الموضوع: ازمة ضمير : ازاى رميت اختى ليهم ؟

يا راجل حرام عليك

والمسكينه دي زنبها ايه----- دا انا اتخنقت من العريس واهله من كلامك ---- الله يسامحك


علي فكره انا عارف ان كله قسمه ونصيب ---- بس ربنا ادنا عقل والعمليه واضحه زي الشمس من كلامك دول شكلهم

عيله منيله بس ها اسالك سؤال انت كنت موضح ده كله للعروسه واهلها؟

المشاركة الأصلية كتبت بواسطة khaled_sabry

السلام عليكم و رحمة الله و بركاته
كالمعتاد انا مش بكتب حاجه فى المنتدى الاجتماعى الا لما ببقى مخنوق و عاوز افضفض
و اكتر حاجه خنقانى هو موضوع زواج اخت مراتى ... اللى كتبتلكم عن مشكله حصلت فى اوله من 5 اشهر تقريبا
http://www.nilemotors.net/nile/191743-a.html

وهو بأختصار انا متزوج زوجتى من 4 سنين و بكده كان فاضل ليها اخت واحده اكبر منى بسنتين (عندها 30 سنه) ما اتجوزتشى
اخت مراتى بعتبرها بجد زى اختى بسبب مواقفها المختلفه اللى بتثبت فيها جدعنتها مع الكل
وبناء عليه كنت بتمنى من ربنا ان يكون جوازها على ايدي
و بالفعل ربنا وفقنى و قدرت اوفق بينها و بين زميل ليا فى العمل بعد كم كبيييييييير من المشاكل و الخلافات بين العلتين ( العريس :والده نقاش و من منشأه ناصر و معظم عيلته صنايعيه و غير متعلمين رغم انه بكالوريوس علوم - و العروسه : والدها مدير قطاع فى الازهر و انا نفسى من عيله معظمها مهندسين و بعضها اساتذه فى الجامعه)
و امتدت الخلافات بيني و بين العريس نفسه حول بعض التفاصيل فى تعامله مع اهل العروسه
وهو بصراحه حاول الصلح اكتر من مره معايا بس انا اللى كنت برفض لغاية دلوقتى( بقالنا 4 او 5 اشهر تقريبا )
لأنى اكتشفت فيه بعض الصفات اللى كانت مخفيه عنى قبل كده
و ايضا لأنى ادركت حجم الفارق الاجتماعى بينه و بين العروسه .. و رغم ان العروسه نفسها متقبله العريس (من مبداء انها كبرت و ضل راجل ) لكن حماى و حماتى ماكنوش متقبلينه بسبب تصرفاته و تصرفات اهله و الفارق الاجتماعى

و رغم عن كده كنت بمدح و بدافعله قدام حماتى (مش حبا فيه لكن بسبب تقبل العروسه ليه) فى نفس الوقت اللى ماكناش بتكلم او نسلم على بعض فى الشغل
و فعلا كنت مع اهل العروسه خطوه بخطوه فى الجوازه دى من بدايتها من اول الاتفاق و انتهاءا بتوضيب الشقه نفسها و تركيب الكهرباء بنفسى
لدرجه ان يوم الدخله انا بنفسى روحت لغاية العتبه علشان اشترى الشمع قبل معاد الفرح بساعه

لغايه الفرح نفسه (يوم السبت اللى فات)... انا كنت عارف انهم مستوى اجتماعى متدنى بس لما شفت مستوى اهل العريس بعيني فعلا اتخنقت
و الفكره اللى كانت مسيطره عليا ازاى انا ارمى "اختى" للناس دول .. و بجد ضميرى كان بيؤلمنى جدا لدرجه انى كنت حبكى فى الفرح
و بجد تعمدت انى ما اسلمشى على العريس او العروسه رغم انى كنت السبب الرئيسى (بعد توفيق الله طبعا ) فى الجوازه دى
طبعا حصلت تفاصيل مخجله فى الفرح بتؤكد الهوه الاجتماعيه بين العلتين مافيش داعى انى اذكرها

