الموضوع: حد شاف العاشرة مساء مع الضباط ( رأيكم ايه )

المشاركة الأصلية كتبت بواسطة azmeralda

طبعا اسلوب الكلام بتاع يضربوا بالجزم
مينفعش الواحد يرد اصلا
بس كمان لما تقول معندهومش دين ولا ثقافة ده على الجميع ولا على اللى كانوا فى الحلقة ولا ايه بالضبط

يعنى محدش فيكو له اخ او قريب ضابط ؟اكيد لأ واضح ان الكلام يا اما انفعالى بسبب الشهداء وطبعا اللى حصل لهم ميرضيش اى حد يا اما الكلام من السمع عن ضباط وحشين اللى مبنكرش انهم موجودين او لموقف شخصى مع ضابط او امين ادى للتعميم على جميع الضباط

اولا خللى بالكو ان اى حد فى المنتدى هنا ممكن يكون والده او قريبه ضابط وان فعلا فى ضباط اتدبحت وولعوا فيها
مش اكيد ان اللى اتعمل فيهم كده بسبب ظلمهم زى ما بيتقال

يعنى ببساطة ابن خالى ضابط لسه متخرج ملحقش يعمل حاجة فى حد وراح الأمن المركزى فى شرم الشيخ كان قاعد جوه المعسكر اتضرب عليه نار و2 زمايله اتقتلوا
لو حد فيكو مكان امهم كان هيتكلم كده

هتقولوا والشهداء الشهداء على عينى وراسى بس مننساش ان فى ضباط كتيييير كويسين ومبيعملوش اى حاجة من التهم دى

ممكن تقولى ان مش حيادية
بس الحقيقة انى اعرف ضباط شرطة رجالة بجد
خالى مثلا ضابط والناس كلها بتحبه
يعنى بعد ما ساب المرور بأكتر من عشر سنين كان سواقين التاكسى بيتكلموا عليه بالخير والحب واحنا راكبين من غير ما يعرفوا اننا قرايبه طبعا
كل جيرانه بيحبوه ولما بيحصل حاجة مش فى تخصصه بيطلبوا منه
مثال للرجل كما يجب ان يكون فى بيته وفى شغله عنده دين وثقافة والكلام من ناس كتير مش منى

كتير شفت ولاده وهم محتاجينه ومش لاقيينه لأنه ورا تاجر مخدرات فى الجبل نايم عالطين فى عشة قش والدنيا بتشتى والديابة بتعوى حواليه
كتير كان سهران بيحرس وشفت رجليه رغم البوت الطويل اللى لابسه عشان يحمى نفسه من الناموس رجليه متشرحة من الناموس طول الليل
كتير حياته اتعرضت للخطر لا حد حس بيه ولا قاله شكرا

بنته اتهددت بالخطف بسبب وظيفته وغير ده كتير
خالى وابن خالى مسابوش مواقعهم
كمان اجواز صاحباتى مسابوش مواقعهم وهنا فىالمنصورة الضباط كانو فى الأقسام ومسابوش مواقعهم

كون فى ضباط لقوا الاف جايين عليهم عايزين يفتكوا بيهم فى نفس الوقت اللى مش عايزين يضربوا عليهم من اسلحتهم فمشيوا وسابوهم متهيألى ناس منكو كانوا هيعملوا كده قولوا لى كنتوا هتعملوا ايه هتقفوا لالف يضربوكوا ويخلصوا عليكم هى دى المرجلة

كون نزلت لهم اوامر بالقنابل المسيلة للدموع ده طبعا غلط بس هم ايوه مش مهيأين لثورة تطيح بالنظام هو ده طبيعى يعدوهم ليه فى الكلية


افتكروا ان زى ما فى ضباط وحشين قوى كده فى ناس ضحت بحياتها عشانكو
وعشان بنت متغتصبش وعشان المخدرات متاكلش ولادكو وعشان تناموا فى امان

كل ده اتنسى دلوقتى!
كان عمرهم ما عملوا حاجة عدلة !
اللى غلط يتعاقب لكن الباقيين لازم يتاخدوا بذنبهم !
لو كنت ابنك ضابط ومربيه كويس تحب يتقال عليه كده

لو كنت انت ضابط كويس ودخلت الكلية دى اصلا عشان تخدم وطنك ومن يوم ما اشتغلت بتحاول تكون مش مرتشى ومش مستغل لسلطاتك وراعيت ربنا وفجأة هجموا عالقسم بتاعك وجروا زمايلك ودبحوهم فى الشارع وكنت هتتقتل معاهم او تتحرق مع مكان شغلك ولما رجعت الناس عايزة تتف عليك وترميك بالجزمة هتشتغل ازاى ؟

انتو كده بالضبط بتعاملوهم بالتعميم زى ما كل الناس كانت بتقول عالشباب كلام ا نتو عارفينه كويس بسبب كتير من الشباب كان بيعمل حاجات غلط غطى عالكويس وشوفوا فى الآخر عملوا ايه والناس اكتشفتهم ازاى
احذركم من الظلم
واخد الكل بذنب الجزء حتى لو الجزء كان كتير

المنظومة كلها محتاجة تصليح دى حقيقة بس اكيد شتمهم وقلة الأدب عليهم مش دى الطريقة المناسبة

مع احترامى لكلام حضرتك

محدش ينكر ان فيه نسبة ضباط شرفاء

لكن دول نسبتهم لا تتعدى 5 %

اما الباقى فدول .............................

المهم ان الضابط اللى بيئدى وظيفته ( وبقول يدوبك بيئدى وظيفته) ده مش محتاج شكر لان ده واجبه اللى بياخد عليه مرتبه (اما نسبة 95 % فدول لا بيئدوا وظيفتهم وكمان بيهينو و يذلو ويهينو ويعذبو الشعب
(تعرفى حد اسمه خالد سعيد - سيد بلال- اكتر من 300 شهيد فى ميدان التحرير )

حضرتك ضربتى مثال باقاربك اللى قعد سهران على الطين والناموس بيقرصه (طب ما دى طبيعة عمله اللى مش محتاجة شكر)
امال ضباط الجيش اللى بيطلعو مشاريع حرب بالشهر يعملو ايه مع الناموس والمصارف والملاحات وغيرها كتير
(مش يطلع يقول احنا بقالنا اربع ايام فى الشارع <ايه الدلع ده>)
(امال حضرتك كنت بتتدرب على ايه فى الكلية)
اطباء الطوارىء اللى بيشغتلو ب 72 ساعة متواصل فى اقصى الظروف

حتى وانتى بتتعاملى مع ضباط شرطة اخرين فبيبصولك على اساس وضعك الاجتماعى
اما لو حضرتك شخصية بسيطة وملهاش ظهر (كنت عرفتى الناس بتصرخ من ايه)

اما بالنسبة للساده الضباط اللى طلعوه فى العاشرة مساءا
فيا ريت تقرى تعليقى على الحوار

و اخيرا تقبلى تحياتى

الشعب استحمل الشرطة 30 سنة ذل و اهانة

و الشرطة لازم برده تستحمل الشعب 30 سنة ذل و اهانة

وكده نبقى خلصانين

واللى زعلان يبقى يعمل زى الشعب معمل لمدة 30 سنة

أو يأخد مركب و يروح ايطاليا
(و لو غرق ممكن نبقى نزعل عليه)