الموضوع: حد شاف العاشرة مساء مع الضباط ( رأيكم ايه )

طبعا اسلوب الكلام بتاع يضربوا بالجزم
مينفعش الواحد يرد اصلا

فعلا عشان ضرب الجزم لا يرتقى لجرايمهم همه يستحقوا القتل عينا بعين وسنا بسن

بس كمان لما تقول معندهومش دين ولا ثقافة ده على الجميع ولا على اللى كانوا فى الحلقة ولا ايه بالضبط

على الجميع يا فندم الا من رحم ربى

يعنى محدش فيكو له اخ او قريب ضابط ؟اكيد لأ واضح ان الكلام يا اما انفعالى بسبب الشهداء وطبعا اللى حصل لهم ميرضيش اى حد يا اما الكلام من السمع عن ضباط وحشين اللى مبنكرش انهم موجودين او لموقف شخصى مع ضابط او امين ادى للتعميم على جميع الضباط

عندنا قرايب ظباط يا فندم بس لو حد فيهم مجرم بالشكل ده يبقى ماتلزمنيش معرفته ويحاسب زى مابيقول ربنا والقانون ولا مطلوب مننا نتوسطلهم ونبرر مواقفهم الغير مبرره باى كتاب او شرع او حتى قانون وبعدين الموقف الشخصى اللى حضرتك بتتكلمى عليه ده بيحصل كل يوم ومع كل اللى مايعرفش فلان ولا علان

اولا خللى بالكو ان اى حد فى المنتدى هنا ممكن يكون والده او قريبه ضابط وان فعلا فى ضباط اتدبحت وولعوا فيها
مش اكيد ان اللى اتعمل فيهم كده بسبب ظلمهم زى ما بيتقال

لا يا فندم كل اللى اتولع فيه كان بسبب ظلمه وشوفى الفيديوهات على اليوتيوب واسمعى كلام الناس هاتلاقيهم كانوا بيروحوا قدام القسم ويطلبوا شخص باسمه وبعينه

يعنى ببساطة ابن خالى ضابط لسه متخرج ملحقش يعمل حاجة فى حد وراح الأمن المركزى فى شرم الشيخ كان قاعد جوه المعسكر اتضرب عليه نار و2 زمايله اتقتلوا
لو حد فيكو مكان امهم كان هيتكلم كده

مع احترامى لابن خاللك لكن الحسنه تخص والسيئه تعم ونصيبه يتخرج فى اليومين دول
وبعدين قبل ماتحطى حد فينا مكان امهم
حطى نفسك انتى مكان مئات ان ماكانش الاف الامهات اللى اولادهم اتعذبوا قدام عنيهم وهمه اتهانوا قدام ولادهم ومنهم اللى اتقتل واللى قلب امه محروق عليه ولا تعرف عنه حاجه من سنين ومن غير ذنب وان كان ليه ذنب فهو انه ربى دقنه تشبها برسول الله ونزوله الجامع للصلاه فى اوقاتها ابتغاء مرضاة الله

هتقولوا والشهداء الشهداء على عينى وراسى بس مننساش ان فى ضباط كتيييير كويسين ومبيعملوش اى حاجة من التهم دى

المفروض ان دى تبقى حجه عشان نسامحهم على اللى اتعمل فى الشباب العزل المحترمين ايام الثوره وما بعدها

ممكن تقولى ان مش حيادية
بس الحقيقة انى اعرف ضباط شرطة رجالة بجد
خالى مثلا ضابط والناس كلها بتحبه
يعنى بعد ما ساب المرور بأكتر من عشر سنين كان سواقين التاكسى بيتكلموا عليه بالخير والحب واحنا راكبين من غير ما يعرفوا اننا قرايبه طبعا
كل جيرانه بيحبوه ولما بيحصل حاجة مش فى تخصصه بيطلبوا منه
مثال للرجل كما يجب ان يكون فى بيته وفى شغله عنده دين وثقافة والكلام من ناس كتير مش منى

