الموضوع: الشباب اللى فى ميدان التحرير دول عايزيين ايه

المشاركة الأصلية كتبت بواسطة om mohammed

الله يكرمك

مش دة اللى خلانا نمشى نكلم نفسنا والناس مبقتش طايقة نفسها ولا بعضها عشان كل واحد يلحق يجيب لقمة العيش اللى مش بتكفى لحد 3 فى الشهر

إعتبروا اللى احنا فية ضريبة اجبارية (زى بتاعة حكومتة الله لا يعيدها ) لازم ندفعها عشان نلحق نعيش حياة كريمة فيها كـــــــــــــــــرامــــ ــــــــــة مش فلوس بس

وولادنا يدعولنا مش يدعو علينا ان إحنا مكملناش عشان زهقنا وعايزين نرجع الشغل بأة

مرة واحدة فى حياتنا نقول لأ ونكملها ودى مش أى لأ
دى لأ اللى هتشيل شجرة الفساد من جذورها وهتبقى عبره للى جاى بعدة لو مزرعتش شجرة طيبه بثمار طيبة بردو هنشيلها من جذورها

أرجوكم إعـقلـوها

نفس الكلام اللي اختي بتقوله
و اتمنى لو كلام سيداتنا زي كده و كلام رجالتنا زي ما بنشوف من البعض! ان رجالتنا يبقوا نسوان احسن لهم! جايز يقول كلام يرضي ربنا ساعتها

المشاركة الأصلية كتبت بواسطة amado ibrahim

اتفق مع اغلب الشباب اللى قالو ان استمرار المظاهرات بهذا الشكل قد اصاب البلد بالشلل

و اتفق ايضا ان هناك فئات كتيرة لها مصالح قد تعطلت ووظائف على كف عفريت (وف وظائف العفريت نفسه زهق ور اح يدور على عقد عمل فى دبى <خاصة العاملين فى قطاع السياحة ننظرا للهروب الكبير اللى بيقوم بيه السياح معقول مليون سائح يغادرو البلد فى 11 يوم زى مقال النائب عمر سليمان >

بالمناسبة ايه حكاية الملايين اللى شغالة فى البلد واحتاجوا كم طيارة و كم يوم عشان يسافرو (باسلوب الحساب اللى ماشى فى مصر اليومين دول احنا ممكن نفضى البلد تماما ( جوا) فى خلال 800 يوم

او يمكن العفريت يركب جمل او حصان ويهاجم ميدان التحرير دفاعا عن مركزه

ما علينا

المهم فى وجهة نظر سمعتها من مجموعات من الشباب المختلف التوجهات

1- شباب 25 يناير ( الجماعة بتوع كلنا خالد سعيد- 6 ابريل -وفيس بوك و تويتر و الكلام العنكبوتى ده)
دول رايهم انهم هم المحرك الرئيسى للمظاهرات
وهم يريدون ان يطبقو السيناريو التونسى بحذافيره(للامانة هم قد نجحوا فى تطبيقه فى مواجهتهم الامنية على مدار 11 يوم لدرجة انهم خلو الشرطة يقلعو هدومهم الميرى و يلبسو ملكى و ينسحبو من الميدان فى صورة مخذية تماما ادت لاقالة حبيب العادلى افندى( اه تخيل افندى بعد مكان باشا ) واصبح ظابط الشرطة بيخاف حد يعرف انه ظابط شرطة او ياخد باله من العربية المتفيمة تماما او من اى ستيكر يشير من قريب او بعيد لوزارة الداخلية(مش عارف حاسس ليه كانى بتكلم عن الحزب النازى فى المانية بعد سقوط الرايخ الثالث وهزيمته فى الحرب العالمية الثانية<حلو شوية الحركات الامريكانى وهولوكوست وستيفن سيللبيرج و قائمة شلندر>

المجموعة السابقة تريد اسقاط النظام (الشعار اللى بقيت بسمعو وانا صاحى و كمان وانا نايم كأننى ندهتنى النداهه)
هذه المجموعات تتميز بالتنظيم - الاصرار العجيب على الاستمرار على السيناريو التونسى (لدرجة ان الموضوع بقى عامل ذى نكتة اختبار للعمد <العمدة الأول دخل قاللو ايه الحاجة اللى بنلبسها فى رجلينا و سودة و برباط العمدة قال الجزمة قاللوه ناجح
خرج للعمد بره يقلهم الامتحان فى جزم
دخل العمدة الثانى سالوه ايه الحاجة اللى من بره ابيض و من جوه اصفر و بتتاكل
قالهم برباط و الا من غير رباط
(هما دول المصريين على موضوع الرباط قصدى التنحى)
صباح الخير يا عمد (باين موضوع الرباط بدأ ينتشر بين باقى العمد (اليمن - الاردن - الجزائر -سوريا) والفضل فى ذلك يرجع للعمدة الاولانى بتاع الجزمة و الرباط (قصدى التنحى)


