الموضوع: Getz Club

المشاركة الأصلية كتبت بواسطة mr.aboody

يا جماعة في بديل عن التوكيل للصيانة
انا عديت النهارده على مودرن سيرفيس
وسألت على صيانة ال 20000
55 بوجيهات
131 فلتر بنزين
260 مصنعيات
250 زيت 10000
الاجمالي 696 جنييييييه !!!!

فعاوز اعرف في مكان تاني ارخص بالنسبة للمصنعيات او كقطع غيار

انا عايز اقولكوا على تجربة حصلت معايا في موضوع المراكز المعتمدة دي . قولت استرخص برده واشوف حاجة جنب البيت بدل مشوار ابو رواش ده .
لقيت مركز خدمة في الرحاب اسمه كارفان وكنت عايز اغير تيل فرامل امامي وكان سعره في غبور 450 جنيه .
روحت كارفان وسالت انتوا فعلا مركز معتمد وكل حاجة عندكو هي اللى عند غبور وفي الضمان وكده ؟
طبعا قالي كل شيء زي مانا عايز وانهم هايختملي الضمان ومافيش فرق بينه وبين غبور خالص .
طيب يا عم بكام التيل قالي بـ 260 جنيه . قولتله ازاي ده في غبور اغلى من كده قالي هو هو نفس التيل وحضرتك هاتشوف التيل الجديد والتيل القديم لما نفكه ولو لقيت فرق قولي بلاش تركبه . قولت ماشي
المهم رفع العربية وفك التيل وجاب التيل الجديد في علبة هيونداي وكله تمام وجاب لقمة تيل قديم ولقمة من الجديد وحطهم على بعض وقالي في فرق؟
بصراحة مكانش في فرق يذكر يعني حوالى مثلا 5 مم اكبر او اصغر حاجة كده . قولتله اومال ازاي عندهم غالي ؟
قعد يرغى انهم لازم ياخدوا خصومات عشان يعرفوا يشتغلوا وان صاحب المركز ده واصل في غبور وعشان كده بياخد اسعار تانية وفضل يرغي يرغي لغاية لما ركبوا التيل ونزلوا العربية وبعدين فاجأني وقالي اصل الجيتز بيركب عليها التيل بتاع الفيرنا وبتاع الهيونداي اكسيل .
قولتله يعني ده بتاع الجيتز ولا لأ ؟ قالي ماهو الجيتز والفيرنا والاكسيل نفس التيل وقالي انهم في غبور بيسعروا كل عربية لوحدها حتى لو نفس قطعة الغيار والجيتز غالية شوية على اساس انها كوري يعني .
المهم اخدت العربية وانا مش مقتنع بكلامه لكن فرق الفلوس مخليني مش عارف اخد القرار السليم .
يويمن ولقيت التيل بيعمل صوت كده كل ماجي اقف . يعني مع الفرامل وانا ماشي عادي جدا لكن اول لما العربية تقف تلاقي صوت حكة جامده كده . بصراحة كسل مني مروحتش هناك تاني وعدى فترة كبيرة حوالى شهرين فقولت خلاص منا لو روحت هايقولي ده عدى شهرين وممكن يكون استخدامك وحش واكيد هاطلع انا اللى غلطان .
المهم روحت غبور في ميعاد الصيانة بقى بعديها بحوالى 4 شهور كده وقولت للمهندس على اللى حصل . قالي ارجعلهم تاني احنا مالناش دعوة .
قولتله ازاي دول مركز خدمة معتمد وانتوا اللى معتمدينه وواخد اسمكوا .
قالي كل اللى حضرتك بتقوله تمام لكن احنا بندربهم وبنديهم الاسم لكن مالناش عليهم رقابة يعني لو بوظوا حاجة في العربية هما المسئولين مش احنا وماينفعش ترجع لغبور في اي مشكلة تحصل من مراكز الخدمة دي .
والكلام اللى هو قالهلوك مظبوط ان تيل الجيتز والفيرنا والاكسيل نفس المقاس بس لكل عربية اللقمة بتاعتها المطابقة للطنبورة بتاعة العربية .
انا مش بقول ان كل مراكز الخدمة بالشكل ده بس انا قولت اعرفكم مسئولية غبور تجاه المراكز دي وان اكيد المراكز دي هدفها الاول هو الربح وده طبعا بييجي بالصيانة والخدمات .
لكن ياريت لو حد جرب مركز خدمة كويس ولقى هناك المعاملة كويسة وفي امانة يقولنا عليه
معلش طولت عليكم

المشاركة الأصلية كتبت بواسطة mohab555

يا جماعة انا فى قدامى عربية جيتز 2007 فول ابشن مانول و فتحة سقف و فبريكة جوة و برة و ماشية 50 الف كم و صاحبها بيقول عايز 64 ؟؟ انا حاسس انو كتيير ايه رأيكم العربية سعر السوق للمواصفات دى كام ؟

اعقتد ان سعر عالي شوية . ممكن نقول انها بالمواصفات دي ممكن تكون في رنج 58 لي 60 مثلا
حسب اسعار السوق يعني
حاول تفاصل معاه شوية

المشاركة الأصلية كتبت بواسطة ahmed_ezz

عندى فى العربية لما بفرمل عادى اول ماسيب رجلى اسمع صوت صفاره صغيرة من التيل ورة اول لما بشيل رجلى لكن ة انا دايس مافيش حاجة ده يكون من ايه و حله ايه علما ان انا لسالى بدرى عالصيانة

انا طبعا مش هاقدر احدد العيب منين لكن لو فرضنا انه من التيل الخلفي يبقى لا تقلق اوي يعني لانه ممكن يكون عايز يتنضف شوية او يترجلش وممكن تعمله عند اي حد مافيش في قلق ده حوار عادي يعني.
وان شاء الله يكون حاجة هايقة جدا .

المشاركة الأصلية كتبت بواسطة _ahmed_casper_

يا جماعه محدش رد عليا انا عايز اركب سماعات للعربيه هل ده هيطلعنى من الضمان ولا ايه ؟؟؟ ارجوكم اى حد مجرب يقولى

والله يا باشا انا معنديش فكرة عن الموضوع ده .
وبعدين المشكلة ان لازم اللى يرد يكون ركب عدة وراح التوكيل وعملوا معاه مشكلة بسبب العدة .
انت عايز رايي؟
اتوكل على الله وركب العدة لانها م هاتعمل مشكلة باذن الله انت مش اول واحد يركب كاسيت وسماعات . ده احنا يا ما لعبنا وركبنا عدد وسماعات والسلوك كانت بتضرب وبتلمس وعادي يعني
خليها على الله