حتى حدوث موقف سخيف فى الزفه بالعربيات و العروسه و العريس مروحين
سائق عربيه الزفاف كان قريب العريس و الظاهر ان مهنته سائق اساسا
فهو اصر على الرجوع من طريق ملتوى بدلا من الطريق المباشر
ففى وسط الزحمه اشكيت فى الطريق و حبيت اتأكد من ميكروباص جنبى عن الطريق اللى احنا فيه ... فلاحظ كده سائق عربيه الزفاف
فقالى "هو انتا مش عارف الطريق و لا ايه " رديت عليه " لا انا عارف بس بتأكد"
فرد عليا ب "شكلك كده مش عارف يا نصه " ولا قيت اخوات العريس اللى كانو قاعدين جنبه بيدحكو و حماتى اللى قاعده جنبى (اللى كانت ضاربه بوز من اول الفرح لأخره) هى كمان بتدحك على الكلمه دى
انا ماعجبتنيش كلمة "نصه" و اعتبرتها مهينه خاصه لما تيجي من واحد معرفهوش اصلا ... و طلعت امريكانى و و سبقته و و انا بسب و بالعن السواق و العريس و " الليله السوده دى " باحط و اقذر العبارات النابيه اللى اعرفها و كل ده و حماتى جنبى و مراتى ورا
و اكتشفت فيما بعد ان السواق نفسه ماكنشى عارف الطريق و بيستخف معايا
طبعا صالحت حماتى تانى يوم و هى تقبلت كده بسبب رصيدي اللى يكفى عندها (على رأى الجيش )
فعلا فى العادى انا مش بعمل كده و مش عارف ليه عملت كده .. و الموقف ماكنشى مستاهل بس فرغت فيه الشحنه اللى كانت عندى

بس فعلا العروسه صعبانه عليا
لأنها من النوع اللى بتحب الشياكه و الرقه و المستوى الاجتماعى الراقى .. و قبل كده رفضت عرسان كتييييييير بسبب كده .. و اللى اتجوزته ده بعيد كل البعد عن الكلام ده و هى رفضت عرسان افضل منه بكتير
فعلا انا لغايه دلوقتى حاسس بغصه كل ما افتكر الموضوع ده
و كل ما افتكر منظرها فى الفرح و هى واقفه جنب عرسيها و اهل عريسها محاوطينها و باين عليهم تواضع المستوى الاجتماعى(البنات اللى كانو محجبات قبل الفرح قالعين الحجاب و صابغين شعرهم اصفر و بيرقصو بمياصه و هما حافين و الشباب اللى جايين بتيشرتات ملونه بالوان فاقعه و معاهم بيروسول و مولعينه و شماريخ و خلافه ) بتنتابنى رغبه عارمه فى البكاء بإعتبارى حكمت على البنت بالعيش فى المستوى ده

و انى انا نفسى استغلت رغبتها فى الزواج و عرضت عليها العريس ده و انا عارف انها حتوافق عليه فى الظروف الحاليه حتى لو كان فيه عبر الدنيا كلها و اقنعت عليتها بالعريس ده .. اللى بالفعل ماكنتش حأقبله لأختى او لبنتى
و فعلا انا دلوقتى مش عاوز ابص فى وشها او وش جوزها بسبب الموضوع ده .. رغم ان المفروض حنروح نباركلهم يوم الجمعه اللى جاى و مش عارف حعمل ايه
مش بطلب منكم رأى او مشوره لأن اللى حصل حصل .. انا مخنوق و بفضفض بس

بص يا باشا ممكن اكلمك بصراحه وبدون زعل سيبك هو في الاول والاخر لو ربنا مش رايد مكنش حصل



لكن نرجع لحضرتك اكيد حضرتك كنت عارف من الاول اصله وفصله ويمكن لما بعد ما الموضوع خلص والبنت عارفه هو ايه واهله ايه انا اسف اني اقوللك لان الولد بكالريوس علوم ومعاك في نفس المكان ازن انا شايف انه عادي يمكن في الرد الاولاني كنت قاسي شويه


لكن وليه ميكنش حضرتك حسيت انه هايتساوي بيك و هايكون عديلك فاصبح في النفس شئ

اصله زمييلك في الشغل واكيد سيادتك كنت ادري بيه اشمعني د الوقتي بقي متدني الاهل بيئه بص حضرتك سيبهم وتوكل علي الله وخليك معاه بيس

لان النفوس بتتغير