ماختلفناش يا فندم والناس اللى زى كده محدش اذاهم وكان اولاد المنطقه بيحموهم كمان
وكونه بيعمل للناس خدمات مش فى تخصصه فده عيب كبيييييييييير لان ده اعتراف ضمنى من حضرته بالواسطه حتى لو كانت بالخير لان المفروض كل واحد ياخد حقه القانون لا زياده ولا اقل

كتير شفت ولاده وهم محتاجينه ومش لاقيينه لأنه ورا تاجر مخدرات فى الجبل نايم عالطين فى عشة قش والدنيا بتشتى والديابة بتعوى حواليه
كتير كان سهران بيحرس وشفت رجليه رغم البوت الطويل اللى لابسه عشان يحمى نفسه من الناموس رجليه متشرحة من الناموس طول الليل
كتير حياته اتعرضت للخطر لا حد حس بيه ولا قاله شكرا

مع احترامى لكل اللى عاناه فى عمله ولكن دى طبيعة عمله وهو اللى اختار العمل كشرطى ولا شكر على وااااااااااجب

بنته اتهددت بالخطف بسبب وظيفته وغير ده كتير
خالى وابن خالى مسابوش مواقعهم
كمان اجواز صاحباتى مسابوش مواقعهم وهنا فىالمنصورة الضباط كانو فى الأقسام ومسابوش مواقعهم

من كتر اللى كان الظباط الفاسدين بيعملوه من ظلم حتى على البلطجيه خلوهم اتجرأو وهددوهم فى بيوتهم عشان رفعوا ظلمهم عنهم لانهم كانوا بيحاكموهم بطريقتهم اللى قبل الموضوع مايوصل لمحاكم وده ذنب شاله الناس المحترمه اللى زى خالك وبقى التهديد عينى عينك وعلى فكره مش خالك هو الوحيد تقريبا مفيش ضابط شرطه يحتك بطبيعة عمله مع مواطنين الا واتهدد

كون فى ضباط لقوا الاف جايين عليهم عايزين يفتكوا بيهم فى نفس الوقت اللى مش عايزين يضربوا عليهم من اسلحتهم فمشيوا وسابوهم متهيألى ناس منكو كانوا هيعملوا كده قولوا لى كنتوا هتعملوا ايه هتقفوا لالف يضربوكوا ويخلصوا عليكم هى دى المرجلة

الراجل بجد زى مابتقولى حضرتك مايسيبش واجبه ويهرب وان حد هرب فمايبقاش ضابط ومثال الضابط الراجل مدير السجن اللى اتقتل عشان رفض يسيب موقعه ويسيب المساجين يهربوا يعنى من الاخر كده الرجاله ماتت فى الحرب
هروب ضابط الشرطه يعنى انهيار البلد داخليا امنيا واقتصاديا عشان محدش هايحط فلوسه فى مكان غير امن لا مصرى ولا خواجه
وهروب ضابط جيش يعنى ضياع الارض والعرض والمال والنفس
لما ضابط الشرطه يخااااااااااف من اهله يبقى ده معناه اييييييييييه اكيد لانه عارف انه ياما عمل بلاوى
وضابط الشرطه اللى يهرب ويرمى حمل البلد امنيا على زميلى ضابط الجيش اللى بقى بيحمى بره وجوه ده يبقى اسمه ايه
بالعربى كده وعلى رأى عفروتو اللى بيخااااااااااااااف يطلع بره
اما ضابط الشرطه يخاف امال انا المدنى اعمل اييييييييييييييييه

كل ده اتنسى دلوقتى!
كان عمرهم ما عملوا حاجة عدلة !
اللى غلط يتعاقب لكن الباقيين لازم يتاخدوا بذنبهم !
لو كنت ابنك ضابط ومربيه كويس تحب يتقال عليه كده

