الموضوع: أهمية أراء ملاك الشيفروليه اللانوس 2011

المشاركة الأصلية كتبت بواسطة mmamdouh

على فكرة الموضوع مش بالصعوبة دى خالص...

المحافظة على العربية له 3 عناصر:

جدول الصيانة... و دة موجود فى كتالوج العربية و موجود هنا فى المنتدى و لو سالت اى حد من الاعضاء حيقولك كل قطعة بتتغير عند كام كيلو

قطعة الغيار الاصلية... و دى و الحمد لله متوفرة و بسعر مناسب... و بالنسبة لقصة المضروب فا دى حلها تشترى من محل ثقة و مضمون و برضة دة معروف للاعضاء هنا

الفنى اللى بيقوم بالخدمة... و برضة اسماء الناس الكويسة اصحاب الخبرة و الفهم معروفة للزملاء

اللى بيواجة مشاكل فى عربيتة باستمرار بيكون اما نتيجة عدم اتباع تعليمات جدول الصيانة بالتالى قطع كتير بتتجاوز عمرها الافتراضى و تاثر بشدة على اداء العربية او تسبب تلف مكونات اخرى فى سكتها... دة بيحصل نتيجة "الفهلوة" من بعض الناس اللى بتعتبر ان القطعة "كويسة و شغالة" بالرغم من انها تجاوزت مدة خدمتها لمجرد ان "شكلها كويس" او "مش عاملة مشكلة"

او نتيجة شراء قطع غيار مجهولة المصدر سعيا وراء التوفير او شراء قطع غيار استيراد فى حاجات مينفعش فيها استيراد (طلمبات البنزين و البوبينة و الطنابير الخ الخ)

او نتيجة صيانة العربية عند واحد كفتجى بيعجن اى حاجة و السلام و الحاجة اللى يصلحها اما تبوظ تانى او يلف جمبها حاجتين تلاتة و غالبا برضة المشكلة دى بتحصل نتيجة محاولة التوفير فى مصاريف الصيانة

للوهلة الاولى حتحس ان صيانة العربية بالطريقة دى مكلفة جدا... لكن هى فى الحقيقة رخيصة جدا... لان الحاجة بتشتريها مرة واحدة و بتغيرها مرة واحدة و مبتجيش جنبها الا فلا الصيانة التالية... انما لو جبت قطعة غيار تعبانة حيبقى اكنك رميت فلوسك على الارض و حتروح برضة تجيب الاصلى فى الاخر... و يا سلام لو اللى بيركبلك القطعة دى واحد بطيخة... حيخربلك الدنيا و تلاقى نفسك عايز تصلح حاجة تانية و لما تصلحها تكون القطعة التعبانة تلفت و عايز تغيرها تانى...

و هنا ممكن واحد يفكر يجيب القطعة استيراد طالما هى بتبوظ كتير فا يجيب بوبينة او طلمبة استيراد تشتغل شهر ولا اتنين و تتوفى و تلاقى اشاعة ان "قطع غيار الكورى غير معمرة" و الكلام اللى بالك فيه لمجرد ان اللى بيشترى عايز يوفر تمن القطعة الاصلية فا اشتراها 4 او 5 مرات و كل مرة بيدفع مصنعية جديدة للميكانيكى او بيجرب ميكانيكى شكل مع كل تغيير

هنا صاحب العربية بيزهق من العربية و يبقى عايز يخلص منها... مع ان دى مش مشكلة العربية خالص... العربية زى ما بتحافظ عليها بتحافظ عليك... حتسترخص فى قطعة الغيار او تروح لميكانيكى نص لبة انت اللى حتتعك فى المشاكل

طبعا كل دة بينطبق على العربية الزيرو... اللى شارى مستعمل و مكنش موفق فى اختيارة و كان من نصيبة عربية مهملة (بيطلق عليها كنبة) حيفضل برضة فى الدوامة دى لان العربية بتبقى خرابة... هو مش مستحيل انها ترجع عربية محترمة بس دة حيصرف فلوس كتير ووقت كتير... و برضة دى مش مشكلة العربية

من الاخر لو عربيتك زيرو و مشيت على جدول الصيانة كما ينبغى و جبت قطع الغيار الاصلية و اتعاملت مع ميكانيكى خبرة و محترم العربية حتعيش معاك سنين و سنين و حتريحك على الاخر.... و لو شاريها مستعملة بس حالتها نضيفة و "بيتى" زى ما بيقولوا و عملت كدة حتوصل لنفس النتيجة... اى حاجة غير كدة معاك ربنا

