الموضوع: مشكلة العضو (تجربتى مع عبداللطيف جميل اسكندرية)

اسوء ناس اتعاملت معاهم فى بيع و شرا فى حياتى اختيار خاطىء تماما لاى حد عايز يشترى عربيه نيسان من عبد اللطيف جميل



بفضل الله استقريت انى اشترى نيسان صنى اتوماتيك بدون ABS لون نبيتى و كان للاخوه الافاضل بالمنتدى هنا فضل كبير لتوضيح الامور بالنسبه لى و بالاخص الاستاذ الفاضل احمد مصطفى Ahmed.TV

توجهت الى موزع نيسان عبداللطيف جميل بتاريخ 2/8 قالى العربيه مش موجوده بس اجيبهالك خلا 3 او 4 ايام احجز انت بس و تعالى استلم قلتله لأ هات العربيه و انا اجى اشيل على طول طبعا كان فى تليفونات خلال الفتره دى فكان المندوب يرد على طول و كل يوم تليفونات ليا قبل الحجز عشان احجز المهم توجهت يوم 7/8 للمعرض قالى العربيه ماجتش بص اخر حاجه كمان 3 ايام بس احجز عشان السعر و عشان اولويه اللون و انا هاجيبلك العربيه توكلت على الله و حجزت عدى اسبوع اكلم المندوب مابيرودش مره اتنين تلاته مفيش اكلم المعرض مافيش حد بيفدنى رحت طابب عليه ايه الاخبار قالى بص المصنع اجازه و هايبتدى يصنع بعد الاجازه و انشاء الله مش بعد يوم 21/8 هاتكزن العربيه تمام

اه افتكرت كان التفاق اللى حجزت على اساسه انه هايدينى العربيه ب 87500 و كمان حد من عنده هايطلع المرور يرخص و بعد مفاوضات على النمر التجاريه قالى هايجبلى نمر تجاريه لحد لما ارخص فى المرور

عدى يوم 21/8 و كل 30 تليفون يرد على تليفون و حجج اصلى تعبان اصلى عندى مشاكل اصلى الحكايه و الروايه المهم بعد يوم 21 قلت اسحب الحجز و احجز فى حته تانيه اروحله يقولى و الله عيب ده خلاص حرام انت صابر قد ايه قربت افكره فيها اقول هانت المهم بدأت القصه تدخل فى زنقه العيد و بدأت موديلات 2011 تنزل و بدأ و بدأت العربيه تقل فى السوق و بدأت لهجه الكلام و طريقه و اسلوب الكلام يتغير قلت عدى معلش عشان نخلص المهم بعد المناوشات دى كلها و طبعا التليفونات شغاله بالمعدل اللى قلتلكم عليه فى الرد رحتلهم يوم 4/9 قلته انا عايز اخلص القصه دى قبل العيد قالى ربنا يسهل و طريقه الكلام برده متغيره كلمونى بوم 5/9 قالى فى عربيه لون غير اللون اللى انا عايزه لون نوف هاتيجى خلال اليومين دول اوك قلتله على البركه اوك انا عايز اعيد بالعربيه قالى هاتلى الفلوس كلها على مالعربيه تيجى و الله كنت هارح اديله الفلوس بس الحمد لله ماروحتش و كلمتهم قلته مش هادفع غير لما اشوف العربيه و ده حقى قالى استنى بقى لما تيجى اتكلمنا برده فى النمر التجاريه قالى هاوفرهالك فرى قلته و لو ملحقناش نرخص قالى ربنا يسهل اتفقنا ان النمر تقعد معايا لحد ماترخص و التكلفه بالنص بينى و بين المعرض قلت ماشى كلمنى حد تانى من عندهم امبارح 7/9 قالى العربيه جت رحت على طول اخدت الفلوس و رحت طبعا طريقه الكلام زى الزفت مش اسلوب تعامل خالص المهم طيب فين المبايعه مفيش فين ورق العربيه مفيش هانبقى نجيبهم لما تيجى ترخص قلتله اومال انا هاخد ايه قاللى ايصال استلا نقديه و العربيه بدون ورق و انا ادفع كامل االمبلغ و مالقتش الراجل اللى متفق معايا اكلمه قافل تليفونه يمين شمال مش عارفين يجبوه المفروض ان انا العميل بتاعه لازم يتواجد و احنا بنخلص المهم الراجل اللى كان موجود قلتله المندوب هايطلع امتى معايا قالى صعب اصل احنا بندى اولويه للتقسيط ؟؟؟؟ قالتله النمر التجاريه فين قالى جاى فى السكه قلتله حسابهم ايه قالى تقريبا هانرخص بعد 8 ايام فى 70 جنيه يعنى حضرتك تدفع 560 جنيه قلته ده مش اتفاقنا قالى انا ماتفقتش معاك على حاجه قلته مش انت بس زميلك و ده ممثل ليكم قالى ده اللى عندى طب يا عم هاتلى الراجل التانى قالى معارفش و اسلوب كلام زى الزفت و نبره صوت بتعلى قلتله فى ايع يا عم انتم بتتكلمو ليه كده و بتعملو كده ليه قالى لو لاقيت العربيه بره خدها طبعا انا اتجننت و قلتله لا ادينى فلوسى و الحجز بتاعى و حسبى الله و نعم الوكيل فيهم و دى كان مشكلتى معاهم

1- يجيب رجلك لحد ماتحجز
2- التأخير و الملاوعه فى الردود
3-عدم الرد على التليفونات (و حتى لو مشغول كلمنى لما تكون فاضى)
4-طريقه الكلام و التعامل اللى مش لطيف بالمره (دانا راجل جاى ادفع فلوس)
5- التنصل من اتفاق زميله و اختفاء زميله
6-عدم الوفاء بالاتفاقات (موضوع النمر التجاريه)
7-عدم توفير المتطلبات من جهه اللون
8-ادفع كامل المبلغ و بعدين بقى دور على العربيه و بعد العربيه دور على الورق بتاعها و بعدين دور على الترخيص
9- مفيش مندوب يخلصلك الا لو كنت تقسيط و مفيش نمر تجاريه على الرغم ان مرعى و مودرن بيدو تجاريه ببلاش
10- اللى مضايقنى الاستفزاز و تضيع فرحت العربيه الجديده و طريقه الكلام و التعامل

و لو افتكرت حاجه هاكتبهاكوم و حسبى الله و نعم الوكيل