الموضوع: الحرارة مع التكييف

صباح الخير
امبارح أخيرا قدرت الاقي وقت و توكلت على الله و رحت لمحمد السيد.
الصراحة أنا أول مرة أشوف كهربائي سيارات فاهم هو بيعمل ايه و مذاكر كويس و مش بيفتي. و مع ذلك الراجل في منتهى الاحترام و التواضع

أولا حط العربية على الاسكانر و لقى أن حساس العمة (IAT) مش بيقرأ و قاس الفولت في السلك اللي رايحله ملقاش ال5 فولت فراح مغير الفيشة و لمبة التشك في التابلوه طفت و غيرت فلتر هواء بالمرة ب20 جنيه.

تاني حاجة مشكلة التكييف و الحرارة طلعت ان كتاوت السرعة العالية كان البنز اللي بيدخل فيه في علبة الفيوزات مهرب فعدل البنز و التكييف بقى بيشغل المروحة على السرعة العالية.

تالت حاجة، كان فيه كهربائي كفتجي رحتله من سنة علشان العربية كانت بتقطع كتير ففضل يلعب في الاسبراتير (distributer) و يقدم و يأخر كهربه العربية. لكن محمد السيد كان بيقرأ لفات الموتور من الاسكانر لحد ما ظبت الاسبراتير على وضعه الطبيعي و العربية صوتها هدي.
العربية أداءها اتحسن 75 في المية حيث أن التقطيعة مبقيتش بتيجي في المشي العادي لكن بتيجي خفيفة لما أشيل رجلي من على البنزين فقالى ان حساس الشكمان ممكن يكون محتاج يتغير لأن قراياته مش مظبوتة و احتمال أحتاج أغير الاسبراتير علشان هو ممكن يكون السبب في التقطيعة.
أنا هجرب كام يوم كده و هشوف لو الحكاية مضايقاني هروح و أغير الحاجات دي لكن لو هعرف أعيش بيهم هسيبها كده و هي كده مش وحشة.

شكرا لكل الناس اللي حاولت تساعدني

المشاركة الأصلية كتبت بواسطة tarek_2005

الف مبروك علي الاصلاح وبردو طلع ان السرعة العالية مش شغالة وعيب في الكتاوت زي ما قلتلك

فعلا زي ما حضرتك قلت المروحة سرعتين و السرعة العالية مش شغالة و الكتاوت هو اللي كان فيه المشكلة. شكر على المساعدة و جزاك الله كل خير.