مانسيناش حاجه بس كتر القسى يعلم البكا
همه فعلا عمرهم ماعملوا حاجه عدله
تقدرى حضرتك فى الوقت ده والظروف دى تفرقى بين الوحش والكويس !!!!
انا لو مربى ابنى كويس ماكنش دخل كليى الشرطه بوضعها ده من اساسه واعرف ناس رفضت تدخل اولادها كلية الشرطه وفضلوا عنها الجيش ده ان كان الولد مصر على عمل عسكرى واعرف ناس الفاشل فى اولادهم حلقوله شعره وعقابا ليه جابوله واسطه ودخل كلية الشرطه

المنظومة كلها محتاجة تصليح دى حقيقة بس اكيد شتمهم وقلة الأدب عليهم مش دى الطريقة المناسبة

واما كان حتت عيل بيشتم واحده ست مخلفه ارجل واحسن منه ولا واحد فى سن جده ومربى دكاتره ومهندسين كانت طريقة مناسبه !!!!
بتبصى للطريقة المناسبه لمعاملة ظالم بعد الثوره عليه وفى ايام ومش بتبصى لطريقة معاملته للشعب اللى همه انا وانتى واخواتنا واهالينا لسنين

عجبى !

يعنى ايه علاقة الداخلية بالصحة مفروض الضباط يتجوزوا مهن معينة يعنى واذا كان حضرتك شفتى ضباط كتير بيعاملوا مراتتهم وحش وعندهم عنجهية انا برضه شفت ضباط كتير بيعاملوا مراتهم بطريقة كل بنت فى الدنيا تتمنى تتعامل بيها
وبعدين اللى اتغير اه بتحصل لأن فى الكلية بيقابل ناس بتبوظه زى اى مكان تانى واسمحى لى ده اما عيب فى الأسس االى اتربى عليها لأنها لو متينة مكنش يتحول لشخص تانى وحتى لو اتحول وكنتى عارافاه كويس زمان اكيد الخير اللى جواه هيغلب فى الآخر او اختلاط بالبايظين طبعا زى التفاحة الفاسدة بتأثر

وبعدين ممكن نقول يشوفوا حل ويصلحوا الموضوع ده لأن فعلا ابن خالى برضه اتغير شوية لما دخل الكلية
بس على فكرة كان جايب مجموع كبير وطول عمره شاطر وباباه كان رافض تماما يدخل شرطة عشان العذاب اللى هو شافه فيها بس هو اصر
وبعدين انا كمان اتقدم لى ضباط مشفتش فيهم غرور ولا حاجة يعنى الضباط اللى قابلتهم فى حياتى برضه عدد مش قليل واذا كان شىء غريب بس دى الحقيقة مقابلنيش حد وحش بس عارفة ان في منهم وحشين وعلى اعلى مستوى من الوحاشة يعنى
انا بدافع عن الكويسين اللى منهم ماتوا عشان يحموكى الفشلة والأغبيا دول اللى شفتى البلطجية عملوا فينا ايه عشان هم مكنوش موجودين
مفروض نقعد نشتم فيهم هو ده بقى الحل

وبعدين ايه يعنى لما يكون جايب مجموع قليل فى ثانوية عامة ده دليل على الغباء هو نظام التعليم اللى فى بلدنا ده حد قال عليه كلمة عدلة والولاد بطبعهم لعبيين شوية واعرف ناس كانوا معايا فى الدروس وكانوا عباقرة مش اذكيا بس لعبوا فى ثانوى وضيعوا نفسهم

هو الصح بقى اننا نجمع ونطلق حكم على جمييييييييييييييع الضباط وكأنهم معملوش لينا حاجة ابدا خلاص ارفدوهم كلهم واقعدوا فىالشوارع طول الليل 5 سنين بالسلاح سيبوا اشغالكو ودراستكو وامسكوا انتو الأداب والأموال العامة والمخدرات ومترو الأنفاق والسجون والأقسام واتعاملوا مع المجرمين لحد ما يتخرج ضباط جداد على نظام تعليم مختلف لأن بصراحة انا لو مكانهم مش عارفة هدافع عن ناس بيتفوا عليا ازاى ومفروض اموت عشان انقذهم من تاجر مخدرات وخلافه