2- الاخوان المسلمون (دول انتم عارفينهم كويس امال كنتم بتتفرجو على مسلسل الجماعة على ايه)

3-التيارات السياسية المختلفة بما فيهم المعارضة و الاحزاب السياسية الاليفة اللى بيربيهيم النظام فى الجنينة(على حد تعبير الصحفى ابراهيم عيسى <بالمناسبة محدش يعرف راح فين عشان انا مشفتوش بقالى فترة(يمكن العفريت شافله فرصة عمل فى دبى او سلفه جمل او حصان مع كرباج محترم>

4- ودول الاكثرية ودول جميع طوائف الشعب المختلفة اللى حاسة انها مش واخدة حقها فى البلد
ودول ناس كانت مطالبهم بسيطة (حرية-عدالة اجتماعية- فرصة عمل زيادة مرتب - كرامة فى المعاملة)
ونتيجة العنف البشع اللى مورس ضدهم انقلبت شعاراتهم هما كمان الى (الشعب يريد اسقاط النظام) لكن بصورة اكثر حدة لان الموضوع اصبح فيه دماء 300 شهيد و الالاف الجرحى (التى لم يعتذر عنها النظام حتى الان <باستثناء الراجل المحترم اللى اسمه احمد شفيق الذى اشار الى الموضوع باستحياء وكان اللى ماتو و اللى استشهدو شوية كلاب او قطط او خيل او جمال او اى كائن ممكن يذبح عادى فى ميدان التحرير
بدون اى اعتذار مسئول او صرف معاشات لاسرهم ا و حتى تعويضات عما لحق بهم
و كأن مسلسل العنجهية فى لغة الحوار الحكومى ما زال مستمر (على الرغم من اللى الاخ احمد شفيق عمال يعيد ويزيد فيه ويلف بيه على كل الفضائيات بموتوسكل كأنه جاى يعمل لقاءت و حورات مش يحل ازمة(الفريق شفيق يكرر
ويزيد
و يعيد
و ينتشر
ويستمر
ويستمر
ويستمر( كفاية يستمر كدة و لااكمل لا كفاية احسن تنامو منى )
قال ايه الراجل يجماعة
قال ايه الاب الرئيس اللواء الركن الحكيم(اه والنبى لحسن احنا بقالنا 30 سنة مشيين جنب الحيط عشان حكمة السيد الرئيس < طب والنبى يا ريس متشوفلنا 3000 جنيه سلف بحكمتك دى (الله يرحم ال 3 جنيه بتوع على الكسار)
الرئيس الحكيم المؤتمن حقق90 % من مطالب الشعب
(بالمناسب فكرتونى فى قصيدة حلوة جدا خاصة بالرئيس المؤتمن كان كتبها الشاعر العراقى الكبير احمد مطر عن وعود الروساء (المؤتمن منهم ) فما بالك بالحكيم اللى عمال يخبط وعود و تصريحات من 30 سنة(خاصة التصريحات من عينة محدوددى الدخل فى عينى- مشاكل الشباب فى ودنى - و مشاكل الشعب بسلك بيها سنانى)

5- ودول بقى اشكال غريبة اجانب على عرب على خواجات و دول باين اللى ساكنيين فى الفنادق المطلة على ميدان التحرير (ذى الاخ اللى مبسوط اقوى اللى طلع فى اغلب الفضائيات انه اتضرب بالقنابل المسيلة للدموع فى المظاهرات وشايف ان دى خبرات لا تنسى(بقى انت جاى من بلدكو عشان تنضرب بالقنابل المسيلة للدموع المنتهية الصلاحية عندنا لا يا عم خليك فى بلدك احن متفرسناش وا حنا نبعتلك اللى انت عيزة ديلفرى لحد بلدكو

