الموضوع: ازمة ضمير : ازاى رميت اختى ليهم ؟

المشاركة الأصلية كتبت بواسطة moustafa_saad

ايه ده كله

ده انا اختى ليها حق تتعقد من الجواز فعلا وتخاف منه
اتاريها كل عريس تيجى ترفضه بسبب الكلام المنتشر بين البنات ده
قاعده طول اليوم ادام منتدى فتكات وعماله تعيط واقولها مالك تيجيى حكيالى قصه من قصص تكدير الازواج لزوجاتهم اللى مكتوبه على المنتدى خليتنى احس ان الرجاله كلهم شياطين رغم ان انا كان ليا تجربه معكوسه وشوفت فيها الويل بس هو قدر ربنا والحمد لله والواحد مابيتعلمشى ببلاش وكويس انها جت على قد الخطوبه

خلى بالك انى مبحكيش غير قصص واقعية مش من حاجات قريتها اصلى عندى خاصية بعيد عنك (جاذبة الأسرار ) وممكن ناس اول مرة يشوفونى ولازم يثقوا فيا و يحكولى بلاويهم والمشكلة بعد كده بنبقى اصحاب اعمل ايه فى قلبى الرهيف : )
مشكلة ليه لأن طبعا حمل نفسى رهيب و فعلا تعقيد زى ما بتقول ده كوم واللى انا شفته بنفسى كوم تانى : ) بس انا مصرة ان فى رجالة كتير حلوين وجدعان مهما كانت الصورة مأساوية مش زى الناس هنا يحصل تجربة واحدة خلاص كل الستات وحشين : )

بس الخوف المرضى ده لازم تساعدها طبعا وانا واحدة صاحبتى كانت كده بس الحمد لله اتخطبت يوم الجمعة : ) ولسه مرعوبة بس ربنا يوفقها ان شاء الله وليها حق تترعب لما تبقى محاطة بالمطلقات والتعيسين فى حياتهم الزوجية بس فعلا مش كل حاجة بتتحكى تتصدق لازم تفلتر و قل لها مادام مانفصلوش يبقى فى حاجات حلوة بس محدش بيجى يحكى ويقول اما جوزى فسحنى امبارح حتة فسحة ولا جابلى هدية معروف ان الأنسان بيحكى الوحش بس يا اما خوف من الحسد يا اما لأنه فى حالة نفسية مخلياه محتاج الآخرين ومفيش مانع من اضافة بعض الشطة


والحمد لله انها جت على الخطوبة :b4_611:



تصدق دلوقت بدأت اندم على الصحوبيات دى لأن عملت خير ولقيت شر وبقيت انا بتاعة الهم فى ناس متفتكرنيش غير تحكى لى همها وساعة الفرح اعرف من بره : )

وطبعا العكس موجود فى واحدة من اللى قرروا يثقوا فيا دول كنا طالعين رحلة وبدات تحكى لى
البنت كانت كاتبة كتابها وبتحب واحد تانى متجوز : ( وحاولت معاها جامد بصراحة بس الأخ ده كان خادعها تمام ولما لقيت مفيش امل اضطريت ابعد عنها من باب هجر العاصى وعرفت بعد كده ان خطيبها طلقها
بس بعدين اتجوزت واحد كويس وعايشة سعيدة دلوقت


فالكويس والوحش موجود هنا وهنا

فعلا الميزة الوحيدة للموضوع ان بقى عندى خبرة اكبر من سنى ببتاع 10 -15 سنة بس دفعت تمنها برضه خدت مقالب كتير وزعلت كتير واتجرحت ووقفت جمب ناس ميستاهلوش (محدش بياكلها بالساهل)

وكان صعب احافظ على مشاعرى الطيبة و يفضل عندى امل ان فى ناس كويسة بس مضمنلكوش الموضوع ده مستمر لأمتى : )


