حد شاف العاشرة مساء مع الضباط ( رأيكم ايه )

**ahmedkoko** · 16-02-2011 05:55 PM

المشاركة الأصلية كتبت بواسطة rerii

صح كده يتعامل مع الناس انهم مش اقل منه بالعكس هو فرد فى المجتمع له وظيفته زى اى شخص ومهمته حماية الناس مش ارهابهم

المناهج اللى فى شرطة دى لازم تتغير وبدل مايعلموه ازاى يضرب واحد ويعذبه ويهينه يعلمه ازاى يدور على الادلة ويحترم الناس ويعرف يعنى ايه المتهم برئ حتى تثبت ادانته انا عارفة ان التحقيق من اختصاص النيابة بس اقصد انه ميمسكش ناس عشوائيا كده ويضربهم ويبهدلهم

اول خطوة فى اصلاح النظام هى الغاء قانون الطوارئ

موافق تماما علي كلام حضرتك لازم يفهموا انهم موظفين في الدوله مش اوصياء علي الشعب

المشاركة الأصلية كتبت بواسطة atrees

لما يبقوا ينزلوا الشارع الاول بدل ما هما خايفين كدة وطالبين السماح حتي قبل ما ينزلوا

ما هما فعلا لسه مرتبكين جدا و مش عارفين يتعاملوا ازاي مع الناس عشان خلاص الناس بطلت تخاف.

**heshamzaky** · 16-02-2011 05:57 PM

المشاركة الأصلية كتبت بواسطة otefa

طيب سؤال جوهري بقه ...ممكن كل واحد يقول لو قابل شرطي بيعامله أزاي؟

بص يا باشا أنا ماليش أحتكاك مباشر بيهم . بس الى بشوفة فى الشارع بجد الناس مش طايقاهم و بصراحة من كتر الظلم الى عملوة بعضهم فعلا يستاهل الضرب ب القديمة ههههههههه . الناس دلوقتى بتتحرش بالشرطة و بتوع الشرطة عاملين طرش مش بيسمعو . احنا لا ننكر أن بعض القطاعات من الشرطة هامة جدا يعنى لو واحد قتل واحد مين الى حا يمسكة و مين الى حا يظبط البلطجية و الخارجين عن القانون و تجار المخدرات طبعا الشرطة بس للأسف رصيدهم بقى صفر و الناس كارهاهم جدا جدا جدا . أنا كنت معدى أمام قسم الزيتون الى اتحرق القسم عبارة عن مبنى مهجور بيتصلح دلوقتى و مفيش فية نفر واحد كلة مستخبى و الى كان ماشى يتقمع ب البدلة الميرى تلاقية لابس جاكيت علشان يدارى النجوم الى كان لابسها . هو لازم يرجعو بس لازم يرجعو بمفهوم جديد و لعلمك 90 بالمائة من الظباط مش حا يكون عاجبهم دة لانهم حا يشعرو أن خلاص ما بقاش فية هيبة ليهم و لا سلطة و دة مجننهم و طبعا مش حا يفصحو عن ذلك . هما يرجعو بس لازم يتغير المفهوم الى أتحفر فى ذاكرتهم عن طبيعة عملهم و يبطلو الحركات الزبالة بتاعتهم بس دة صعب بالنسبة لهم . الوضع صعب شوية لان الناس طهقت منهم و بكرة تسمع أن ظابط أحتك بمواطن و تسمع أن الناس مسكتة و علقتة من رجلية فى الشارع و مليون واحد حا يجامل و يطحن فية فعلا المشكلة دلوقتى فعلا هو أن الشعب بقى رافض شكل الشرطة بس بصراحة الشرطة هية الى زرعت دة و دلوقتى بيحصدو ثمن غلطتهم . مش عارف الحل أية بس المهم هو قصقصة ريشهم علشان ما يتجرموش مرة اخرى و الناس حا تتقبلهم ساعتها

**أحمد كمال** · 16-02-2011 06:01 PM

المشاركة الأصلية كتبت بواسطة otefa

طيب سؤال جوهري بقه ...ممكن كل واحد يقول لو قابل شرطي بيعامله أزاي؟

انا شخصيا في وسط الازمة عقيد شرطة اتخانق معايا مسحت بيه الأرض ..... خاف ينزل من عربيته

**ahmedkoko** · 16-02-2011 06:11 PM

المشاركة الأصلية كتبت بواسطة otefa

طيب سؤال جوهري بقه ...ممكن كل واحد يقول لو قابل شرطي بيعامله أزاي؟

بصراحه هعامله بقرف....هخليه يحس اني قرفان منه و دي حقيقه و الله مش يمكن هو يكون قتل واحد قبل كده او حتي عذب حد.
انا بقيت بقرف منهم بصراحه.

**MaZaGAngeE** · 16-02-2011 06:15 PM

المشاركة الأصلية كتبت بواسطة medo_2060

حوار ولا له اى لازمه وزود الضغط عندى
اولا الناس دى رتب صغيره جدا مش فى ايدهم اى حاجه كلامهم دا ميسواش مليم...
موضوع الاستعطاف والعياط مالوش لازمه...
برضه مقتنعين ان هما ضربوا نار عالناس عشان الناس كانت بتهاجمهم كلام طبعا ميدخلش العقل
الراجل الى اتصل الى رتبته رائد تقريبا وقعد يتكلم كلام كأن سرور ولا مبارك الى بيتكلموا..مش عايزين يتعلموا خلاص لا تتكلم كلام يساعد لا تخرس وترحمنا من الكلام المستفز دا..
الاخ رئيس اكاديميه الشرطه السابق اتصل وعامل نفسه من الامم المتحده وعمال يقول ازاى نصلح الشرطه..امال كان بينيل ايه لما كان رئيس الكليه ؟؟ اى هبل بيتقال والله..
كلام المحامى كان جميل واتمنى يكون عنده ادله فعلا ويساعد فى التحقيقات مع العالم دى..
من الاخر كل الكلام دا زى قلته لازم اعتذااااااااار رسمى من العالم دى وقبل كدا لازم يتقال اسم وعقوبه اى واحد منهم قتل وضرب ونهب وسرق واشترك فى مؤامرات الحزب الوثنى وبعد كدا يورونا فى الواقع هيتعاملوا مع الناس ازاى ويسيبوا الناس تحكم...
غير كدا كله كلام فى الهوا وهيعبوا كراهيه زياده ليهم