واخيرا تنصهر مطالب التيارات المختلفة التوجهات فى بوتقة واحدة (حلو الكلام الشيوعى الحنجورى ده) تحمل شعار
الشعب يريد اسقاط النظام
ليتجمع عليها الشباب و الشيوخ و الاطفال
المسلمين و الاقباط (لاول مرة يجتمعو بجد مش زى فيلم حسن و مرقص) <كأن الواحد عايش ايام ثورة 1919
المجدودين و المحدودين (الاغنياء و الفقراء ما انالازم اتنطط انا كما بالكلمتين بتوع المنفلوطى فى النظرات و العبرات)

اتكلم جد شوية
اول مرة فى حياتى اشوف الشعب المصرى متجمع على حاجة و احدة ( غير الساحر المستديرة اللى كلو دماغنا وخدرونا بيها لفترة طويلة من عدالة السماء ال اليوم)
واحس ان الملايين (مش القاهرة بس لا كل محافظات مصر ليها نفس الطلب (بس مش عارف ايه سر الكره العجيب لمبارك الى هذه الدرجة (على الرغم انه مش وحش للدرجة دى)

واخيرا
حدوتة الصباح

قابلت راجل عجوز على المعاش امام مكتب البريد المغلق عمال يبص للمكتب بحيرة
اكتشفت انه قاعد امام البوسطة من الفجر مستنى البوسطة تفتح عشان يقبض المعاش ليلبى احتياجات اسرته البسيطة
اتكلمت معاه و قلتلو ربنا يجازى العيال اللى تعبت البلد كلها معاها
بصلى باستغراب و قاللى ايه الكلام اللى بتقوله ده
دحنا اتحسرنا فى كبريت اكتر من شهر
وكنا عشان نقدر نواصل الصمود امام حصار الصهاينة كنا بنفكر بعض دايما
ان النبى صلى الله عليه و سلم و الصحابة اتحاسروا فى شعب ابى طالب 3 سنين
حتى اضطروا ان يأكلو ورق الشجر

ومع ذلك لم يغيروا دينهم و لم يستجيبو لاغراءاتت الكفار من (الملك - المال )

استمعت الى الرجل باستغراب وا ندهشت
دحنا بقى على كدة عيال .....................................
كملو انتو بقى

اولا احب احيي حضرتك علي التمسك بالمبدأ و التضحيه في سبيله , لكن اختلف معاك في شيء و هو التشبيه بين الدفاع عن الايمان بالعقيده الدينيه و المباديء الساميه و الواقع الحالي في مصر , بمعني ان وقت الدعوه للاسلام و ان بدأ النور يشق ظلام الجهل و الكفر في الكثير من العقلاء و المتفكرين و ذوي الفطر السليمه مثل الصحابه الذين كانوا اول من آمن بالنبي صلوات الله و سلامه عليه و الذين شعروا بنور الاسلام و صاغ قلوبهم مثل هؤلاء زي ما بنقول بالبلدي ( عرفوا السكه خلاص) فبالتالي اي اغراء دنيوي عشان يرجعني عن ما آمنت به شيء مستحيل لاني بدافع عن عقيده و نور لا يستطيع ان ينكرها , كذلك بالنسبه للدفاع عن الأوطان و الأعراض و الشرف تلك القيم النبيله التي يتبعها الشرفاء و العظماء حتي و ان كانوا في اقل المراكز في الدنيا فهم في الحقيقه عمالقه و هم البوصله التي تدل علي الطريق .

لكن يا سيدي الفاضل بالنظر لحالنا الآن و بعد ان قامت هذه الانتفاضه الشريفه للدفاع عن القيم النبيله مثل محاربه الفساد و الظلم و الاستبداد و المعيشه الكريمه , و سقط منها الكثير من الضحايا فهم من الشهداء و لهم الجنه و ذنبهم في رقبه من امر باطلاق النار علي المدنيين العزل , و ده جعل الدوله تشعر بمدي فداحه الموقف و تدرك ان هناك معاناه صادقه و حقيقيه لجموع الشعب و ليست شكاوي فرديه كما كان يرد بالتقارير , فبالتالي هناك وعد من المسؤوليين بالاصلاح الذي يؤدي لتلبيه هذه المطالب , و بالتالي هتاخد وقت عشان تتحقق مش زرار هنضغط عليه الدنيا تمشي , المشكله فين بقي ؟؟؟ المشكله بدأت لما بتوع السياسه بدأوا يدخلوا اللعبه و يركبوا الموجه و يحصدوا علي الجاهز ما هما ما طلعوش مظاهرات وولادهم ماتوا و ده عشان يطالبوا بمكاسب سياسيه بنظام سيب و انا اسيب و بدأنا نسمع بمطالب بدأت اول ما الريس عين ليه نائب , قالك بس ده لقطه احنا كنا فين ما نضغط شويه كمان عشان نغير بعض مواد الدستور و نحل مجلس الشعب بقي مدام نخ زي الجمل كده و لما ابدي استعداده لتغيير الدستور طلع و قالك و ايه يضمن انك تنفذ ما تمشي دلوقتي و انت عملت ايه بقالك 30 سنه احنا هنعتصم تاني , و لما جه قال انا مش هرشح نفسي تاني لا انا و لا ابني و الطعون في الانتخابات هتتنفذ قالك لا انت ممكن تمشي دلوقتي بنص الماده 139 من الدستور يطلع واحد تاني يقولك لا ما ينفعش اصل الماده مش عارف كام بتعارضها ... و هكذا ندخل في جدل لا ينتهي .