وشكرا على حكاية العقل و الأتزان دى : ) بس ميمنعش شوية جنان احيانا ربنا ما يوريكم : )

ودايما بيبقى سهل الواحد يحكم على مشاكل غيره ويوجد لهم الحل كمان ما هو شايف الصورة كاملة من بره واللى ايده فى الماء مش زى اللى ايده فى النار - بس فى نفسه ممكن يبقى غلبان ويحتار فى مشاكله : )

لأ فى ميزة كمان
ان 90 % من الناس اللى عرفتهم فى مآسى حتى لو الأيام بعدتنا بشوفهم بعد كده ربنا عوضهم وكرمهم وده بيدى امل ان مهما الظروف كانت صعبة ربنا هيعوض


فى 2 اصحابى انفصلوا وشفت الألم النفسى اللى كانوا فيه وشفت الناس كانت بتعاملهم ازاى
واحدة اتجوزت ابن صديق والدها واكتشفوا انه مدمن وتخيلوا انتو بقى وبعد سنة انفصلوا والبنت بقى يغمى عليها بدون سبب من الحزن وبقى اللى يجيب لها عريس يجيبه فوق الخمسين او ظروف عجيبة ! وده كان بيألمها اكتر بعد حوالى سنة اتجوزت واحد ما شاء الله وخلفت وسعيدة دلوقتى فى حياتها




التانية طلعت ببنت و فات 3 سنين تقريبا ومحاكم وقضايا لأنه اتجوز وسافر ورافض يصرف على البنت فى الآخر ربنا هداه لبنته وهى كانت فقدت الأمل تعيش حياتها تانى خلاص ومن اسبوع كده اتجوزت واحد محترم وربنا يوفقها

المشاركة الأصلية كتبت بواسطة aif

اللي حصل ان الزوجة انتشلت الزوج من المستوى الاجتماعي المنخفض لأهله ......
الوضع الحالي ان الاولاد في مستوى تعليمي متميز جدا و مدارس لغات
الزوج انتقل نقلة نوعية رهيبة في عمله واصبح شخص متميز اجتماعيا في نطاق عمله وصداقاته وتعددت سفرياته لأمريكا واوربا

هم يدحك و هم يبكى
واضح ان الموضوع ده مش حيحصل عندى و ان بالبلدى كده العريس هو اللى بهت على العروسه
من ضمن العيوب السخيفه اللى فى الزوج ان احساسه بالوقت منعدم
يعنى اذكر مره اتصل بيا الساعه 1 باليل و كان الحوار كالاتى
بيقولى انه عمل حادثه و عربيه حبطته ... طيب انزل اخدك اوديك على المستشفى و لا حاجه ... لا ده انا عملت حادثه و روحت المستشفى و دلوقتى روحت ... امال بتتصل ليه يابنى .... حبيت اقولك بس

وفاكر يوم ماشاف العروسه اول مره خلص معايا الساعه 12 باليل و دخل سايبر جنب بيتي علشان يخلص فيه شويه حاجات ( انا ساكن فى عين شمس و هو منشيه ناصر)
اللى فهمته منه ان منشيه ناصر حته شعبيه و شغاله طول اليوم و بالتالى عادى لما واحده بنت تمشى فيها الساعه 2 او 3 من غير خوف ... و بالتبعيه هو عنده عادى لما يتصل بحد الساعه 1 بعد نص اليل زى ما الواحد بيتصل الساعه 10 باليل مثلا

