الموضوع: 2000 كيلومتر مع الصانى-يوم بعد يوم بتأكد من حسن اختيارى

بعد ان اتميت ال 2000 كيلومتر، وابتديت اخد على العربية وهى كمان ابتدت تاخد عليا

الحمد لله تأكدت تماما انى اخترت العربية الصح

ليه صح؟

مش معنى انى بقول انها العربية الصح ان مافيش غيرها كويس فى السوق(ده طبعا كلام فاضى)، لكن السوق مليان بكل الماركات التى ترضى جميع الأذواق

لكن إيه اللى انا اخدته من نيسان صانى مالقيتش عربية تانية تديهولى

أولا : عربيه من شركة عريقة معروفة بسمعتها المتميزة عالميا وسياراتها تباع فى كل مكان وتحمل لمسات اعظم مصممى اليابان وفرنسا

ثانيا: تاريخيا الموديل ده فى حد ذاته حاز إعجاب اخواننا الخليجيين اللى مبيعجبهمش العجب وهذه فى حد ذاتها شهادة حق للسيارة

ثالثا:الفئة، هذة السيارة من الفئة المتوسطة التى تشمل الأوبترا والإلانترا والكورولا واللانسر (يعنى تعتبر سيارة كبيرة الحجم فى العيون المصرية)

رابعا:الفئة السعرية، لما نبص على الإمكانيات التى تباع بها هذة السيارة فاننا نجد انها مش بس ارخص بكتير من مثيلاتها اليابانية لكن كمان تباع ارخص شوية من مثيلاتها الكورية .يعنى مش بس ارخص من اليابانى، لا دى كمان ارخص من الكورىمن نفس الفئة(مع كامل تقديرى واعجابى بالكورى بس انا بتكلم على السعر)، يعنى الصانى الأوتوماتيك تباع بسعر الإلانترا المانيوال وبسعر الأوبترا الأوتوماتيك، لكن انا لو حبيت اجيب لانسر مثلا فالمبلغ دا مش هايجيبلى غير لانسر 1300،وطبعا لا مجال للكلام عن الكورولا اللى هى لسة محتاجين شوية فلوس مش قليلة تانى علشان نوصل لحافة ال1300 مانيوال

خامسا : الإمكانيات: العربية فيها كل حاجة انا عايزها، محرك يضرب بيه المثل فى القوة والهدوء والنعومة 1600 سى سى ،16 صباب 110 حصان شايل كل كماليات العربية بدون اى تأثر، جيربوكس اوتوماتيك، باور ستيرنج، تكييف، مرايات كهرباء واربعة زجاج كهرباء وسنترال لوك، ايرباج،كاسيت واربعة سماعات، انذار بريموت،تعلية وتخفيض كل من طارة اليريكسيون وكرسى السائق وعلاقات احزمة الأمان

سادسا المساحة: الصالون معقول وإن كان فيه ناس بتقول ان الكنبة الخلفية ضيقة، الشنطة كبيرة جدا

سابعا: مراكز الصيانة، لها حوالى ستة مراكز صيانة فى القاهرة فقط، غير اسكندرية واسيوط(انا طبعا يهمنى القاهرة بالأساس)

ثامنا :المكونات، فيه ناس كتير جدا محرد ما تسمع كلمة مصرى يبتدى يجيليها ارتيكاريا وتهرش، لكن انا بحب ابص للأمور الللى قدامى بتفاصيلها، العربية المكونات المصرية اللى فيها مش كتير ، ومع كدة هى مكونات يتمنى الإنسان لو كانت اكتر لأنها كلها محترمة، يعنى مثلا الزجاج جريش والكراسى موبيكا(موبيكا اللى مش عاجاباكم دى انا فى مجال شغلى بنشترى منها تجهيزات غرف التحكم اغلى من المستورد وتتطلب من شركات البترول الأجنبية فى مصر بالإسم) والرادياتير مصرى والبطارية مصرى ، وكاوتش الابواب مصرى وموكيت الارضية، وكلها انا شايف انها محترمة جدا‘ فبما عدا ذلك كل المكونات الأساسية يابانى، المحرك والجربوكس وآلات الجر ونظام التعليق والتوجيه، وحتى الإطارات يابانى

سابعا: التقفيل، قبل ما اشترى السيارة سمعت قصايد شتيمة لا اول لها ولا آخر على مستوى تقفيل العربية، لدرجة انهم حسسونى انى هاشترى عربية ألترامكو ميكروباص مثلا، بس فعلا بعد ما اشتريت العربية عرفت قد ايه حنا شعب بيفتى من غير ما يشوف، انا اشتريت 3 عربيات زيرو لحد النهاردة، لأاول مرة مش لاقى حاجة اقدر اقول عليها غلطة فى التقفيل، يعنى انا مثلا لما جبت اللانوس من سبع سنوات كنت معجب جدا بتقفيلها برغم وجود بعض الهفوات البسيطة فى التقفيل، لكن هنا حتى هذة الهفوات انا مش لاقيها

ثامنا: الأداء: فى كلمة واحدة perfect ، سحب وثبات على الأرض ومناورة وكل حاجة، استهلاكها فى البنزين عالى شوية، لكن برضه لازم احط فى اعتبارى ان العربية اوتوماتيك وموتورها يعتبر كبير

علشان كدة انا اخترت النيسان صنى، وكل يوم مع الإستعمال بتأكد ان اخيارى صح، فى الفئة السعرية دى الصانى هى اكتر عربية تناسب احتياجاتى وتستطيع إرضائى

الدرس التانى اللى اتعلمته مع الصانى ،انى احاول استخدم عينى اكتر من ودنى، اتفرج واقيم بعينى افضل كتير من انى اسمع كلام الناس بودنى

سبعاوى

الاخ العزيز جمال

ممكن أسألك سؤال غريب شويه

انت كنت ساكن فى مدينة نصر فى شارع اسماعيل القبانى وكان عندكم زمان عربية هوندا سيفيك هاتش باك من السبعينات؟

اصل انا شاكك انى اعرفك شخصيا

يا ريت تقوللى