mmamdouh

الله ينور عليك يا محمد
ويزيدك من علم الله

طيب عايزين النتيجة النهائية ؟ العربية ناجحة ولا فاشلة ولا وسط والاسباب

اولاً :- السلام عليكم.
ثانياً :- الفرق بين العربيتين واضح جداً وهو ان العربية الانوس عربية كوري تقفيل مصري والسيارة الكوري مهما كانت كويسة وعالية فهي ليست بكفائة الأوروبي . وعلي فكره انا معايا لانوس2 ( 2008 ) وكنت معايا رينو 18 موديل 1982 إستيشن وكانت قطع الغيار غاليه شويه مقارنه بقطع الغيار في العربيات الكوري وليس الياباني مثلاً بس كانت بتستحمل جدااااااً الشوارع المصريه معلش أصلها ملعاش بخت في مصر
اما الرينو فهي عربية مكوناتها اوروبية ( رومانيه ) تقفيل مغربي واما بالنسبه لقطع الغيار فأسعارها مثل قطع غيار الرينوه القديم شويه وليست متغيره بإستمرار ونادر ما تكون منها قطع غيار صيني إلا بالنسبة للسيارات القديمة ومش من عند الوكيل.
ثالثاً :- انصح كل شخص يفكر في شراء شياره ان يتأكد أولاً من الوكيل والصيانه والمتابعه بالوكيل مع العلم بانني ألتزم بعمل الصيانه بالتوكيل وذلك لأسباب ان الميكانيكي المصري او الصنايعي لايفقه شيء في تكنولوجيا السياره ويخدها بالدراع والعافيه وعن تجربه مش معايا بس مع اشخاص آخرون أعرفهم .
رابعاً :- إذا كان اي حد يريد شراء قطع غيار أرجو ان يقوم بالشراء من الموزع المعتمد للوكيل أو الوكيل لانه يضمن القطعه التي تركب بالسياره. اه اسف طولت عليكم شويه ....
علي فكره انا معايا اللانوس 2 وحصل لي حادث صغير في الرافرف الامامي شمال عند الفانوس قمت بفك الفانوس وعدلت التطبيقة الي حصلت لجوه بيدي ولكم ان تتخيلوا ضعف الرفارف والصاج الخ ونفسي اجيب الرينو علشان انا اتعوت علي ركوب الاوروبي محترم جداً ومن غير زعل كفايه عفشتها وسمك الصاج وقوة الشاسيه ولحماته .

اللوجان عربية محترمة جداااااو ناعمة جداااا سواء فى الموتور او العفشة و عالية عن الأرض و وااااااااااسعة بشكل رهيب و الشنطة ينام فيها فيل و ثباتها رااااااااائع و سحبها فوق الممتاز انا جبت بيها 100 على التالت و 150 على الرابع و 180 على الخامس و كانت ثابتة و فى هدوء تام و لم تتجاوز 5 rbm و تكيفها ثلاجة و كمليتها رااااااااااااااائعة و توكيلها محترم للغاية و بيحلوا اى مشكلة فى العربية الحمد لله و مستوى الأمان فيها عالى اللوجان حاصلة على 3 نجوم من 5 نجوم فى اختبار السلامة الأوروبى و المواد الداخلية للصالون و التابلوه محترمة جدااااا و تقفيلها محترم ...
العربية مكوناتها فرنساوى 100 % تقفيل مصنع رينو ( صوماكا بالدار البيضاء بالمغرب )
و الدليل على انها رااااااااااائعة انها انتشرت الأنتشار الرهيب و اكتسحت السوق خلال سنتين فقط و الناس كلها شكرت فيها بحمد الله تعالى و بعدين رينو مش هتنزل عربية غير و هى واثقة انها تحقق نجاح و متبوظش شمعتها و بالفعل العربية محققة نجاح باهر ما شاء الله ....
اما بخصوص قطع الغيار فى التوكيل تعتبر رخيصة لأنها فرنساوى و واردة من فرنسا و عليها ضمان لمدة عام و من قلب التوكيل نفسه .....
و بعدين حضرتك هتريح دماغك لمدة 3 سنوات او 100 الف كيلو متر خلال فترة الضمان و بعد كدة هتلاقى قطع غيارها منتشرة و مرطرطة فى السوق ان شاء الله مع العلم ان العربية بسيطة و غير معقدة مثل باقى الرينو فبالتالى اى ميكانيكى هيعرف يشتغل فيها مع العلم ان السيارة بدأ بنزلها قطع غيار فى الأسكندرية ....
فى النهاية يكفينى فخرا و شرفا لما حد يسألنى راكب ايه اقوله رينو ...
توكل على الله و اشترى لوجان و عمرك مهتندم ان شاء الله و مع خالص تحياتى ليك يا باشا ...

الله ينور عليك

المشاركة الأصلية كتبت بواسطة ahmedeg1

ي باشا مش يمكن تكون عربيتك انتا بس اللى فيها مشكله
لأنى بصراحه شريها بقالها معايا سنه و شهرين تقريبا و مافيش اى مشكله تقريبا حصلتلى الحمد لله

أنا كمان بقالى سنة و 6 شهور و حاجات بسيطة اللى ممكن تطلع فيها
بس معظمها من التقفيل و السنتر
بس فى واحد سمكرى قالى ان العربية الدايو ﻻنوس أحسن كتير و هى تقفيل كورى و كمان صاج احسن