الموقف بقى اللى حصل من شويه ... مره واحده لاقينا العروسه بتتصل بينا الساعه (11:30 باليل .. و طبعا صحت اطفالى من النوم ) و بتسأل مراتى عن شنطه السفر ...
ليه يا بنتى ... اصلى مسافره اسكندريه بكره الصبح
طيب استنى خالد يجيبهالك بكره الصبح و هو رايح الشغل ... لا انا و محمد نازلين دلوقنى و حنعدى عليكم ناخدها ... طبعا فضلت مستنيهم لغايه الساعه 12 و نص عقبال ماجولنا و انا عندى بكره شغل
الموقف ده و عدم الاحساس بالوقت عليه توقيع محمد الف فى الميه ..لأنها ماكنتشى كده و عمر ما العروسه عملت مواقف مشاببه قبل كده
و اللى ينرفز ان العروسه كلمت مراتى الناهرده بدرى شويه و ما جبتشى سيره عن السفر ده نهائى
اللى صعبان عليا انهم متجوزين بقالهم اسبوع بس ... امال بعد شهر مش حفرقها عن اهله بالاسلوب ده

المشاركة الأصلية كتبت بواسطة moustafa_saad

او تقريبا هى بتحبه فعلا فمش عاوزه تخالفه فى اى حاجه يقول عليها او تزعله منها وده الاحتمال الاغلب ومتزعلشى نفسك ان شاء الله يعيشوا متهنين مع بعض طالما بداء تفكيرهم وطباعهم تتوحد

هى بالظبط كده بس مع اختلاف انها مش بتحبه للدرجه دى
هى من النوع اللى عاوزة تعيش حياتها مع جوزها من غير وجع دماغ و جوزها طبيعه شخصيته عنيده عناد طفولى ... و بالتالى بتطيعه فى كل حاجه بدون نقاش
و بتبان الحكايه دى فى حجات صغيره
اذكر مثلا لما كانو بيوضبو الشقه فى الاواخر فكانو محتاجين لسلم ... فوالدها عنده سلم ( بيت والدها يبعد عن الشقه ب300 متر) فهى قالتله خلاص روح لبيت بابا و هات من عنده السلم .. هو قالها لا حأجره بعصبيه و كان والدها واقف معاهم اصلا ...و بالفعل اجر السلم و كلامه مشى بدون ادنى نقاش من ناحيتها

اللى مدايقنى دلوقتى انى ابتديت احس انها بدائت تنسلخ عن عيلتها بسببب الطاعه المطلقه لجوزها (المقصود بالطاعه المطلقه يعنى بدون نقاش حتى فى الحجات الغلط اجتماعيا من وجهه نظر اهلها )
لأن بالاسلوب ده هى سايبه دفة التعاملات الاجتماعيه تماما لجوزها ... و جوزها فاشل فى النقطه دى سواء لاسباب متعلقه بيه كشخص او متعلقه بيه كاسره
و بالتبعيه لو تخيلنا وضعهم بعد 5 سنين حنلاقى انعزالها هى و جوزها عن اسرتها فى مقابل اندماجها التام فى اسره العريس - بس فى وقت ما هى تدرك انها بعدت ( مش بشكل تصادمى - بشكل تدريجي ) عن اخواتها هل حتتقبل الوضع ده ؟؟ و انا اذكر انى مره كلمتها فى كلام اهبل العريس قاله لحماتى اثناء الخطوبه و حماتى اشتكتلى (ماكنتشى تعرف اننا متخانقين) فروحت انا و كلمت هاله علشان تفهمه (لأنى انا وهو متخانقين فماليش انى اكلمه ) فقولتلها فى وسط الكلام ( خدى بالك بالاسلوب ده انتى كده حتخسرى اهلك فى المستقبل واحد ورا التانى ) بالفعل حسيت بتأثر منها لما قولتلها كده
انا بقول كده لأن بالفعل هاله كانت اجدع اخواتها وهى اللى دائمة الاتصال بيهم و المفضله بين كل ازواج اخواتها و يصعب علينا كلنا اننا نبعد عنها بالشكل ده

