الموضوع: تيدا يبانى ولا التيدا المكسيكى

المشاركة الأصلية كتبت بواسطة egypt0777

شكرا ليكم كلكم يا جماعة

انا سالت عليها فى السوق بره لقتها فى حدود من 110 الف الى 115 الف بنفس الحاله اللى انا وصفتها واستشرت الراجل اللى عامل خدمة تقيم للعربيات فى المنتدى هنا قالى نفس الكلام 110 الف

اتصل بيه ما بيردش خالص على التلفون فين لما رد
لما كلمته قالى 120 الف قلت فى بالى مش مشكله طب نشوف العربية

وقالى معلش انا اصلى كنت مشغول نتقابل اليوم الفلانى --- خلاص ماشى --- لقيته اتصل بيه واعتذر عن الموعد واجله ليوم تانى --- قعدت مستنى واتصلت بيه قالى معلش اصل كنت مسافر و مشغول وجاى بكرة وحكلمك و حجيب العربية لحد البيت عندك ( الكلام ده المفروض انه يتم اول امبارح) قعدت اليوم كله مفيش حد اتصل
قلت خلاص فكك منه ده واحد بيدلع -- وانا بصراحة مستعجل عاوز اجيب العربية لظروف خاصة بيه صحية - فنزلت تانى امبارح اتفرج على التيدا الهاف اوبشن ( اللى هى مش بلاس)
بصراحة روعه 2 ايرباج و فوانيس شبورة و abs-ebd-bs - تكيف بكر
بس مافيهاش جنوط اسبور ولا مساند ايد ولا نور فى السقف ناحيه المراية الامامية و مفيش تحكم فى الطارة والفرش قطيفة حلو مش وحش والواحد كده كده بيركب فرش بس كده و الكرسى السواق مابيوطاش ولا بيعلى ( كل ده فرقه فى حدود 12 الف بينها و بين البلس)
الريموت هو الريموت والشكل هو الشكل والعزم هو العزم
وبسعر 115الف وممكن المعرض يعمل عرض فى السعر فانا قررت اجبها
بس اخويا لعب فى دماغى وقالى هات السوبر صالون اوفر 15 الف و عربية جباره وثبات و تسارع وجنوط و عليها سحب فعلا بالعبيط
لان الراجل فى المعرض قالى ان التيدا اجبهالك الصبح انما الصنى بالحجز فى حدود اسبوع
وهو فعلا مجرب العربية الصنى وانا سقتها منه و فعلا عجبانى
ايه رايكم
اجيب التيد بالشكل اللى انا وصفته ولا اجيب السوبر صالون و اوفر 15 الف ( انا اللى يفرق معايا فى العربية الفتيس الاوتو و الثبات على السرعات و التسارع الرهيب -- اصل انا سوقتى عنيفة حبتين ) افيدونى عشان انا نازل احجزها اليومين دول ان شاء الله

خلينا نرتب المسألة بالراحة.. أولاً التيدا بتاعة الراجل ده هي الاختيار الأساسي.. فلازم تقفل بابها نهائي الأول قبل ما تفكر في غيرها بدل ما تروح تشتري وبعدين تفاجأ بيه بيتصل بيك وترجع تقول ياريتني استنيت.. لذا أنصحك تتصل بيه مرة أخيرة أو تبعت له رسالة على الموبايل تقول فيها إنك عاوز تخلص في العربية خلال يومين مثلاً هل هو ناوي يبيع ولا تشوف غيرها؟
بعد كدة لو ما لكش نصيب فيها.. نفكر بقى تجيب الفئة الأقل ولا تنقل التفكير كله إلى الصني؟؟؟
رأي الشخصي كما يلي: الفرق كان واضح قوي في حالة التيدا البلاس.. أما مع الفئةالأقل فالمقارنة صعبة.. واللي هايحسمها طبيعة أولوياتك.. بمعنى إنك لو عاوز عربية عائلية واسعة تبقى التيدا.. عاوز تصنيع وتقفيل وإتقان عالي مفيهوش غلطة تبقى التيدا.. عاوز تسارع رهيب وسحب خرافي ونعومة غير عادية في النقلات وموتور تتعب لغاية ما تسمع صوته تبقى التيدا..
أما لو عاوز ثبات أعلى تبقى الصني.. لو عاوز شياكة وفخامة في المظهر الخارجي (ودي وجهات نظر) تبقى الصني.. لو عاوز عربية مضمونة في سعر إعادة البيع وكمان في قدرة الميكانيكية على التعامل معاها بعد فترة الضمان تبقى الصني.. وطبعاً لو عاوز توفر 15 ألف تبقى الصني
وزي ما انت شايف.. المقارنة بتقول إجمالا إنك بتشتري إمكانات وكفاءة وإتقان واتساع مقابل ثبات وانتشار وفرق 15 ألف.. والاختيار لك.. بس في الحالتين تمسك بالأوتو مش المانوال..
لو بتطلب الرأي ونصيحة.. دور على التيدا الكاملة.. شوف في المعارض أو اسأل في التوكيل.. أعتقد مش صعب تلاقي تيدا 2010 زيرو.. وممكن تاخد عليها تخفيض كبير حسب شطارتك.. ولو عاوز طريقة سحرية تحسم لك الاختيار.. اعمل استخارة.. وستجد ما يريده الله لك يتيسر ويتحبب إليك..