الموضوع: جـولـيـت ولا ابـيـزا 2002

ملاحظة مهمة جدا

الأخوة الأفاضل المؤيدين للسيات الأبيزا بالصدفة و أنا أقرأ تعليقاتهم لفت أنتباهي موديلات العربيات الخاصة بهم بي ام دبليو 325 و الفاروميو 156 2000 سي سي سلسبيد و فيات برافو تربو

العربيات دي كلها أوروبي و راكب العربية الأوروبي مستحيل تقنعه بعربية كوري أو ياباني و عشان حضرتك تعرف مين بيخاطبك دي شوية معلومات بسيطة

بي أم دبليو 325 موتورها 2500 سي سي و أي كان موديلها تكلفة صينتها عالية و اللي بيركبها هاوي ميفرقش معاه مصروف

الفارميو 2000 سي سي سلسبيد موتوها 2000 سي سي ( نادرة في مصر ) بيركبها هاوي مش أي حد و ده مش عشان تكلفة صيانتها عالية بس لكن لأن أماكن محدودة اللي ممكن تعملك صيانة بالأضافة لندرة قطع الغيار خاصة مع الموتور 2000 سي سي لأنه منزلش من الموديل ده كتير و معظم الموجود 1600 سي سي مانيوال و نادر برضه أصلا و بالنسبة لكلمة سلسبيد دي تسمية فيتيس العربية لأنه كان من أجيال الستبترونيك الأولي و مشابه للنظام المستعمل في عربيات الفيراري بس بتكلفة أقل طبعا
مع ملاحظة انسحاب الفاروميو الكامل من مصر منذ فترة كبيرة

و طبعا البرافو التوربو غنية عن التعريف و ده مع احترامي لوكيل فيات الحالي اللي شايفه مش مدي فيات حقها برضه و معظم اللي مستورده مش ايطالي فيما عدا عربية ولا اتنين البرافو تربو واحدة منهم و احب افكر الجميع بان البرافو الموديلات القديمة لم تحقق أي انتشار و قطع غيارها مقتصرة علي كام مكان و سعرها اقل من الدايو مش لقلة جودتها لكن لقلة الفاهمين لجودتها

من الأخر كلامي ده لا يحمل أي قدر من الأساءة ( لاقدر الله ) لأصحاب العربيات دي لأني شخصيا اعشق تلك الموديلات لكني لست مقتنع بتكلفة ركوبها في مصر ( رأيي الشخصي ) مع ملاحظة امتلاك اسرتي لعربية جيتا 2008 خليجي و عربيتين نيسان صني 2009 و رينو لوجان 2009 ( روماني و ليس مغربي ) و دايو نوبيرا 2001 و بيجو 504 ( و كمان 505 بعتها و جبت النوبيرا 2001 ) و كان مع قريبي فولكس بوينتر 1000 سي سي قرفتنا كلنا في عيشتنا ( لا اداء من موتور و لا تكييف و لا توافر لقطع غيار )

لكن لأني عاوز افرق بين راكب العربية الهاوي اللي عنده استعداد يصرف علي عربيته ( المميزة ) حتي لو كان تفرده بموديل نادر يقابله تكلفة صيانة مرتفعة

و بين راكب العربية العادي ( انا منهم ) و اللي بيشوف تكاليف ركوب السيارة كجزء مستقطع من دخله و يمكن عنده حاجة اهم من العربية يصرف عليها ما دام راكب عربية بتحقق الحد الأدني لتطلباته ( اعتمادية , كماليات ) عربيتي الشخصية صني 2009 زي الفل

و تحفظي الكامل علي موضوع تسقيط المواتير اللي انت مش عارف اللي عمله عمل ايه في الضفيرة ولا خرب ايه عشان يركبه و كمان البي ام دبليو مثلا 316 موتورها 1600 سي سي مينفعش اسقط فيها موتور 325 2500 سي سي لأن فيه تكلفة للشاسيه و عفشة العربية و نظام الفرامل و التبريد بتزيد بزيادة حجم الموتور و بالتالي العربية بتنزل مجهزة بعفشة و شاسيه و نظام فرامل يتحمل الموتور اللي فيها مش اكبر ( مثلا ديسكات الفرامل بتاعة العربية 1600 اقل في الحجم من بتاعة 2000 ) و واحد من اللي سقطو موتور غلط كان نتيجته من كام سنة عربية بي ام دبليو عملت حادث مروع بسبب تغيير الموتور من 1600 لموتور 2800 سي سي ( فيه ناس غاوية و عارفين بيعملو ايه و حيغيرو ايه القصة مش الموتور بس )
و زي البولو ال1000 سي سي الي بيسقطو فيها 1400 سي سي اتوماتيك

هات العربية زي ما خرجت من مصنعها الأصلي
و هات الجوليت لأن تكلفة تشغيلها مش مبالغ فيها و سهلة و كمان تتباع وقت ما تحب

اسف للاطالة و ياريت محدش يتضايق من كلامي