بالله عليكم الشباب اللي قام بالمظاهره دي يفهم في دستور و الماده 76 و الماده 139 و طعون الانتخابات و قالك احنا عايزين نائب للرئيس ؟؟؟؟ هما دول اللي ركبوا الموجه و بدأوا يسرقوا مجهود الناس المحترمين و دوافعهم النبيله لاقتناص مكاسب سياسيه ليهم مش مهم البلد تخسر تولع بجاز المهم ان دي فرصه عظيمه لن تعوض انهم نجحوا في استثمار هذا الغضب الشعبي لصالحهم , و تضيع المباديء النبيله و الهدف الرئيسي الذي حرك الناس المحترمه, و يحاولوا يقولوا للشباب صاحب النضال و صاحب الثوره لما يشعروا انهم بداوا يفشلوا فيما يريدون خدوا بالكم دول بيضحكوا عليكوا و لما حدثت ان الجمال و الأحصنه اقتحمت المتظاهرين بدأوا يتاجروا في الحدث و يقولك شفتم دول ما لهمش عهد و طبعا اي واحد مهما كانت درجه ثباته الانفعالي ما يقدرش يميز في اللحظه دي بين الصح و الغلط فما بالك بشباب محترم حسن النوايا و طاهر القلب؟؟؟؟

اعتقد يا سيدي الفاضل اني لو انا شخص صاحب مبدأ و بدافع عنه ابقي عارف كويس قوي و احس امتي اشد و امتي ارخي , و امتي اقف زي الجبل لا اتزحزح عن مبادئي رغم المغريات الزائله ايمانا بقوه مبادئي و ايمانا بقوه تأثيرها في الحاضر و المستقبل و ايمانا مني بفساد الأحوال آجلا او عاجلا اذا تم تنحيه هذه القيم و عدم العمل بها.


اعتقد يا سيدي الفاضل لما السادات اتخذ قرار التراجع عن تصفيه الثغره في حرب اكتوبر و قال انا ما باحربش امريكا انا اقدر احارب اسرائيل , يبقي كده دي راجل خان مبادؤه و خان القياده العسكريه ؟؟ و لا كان المفروض يكمل المبدأ بتاعه و يقضي علي شباب الجيش او يقضي علي البلد كلها و يخسر الحرب كلها لو دخل في صراع هو غير مستعد له؟؟؟؟؟ و يعمل بمبدأ الحرب الي النصر فقط و تولع الدنيا المهم اني انتصر و خلاص و احقق المجد لي و لبلادي و كل حرب و ليها ضحايا و الحريه ليها ثمن و ثمنها غالي الكل لازم يدفعه !!!!

انا اتذكر في هذه اللحظه السادات و تعليقه علي حادث الزاويه الحمراء قائلا( في ناس بينفخوا في النار و بيستغلوا الشباب وقود لهذه النار , انا بحذرهم جميعا و اقول لهم ان الديمقراطيه ليها انياب و تقدر تحافظ علي نفسها ).

اعتقد ان هذا الشباب المحترم يجب ان يعي ما يدور حوله من احداث و هو قادر ان يقيس مدي التقدم في تطبيق طلباته من عدمها .

المشاركة الأصلية كتبت بواسطة a.saad

المشاركتين دول بيثبتوا حاجة
ان اللى بيهتف
مش عارف بكرة هيعمل ايه
لانه مش بيبص لابعد من قدمه
وملقاش اجابة على المشاركة الاولى
مع انه من دعاة التظاهر والتغيير الان

الكلام ده موجه ليا انا ؟