1111111111111111111111

**Rerii** · 16-02-2011 06:24 PM

المشاركة الأصلية كتبت بواسطة ahmedkoko

بصراحه هعامله بقرف....هخليه يحس اني قرفان منه و دي حقيقه و الله مش يمكن هو يكون قتل واحد قبل كده او حتي عذب حد.
انا بقيت بقرف منهم بصراحه.:h_angry[1]:

بصراحة انا كمان بقيت بقرف منهم وبكرهم على الرغم انى اسمع ان فيهم قلة محترمة بصراحة سمعت كده بس عمرى ماشفت كده

**FunnyMickey** · 16-02-2011 06:30 PM

والله انا ببقي في العربيه
واقف في الاشاره
يبقي الامين بيستجدي الضحكه من الناس اللي في العربيات ولا حد معبرهم
خصوصا
تاني يوم التنحي
والناس كلها عماله تشاور لعساكر وظباط الجيش بالعلم وعلامه النصر
وهما واقفين في الاشارات عاوزين يعملوا نفسهم فرحانين مع الناس والناس ولا معبراهم

الوحيد اللي نفسي اشوفه
الامين الي بيقف في اشاره العباسيه
تحت الكوبري بالظبط

الراجل ده قمه في الاحترام
ولو بايدي كنت مسكته الامن المركزي كله
عشان يعلم الوحوش دول
معني كلمه الابتسامه في وش المواطن

طول الوقت ابتسامته علي وشه
وبجد من ساعه المظاهرات مشفتوش
مش عارف راح فين

الراجل ده باجماع كل اللي اعرفهم واسألهم عليه
من اهلي وقرايبي اللي بيعدوا من المنطقه دي
ان الراجل ده محدش شافه مكشر ابدا
ولما حد بيرتكب مخالفه
بيوقفه
ولو يقدر مثلا يخليه يرجع من العكسي بيرجعه
مش يطلع الدفتر ويدب مخالفات
وبشوف ناس كتير في الاشارات كانت تقعد تهزر معاه

ربنا يرجعه بالسلامه يارب هوا واللي زيه وياخدوا حقوقهم

**nevozaky** · 16-02-2011 06:32 PM

المشاركة الأصلية كتبت بواسطة heshamzaky

بص يا باشا أنا ماليش أحتكاك مباشر بيهم . بس الى بشوفة فى الشارع بجد الناس مش طايقاهم و بصراحة من كتر الظلم الى عملوة بعضهم فعلا يستاهل الضرب ب القديمة ههههههههه . الناس دلوقتى بتتحرش بالشرطة و بتوع الشرطة عاملين طرش مش بيسمعو . احنا لا ننكر أن بعض القطاعات من الشرطة هامة جدا يعنى لو واحد قتل واحد مين الى حا يمسكة و مين الى حا يظبط البلطجية و الخارجين عن القانون و تجار المخدرات طبعا الشرطة بس للأسف رصيدهم بقى صفر و الناس كارهاهم جدا جدا جدا . أنا كنت معدى أمام قسم الزيتون الى اتحرق القسم عبارة عن مبنى مهجور بيتصلح دلوقتى و مفيش فية نفر واحد كلة مستخبى و الى كان ماشى يتقمع ب البدلة الميرى تلاقية لابس جاكيت علشان يدارى النجوم الى كان لابسها . هو لازم يرجعو بس لازم يرجعو بمفهوم جديد و لعلمك 90 بالمائة من الظباط مش حا يكون عاجبهم دة لانهم حا يشعرو أن خلاص ما بقاش فية هيبة ليهم و لا سلطة و دة مجننهم و طبعا مش حا يفصحو عن ذلك . هما يرجعو بس لازم يتغير المفهوم الى أتحفر فى ذاكرتهم عن طبيعة عملهم و يبطلو الحركات الزبالة بتاعتهم بس دة صعب بالنسبة لهم . الوضع صعب شوية لان الناس طهقت منهم و بكرة تسمع أن ظابط أحتك بمواطن و تسمع أن الناس مسكتة و علقتة من رجلية فى الشارع و مليون واحد حا يجامل و يطحن فية فعلا المشكلة دلوقتى فعلا هو أن الشعب بقى رافض شكل الشرطة بس بصراحة الشرطة هية الى زرعت دة و دلوقتى بيحصدو ثمن غلطتهم . مش عارف الحل أية بس المهم هو قصقصة ريشهم علشان ما يتجرموش مرة اخرى و الناس حا تتقبلهم ساعتها

كلام حضرتك صح جدا وهما يستاهلوا اكتر من كده بس ممكن تقول لى دلوقت لو حصل اى حاجة لاى حد فى الشارع او اى مشكلة او جريمة .بالمنظر ده الجاْ لمين فى ظل الظروف اللى فى البلد دلوقتى .الميكروباصات بتخبط العربيات اللى راكنة وتطلع تجرى وساعات يخبطها عن عمد .طيب الحل ايه؟