الموضوع: أدي اللي عمله فيا كارتك لما حبيت أرش السبويلر بتاع الماتريكس

السلام عليكم ...
حصلت معايا التجربه دي و حبيت أنقلها ليكم بالكامل و بدون أي مبالغه عشان أخد رأيكم في اللي حصل ....
من حوالي شهر رحت جبت سبويلر للماتريكس بتاعتي من أولاد عشم اللي في شارع دمشق .. طبعا كلكم عارفينه ... المهم السبويلر بيبقي خام يعني لازم يترش بلون العربيه قبل ما أركبه ...
جربت حظي مع غبور و قالولي لا طبعا لان السبويلر مش أصلي ...
قلت يبقي أقرب واحد للموضوع ده هو كارتك عشان مركز معتمد من غبور و أكيد عارف الوان هيونداي كويس و هايطلعه مضبوط لانه عنده مركز خدمه للهياكل و بيرش عربيات هيونداي كتير ...
رحت كارتك و قابلت المهندس بهاء و اديت له السبويلر و طبعا اديت له رمز اللون و رمز اللون في الماتريكس بيبقي مطبوع علي القايم الامامي شمال ... رمز اللون بتاعي هو SJ اللي هو الفضي اللي مدي علي رمادي شويه اللي بيسموه فضي معكر ( milky silver ) ...
متهيقلي دلوقتي الموضوع سهل , عنده رمز اللون و هايضربه علي الكمبيوتر و يعمله و يرش بيه , بالضبط زي ما بيعمل غبور لما ييجي يرش أي عربيه ...
رحتله بعديها بكام يوم عشان أشوف الأخبار ايه , لقيت المفاجأه : السبويلر مرشوش بلون مش صح , مرشوش فضي مخضر ( moderate silver ) أو بتقولوا عليه بيستاج و ده رمزه MC ,
و يقول لي هو ده ال SJ و مصر علي كده و يحلف و أنا أفهمه انه MC و ان SJ مش كده خالص مش عايز يفهم و مصر علي موقفه ... جبتله البروشور بتاع الماتريكس و وريتله الألون فيه و وريتله الفرق بين SJ و MC و برده مصمم انه رشه SJ و ان لما دخل SJ عنده في السيستم طلع اللون ده .. ده طبعا استحاله لان السيستم مش هايغلط فأنا باشك انه عنده سيستم من أساسه .. المهم ...
أخر ما وصلنا ليه انه لازم يشوف العربيه أو حاجه من أترها !! يعني غطي التنك مثلا عشان يقدر يطلع اللون صح .. ده طبعا قمة التهريج لانه كده هايبتدي يجرب و يظبط لحد مايوصل لأقرب حاجه و مش ممكن هايطلع اللون بالضبط ... ما علينا قلت خلليني معاه للأخر ... عربيتي كانت في هياكل أبو رواش و لما خلصت رحتله و وريتله العربيه راح واخدها عنده في الورشه جوه عند مهندس تاني اسمه محمد حسنين بتاع الهياكل عشان بتاع الألوان يشوف و يعمل اللون .. و بعد شويه لقيتهم بيندهوا عليا في الاستراحه عشان أخد العربيه و السبويلر و أمشي .. قلت أخيرا خلصوا .. طلعت أشوف العربيه و السبويلر لقيت المفاجأه التانيه :
السبويلر لسه فضي مخضر , و مش كده و بس لا و البيه الحلو الجميل أوي الفني بتاع الألوان أتاريه كان بيجرب اللون في عربيتي , لقيت أثار رش علي القايم بتاع الباب الخلفي شمال بس من جوه طبعا عشان أنا ماأشفهوش , كان بيجرب اللون مضبوط وللا لا و طبعا مش مضبوط و بوظلي العربيه من جوه ... رحت للمهندس بهاء بيه و قلتله السبويلر لسه لونه مش مضبوط راح قال لي طيب هو مش باين أوي بس لو مش عاجبك اللون ممكن تسيبلنا السبويلر اسبوع كمان علي ما الدهان ده ينشف و نرش غيره ... طبعا ده بعيد عن شنبه أسيبهم يجربوا فيه تاني .. بصراحه خفت أجيب له سيره عن اللي حصل في العربيه لاحسن يخدوها جوه عشان يصلحوها يقوموا يبوظوها أكتر ... طلعت علي الحسابات دفعت ال 120 + 12 جنيه ضريبه = 132 جنيه تمن رش السبويلر و أخدت بعضي و مشيت ..
و ضحيت باللي دفعته و هاحاول ألاقي أي حد محترم أرش السبويلر عنده .....
ايه رأيكوا في اللي حصل ؟ ... تفتكروا كارتك ده مركز محترم ... غبور اللي انتوا شغالين تشتموا فيه عمره ما طلع لون مش مظبوط أبدا معايا ... أمال ده بعد اللي عمله فيا هاتقولوا فيه ايه ... علي فكره أنا مش بدافع عن غبور و مأقصدش أهاجم كارتك بس برده اللي اتعمل فيا مش قليل و الحق يتقال مهما كان .. وللا ايه ؟