اولا الحلقة مش مقياس لأى حاجة لأن ال 2 اللى جم فيها مينفعش نعتبرهم ممثلين عن الداخلية
ثانيا اللى الأستاذ gemy1بيقوله دليل على كلامى انه بنى رأيه على ضابط يعرفه مش كويس
ثالثا mooody اسلوبك فى الحوار غير مقبول
انت عايز منفرقش دلوقتى خلاص لأن الوحشين كتير ويستحقوا القتل منفرقش بقى والللى عمل حاجة كويسة نمسحها بأستيكة يللا

واحب اوضح ان مش فى تخصصه دى انت فهمتها غلط خالص انا اقصد مثلا كان فى قضية اداب فى الشارع بتاعه هم راحوا بلغوه هو وهو اللى وصلها لزمايله فى بوليس الأداب مش قصدى انه بيعمل واسطة انت عايز تفهم الكلام بالطريقة اللى تطلعه غلطان بأى شكل وخلاص

وبرضه بنته اتهددت ده كان زمان مش دلوقتى اتهددت عشان شايف شغله صح مش عشان بيفترى عالبلطجية

والمواقف الشخصية اللى حضرتك بتقول حصلت للناس كلها غريبة امال محصلتش ل 80 حد اعرفه ليه ولناس هنا فى المنتدى محصلهاش موقف سىء مع ضابط
وبعدين انت محول كلامى انى بتوسط للى قتلوا الشهدا وانت فاهم كويس جدا ان كررت 100 مرة ان مش دول اللى بتكلم عليهم وخللى بالك اللى قتلوا قناصة فى المعظم ودول مختلفين عن باقى قطاعات الشرطة
انت بتقول كل اللى اتقتلوا عشان ظلمة كأنك عملت احصائية واتاكدت مع انك راجع تقول البطران اتقتل عشان راجل بجد كلامك بيناقض بعضه
وانا مقتنعة ان مش من الرجولة انى اكون مع 3 زمايلى فى القسم ويهجم عليه 20000 وافتح صدرى ليهم اسلمهم السلاح يعنى لأ امال امنعهم ياخدوه ازاى وتقوللى حد يخاف من اهله اهو اللى مخافش من اهله مات محروق او مدبوح او اترمى من سطح القسم ده حتى مفروض لا تلقوا بأيديكم الى التهلكة
وحكاية لو ابنى متربى كويس مدخلوش شرطة دى اسمها سلبية بالعكس لو متربى كويس يدخل عشان يخدم بلده والا انت كده بتقول منسمحش غير للوحشين بس اللى يدخلوا وبعد كده نشتكى

وبتقول عمرهم ما عملوا حاجة حلوة ده نكران للحقائق هات جرايد كام سنة فاتوا وشوف شهداء الشرطة وماتوا ليه
بتقول ده واجبهم ولا شكر عليه واذا كان واجبى انى اموت عشان انت تعيش فى امان يبقى ده جزائى فى الآخر والسيئة تعم
يعنى مثلا لو ضابط اتقتل عشان بينقذ بنت من الأغتصاب وكلنا شفنا خطيبته فى التلفزيون ده ربنا هيقول له انت مش شهيد اصل دى شغلتك ! ايه التفكير العجيب ده
ومجرد انى اخش كلية عارف انى لما اتخرج شغلى بيقول انى معرض اموت كل يوم
ده مبيدلش ان فى كتير منهم جواهم انه عايز يخدم بلده
لأ وفى الآخر لما يتصاب برصاصة تشله هنقوله لا شكر على واااجب