ربما تحسو انى ببالغ او بقول الكلام ده على خلفية خلافى مع العريس ... بس علشان ااكد على كلامى اسمحولى اقول على موقفين حصلو لما روحنا نزورهم يوم الجمعه اللى فات ( السبوع بتاع العروسه زى مابيقولو )
فاول لما دخلنا لاقيت ام العريس (و اخوات ام العريس ) استلمو حماتى سلخ بعد ماسلمت عليها على طول (حرفيا) و بيقوللها - احنا زعلانين من بينتك ( يقصدو على مراتى انا )
- ليه ؟
- يرضيكي بنتك تطردنا من اوضه النوم ليلة الدخله !!!
الحكايه طلعت ان بعد الفرح و بعد ما العريس و العروسه طلعو الشقه مع الاهل (انا كنت قاعد فى العربيه لكن حماتى و مراتى طلعو )
لاقو اهل العريس (كلهم تقريبا ) فى الشقه !! و بيقلبو الشقه حته حته (عاداتهم )
فمراتى كانت موضبه الشقه اصلا قبل الفرح و فى وسط الزحمه دى دخلت تتمم على اللمسات الاخيره فى اوضه النوم و هى خارجه طفت النور وراها فى نفس الوقت اللى اخوات العريس كانو داخلين الاوضه - هى حلفتلى انها ماخدتشى بالها اصلا لأنها ماكنتشى متوقعه انهم اصلا حيدخلو اوضه النوم (اختلاف عادات الاسرتين ) ... و طبعا التانين افتكرو مراتى انها بتكرشهم من الاوضه بالزوق
برضه موقف تانى واحده من اخوات العريس ( المحجبات اللى قلعو الحجاب فى الفرح و ضاربينه اصفر و اكسجين ) بتقول لأختها انها حتدخل الحمام .. فبالصدفه عين مراتى جت في عنها .. فافتكرت ان مراتى "بتزغر لها" و برضه ام العريس اشتكت مراتى لحماتى فى الحركه دى - رغم ان مراتى ما اخدتشى بالها اصلا
موقف تالت (بايخ بقى ) ام العريس بتقول لحماتى .. - ازاى بتديلنا 3 فطاير بس( فطير العروسه زى مابيقولو فى الفلاحين ) .. انتى مش عارفه اننا كتير و 3 بس حيكفو مين و لا مين
ملحوظه حماتى عدت ال 65 و تعبانه صحيا و بتمشى بصعوبه دلوقتى و مش بعيد تتوفى فى اى لحظه
طبعا غير شويه مواقف تانيه كتيييييييييييير مافيش داعى لذكرها
طبعا اسلوب حماتى ( المعتاد ) انها اعتذرت عن كل الحجات دى ( و شغاله معلشى حقكو عليا ماكناش نقصد ) بس طبعا بتشيل فى نفسها سواد فوق السواد المنيل من ناحية اسرة العريس
واحنا مروحين فى العربيه حماتى بتقولى ( ربنا يكون فى عونك يا هاله .. و الله يا خالد ليك حق لما تبعد عنهم )

الملاحظ المهمه بقى : اننا فيما بعد عرفنا ان ام العريس قالت للعروسه الكام شكوى دول للعروسه (فى زياره سابقه) وهى اكدتلهم ان مراتى ماتقصدشى - بس ام العريس رجعت و قالتها تانى لحماتى

طبعا العريس ماقدرشى اقولك موقف شخصى ليه دلوقتى لأنه دلوقتى انه كشخص لسه بيتحسس خطواته داخل الاسرره الجديده اللى دخل عليها .. و بالتالى هو حريص حرص مبالغ على الاعتذار عن اى خطاء بيصدر او من اهله (لدرجه انه اتصل و اعتذرلى على كلمة "نصه" اللى قالها السواق بعد الفرح - و اللى عرفنا بعد كده ان السواق ده قريبهم ) .. بس انا متأكد ان حرصه ده مش حيدوم فتره طويله الكلام ده فى الاول و بس بسبب مواقف سابقه معايا

معلشى طولت فى الرد بس زى ما انتو عارفين .... انا بفضفض