حبيت اشرككم معايا فى اللى حصل لى يوم الخميس الماضى وانا راجع من الشغل حوالى الساعة 3 عصرا
كنت ماشى على السرعة حوالى 80على طريق سفر وفجاة لقيت العربية فصلت والتابلوه نور وكان الكونتاك مفتوح من غير دوران.
ركنت على اليمين وحاولت ادور العربية الاقيها بتحاول تدور وصوت المارش موجود لكن من غير ما تلقط. الكلام دة عملته حوالى 8 مرات. نزلت ابص على البطارية لقيتها تمام والانوار شغالة عادى(يبقى مش بطارية ).كلمت حبيبى عصام غنايم. قالى ممكن يكون سير كاتينة .بس انا معنديش فكرة عن الميكانيكا خالص قاللى مبدئيا بص على علبة الفيوزات لقيت واحد كدة بيشاور عقله غيرته . مفيش نتيجة..كلمت زمايلى فى الشغل بعتولى سواق الشغل ومعاه كهربائى اول ما شاف الوضع فتح غطا السير لقينا السير مقطووووووووووووووووع بس قطع ايه بقى ماتتخيلهوش. الغريب ان العربية عاملة 66.000 كم والسير دة انا مغيره عند ال 40.000 يعنى عامل 26.000 فقط
المهم سحبت العربية لحد الميكانيكى بتاعى قاللى نغير السير ونشوف. غيرنا السير لقينا العربية جابت وش سلندر و2 صباب اتعوجوا. كان الوقت اتاخر .ركنا العربية حتى صباح السبت على ما اجيب الحاجة اللازمة لها وجبتها النهاردة. وهى كالاتى....سير كاتينة 55ج جوان وش سلندر 20ج طقم جلد صباب 40 ج زيت موبيل 1000 كم 65 ج فلتر بنزين 20 ج طقم بوجيهات 35 ج بكرة شداد(زى ما عصام نصحنى بتغييرها بالمرة) 160 ج طقم صباب 110 ج يعنى الاجمالى حوالى 500 ج.
دى كانت تجربتى مع سير الكاتينة قلت اقولها لكم على امل ان اى واحد يتعرض للتجربة دى مايحاولش يدور العربية للان دة كان عامل اساسى فى تغيير جوان وش سلندر و طقم الصباب على ما اعتقد .
ويارب ما يكتبها على حد فيكم ولا على تانى يارب