالك من نفسك بقى والبس ماسك لما أقابلك المرة الجاية

المشاركة الأصلية كتبت بواسطة ahmadalaaeldin

والشاب الصغير الي وزعوا معانا الكتيبات الدينية والمصاحف.

الشاب الصغير ده وحش من وحوش الكولونيل...ابنه الصغير..واد زي العسل وذكي جدا ما شاء الله...غير بقى حتة على جنب مش عارف إنت أخدت بالك منها وللا لأ..هو مابتداش يوزع معاك إلا لما راح أخد الإذن من الكولونيل...عجبني جدا ربنا يبارك فيه ويحفظه...بيقولوا إن الرجولة أدب -على سبيل التهييس-..بس ده كلام صح جدا

صحيح نسيت اسجل اعجابي الشديد بالشاب الوسيم سفندي

اللي اول ما شوفته حسيت اني شوفت نجم سينمائي لامع على اثر الصورة اللي اتعرضت في وسائل الأعلام النايل موتورزيه وهو مدد قدام اللاب توب

بس الراجل طلع طيب خالص يانور القمر ... خلتينا ظلمنا الراجل ... ربنا يحفظهولك وتشوفيه عريس

دة بيدو ابن كريم منير لسه بسلم عليه طرحني ارضا مع خنق في القصبة الهوائية وكان على وشك عمل لمسه اكتاف ...

لولا اني استغثت بكريم وجه لحقني من ايده واتكتبلي عمر جديد