قاعد بفكر إنهاردة كده ..

الموضوع بقى حرب ...

الشيوخ السلفيين عمالين يتكلموا عن بقيت المصريين إللى مش مؤيدين ليهم و يقولوا عليهم ليبراليين كفرة .. علمانيين كفرة ...

و فى نفس الوقت الأحزاب الأخرى بتحاول و بتدافع ...

الموضوع بقى معركة .. كأن من سيصل لمجلس الشعب فى سبتمبر هيقر دولته براحته تماما و يفضل فيها مدى الحياة ...

و بدأت أتسائل .. عن السلفية و السلفيين ...

1- الإنتخابات كانت حرام شرعا لأنها ممكن تجيب واحد كافر ( فى وجهة نظرهم) للحكم .... فين الكلام ده دلوقتى ؟؟
و الفيديو القادم لياسر البرهامى ... إلى مفهوم من الفيديو إن الإنتخابات حلال طالما جائت بالإسلاميين للحكم .. غير كده حرام و باطلة ...
موقع أنا السلفى | 074-حكم المشاركة فى الإنتخابات.د/ ياسر برهامى

دلوقتى لو هما كسبوا الإنخابات ... هيعملوا إيه ؟؟ هيلغوا الإنتخابات ؟؟؟ هيمنعوا أى حد يشارك فيها طالما ليس منهم ؟؟

2-
المظاهرات .... راى السلفيين فى المظاهرات ... إنها حرام .. لان بها إختلاط ..... و لأنها تحتواى على هتافات باطلة كالحرية و الديموقراطية ...

أيوة .. إنت شفت صح ... الحرية و الديموقراطية بالطلين .....
موقع أنا السلفى | المظاهرات والمشاركة فيها

إزاى بقى؟؟؟ يبقى إللى نستنتجه إن لو حصلت مظاهرات ضدهم هيبقى إعتقالات و قتل و قمع للمتظاهرين و مش بعيد قصف بالدبابات كمان ..... لو حصلت مظاهرات هيعملوا إيه ؟؟

3-
لو الديمقراطية باطلة .... دخلوا الإنتخابات ليه من الأصل؟؟؟

و لو حصل إن السلفيون مسكوا الحكم ... و نفرض إنهم ملغوش الإنتخابات .. فوجئوا إن الشعب طهق منهم و عايز حد تانى ( مصري عادى مش سلفى) .. إيه هيكون موقفهم ؟؟؟ هيلغوا الإنتخابات و يقفزوا على الحكم و قمع ؟؟؟ زى ما عمل باجبوا فى الحسن وترة فى ساحل العاج ؟؟؟؟

ولا هيلجئوا للتزوير زى النظام السابق ؟؟؟

ولا هيسيبوا الحكم لواحد ليبرالى كافر فى نظرهم ؟؟؟

4-
دلوقتى .. إيه هيكون موقف السلف من أى حد يعارضهم ؟؟؟ يكفروهم و يحلوا دمهم ؟؟ يكفروهم بس ؟؟؟؟ هيتعاملوا إزاى مع الأراء الأخرى ؟؟؟ و لا هيقمعوها بحجة إن ده ضد الدين ؟؟؟

5-
دلوقتى السلفيين عايزين يطبقوا كل حاجة إسلامية ... يعنى فرض رقابة شديدة على التلفاز ... و على النت .. يعنى رجوع رقابة كاملة على النت .. فين الخصوصية ؟؟؟ إحنا خلصنا من أمن الدولة عشان يرجع تانى ؟؟؟

6-
هل سيرضى السلفيون بالموسيقى ؟؟ ولا المنع التام و عقاب اى شخص يحاول ان يكون ضدهم ؟؟؟ و إيه موقفهم من الأوبرا و السينمات و المسارح ... و الفن .. ولا رقابة 100% عشان مافيش حاجة تطلع ضدهم ؟؟؟

بالمناسبة خبر إنهاردة ناس رفعوا قضية على أحمد رجب عشان إتريق على شيوخ السلفية .. و نص الدعوة ( السخرية من الدين الإسلامى ) ... هو من إمتى الشيخ بق هو الدين ؟؟؟ طب لو كده لو أنا قلت الشيخ الفلانى ده تعبان قوى ... يبقى أنا كده بشتم الدين ... ولا إيه ؟؟

7-
إيه موقف السلفيين من السيدات بشكل عام ؟؟؟ هينقبوهم بالقوة أو يحجبوهم بالقوة ؟؟؟ هيمنعوهم من العمل ؟؟؟ هيكتموا أصواتهم بحجة إن صوت المرأة عورة ؟؟ هيمنعوهم من التعليم ( فى فيديو شهير للشيخ الحوينى بيقول فيه العلم للرجالة بس إتفرجوا على اليوتيوب) .. و لو الستات نزلوا الشارع من غير حجاب هيضربوهم ولا هيحبسوهم ؟؟؟؟ ولا هيعملوا إيه ؟

8-
فى فيديو مشهور بردوا للحوينى بيقول فيه الفقر إللى إحنا فيه ده سببه إن مافيش جهاد .. مش كنا لو كل سنة غزوتين ثلاثة نروح البلاد التانية و ناخد أموالهم و نسوانهم .... و تبيع الأطفال بعشرة درهم ... ده إيه نظامه دلوقتى ؟؟؟ إفتحوا اليوتيوب و شوفوا ...

9-
إيه موقفهم من الإختلاط ؟؟ يعنى لو ماشى مع واحدة (مراتى مثلا) كل شوية حد يوقفنى و يشوف بينا حاجة رسمى ولا لأ؟؟؟ و هيتدخلوا فى التفاصيل الحياتية ؟؟؟؟ ليه ؟؟؟ هل هيعملوا كده ؟؟؟

10- طبعا السياحة و التعامل مع الديانات التانية و إحترام الإختلاف ده مش هيكون موجود ؟؟ ولا هيكون موجود ؟؟ يعنى مثلا المسيحيين المصريين ؟؟ هل هيقبلوا إنهم يمشوا من غير حجاب ؟؟؟ ولا هيضربوهم بردوا ؟؟ هل هيقبلوا الكنائس ؟؟ هل هيقبلوا شربهم للخمر ؟؟ ( حقهم) ...


دى كانت تساؤلات دارت فى دماغى و مش لاقيلها إجابة .....

أنا شايف إن الدولة المدنية هى الحل .. تقدر تستوعب جميع الأفكار و جميع الحريات و كل الطوائف ...
على أساس إن الحدود الإسلامية مطبقة ( الحدود الشرعية إللى ليها عقاب دنيوى زى الخمر و السرقة و القتل و هكذا ) ..
تقبلنا كلنا ...

حد يرد على تساؤلاتى .