الموضوع: انا والصنى والسبع ... كلاكيت 40.000 كم

المشاركة الأصلية كتبت بواسطة aboamr

وبالنسبه لترحيل العجله دى حصلت معايا فى النيسان القديمه وكانت بتحدف يمين وبتعمل صوت مع الفرامل وكنت فى الحرفيين وروحت ورشه هناك لضبط زوايا ووجدوا فيه نرحيل نص سم نتيجة مطب وتم رده هيدروماتك من غير زرجينه يدوى وتبديل العجل وضبط الزوايا وكله اتكلف حوالى 60 جنيه بس كان شغل ممتاز وكله كمبيوتر ودايما زحمه ماعرفش اسم الورشه للاسف ولا اسم الشارع بس فاكر مكانه ممكن اوصفهولك فى التليفون لو قررت تروح هناك م 0105258326

بصراحة يا استاذ عاطف انت ربنا بعتك ليا من السما وكنت عاوز اكلمك فى التليفون اشكرك بس لقيت الوقت اتأخر لأنى قضيت كذا مشوار بعد ما نزلت الحرفيين النهاردة ومش عاوز اقولك ان العربية رجعت زى الزيرو بالزبط ناعمة والدركسيون خفيف وثابتة فى المطبات ولا صوت ولا احزنون

والورشة طلع اسمها safety system بتاع زبط الزوايا والاتزان بنظام هيدروليك لاستعدال الشاسيه
ومكانها فى الشارع اللى قدام نقطة الشرطة اللى هناك
انا فى حياتى ما شوفتش ناس محترفة زيهم
بحق ربنا حسيت انى كنت فى pit stop بتاعت سباقات فورميلا-1
اول ما وقفت قدام الورشة بالعربية جالى ولد صغير قالى هاتعمل ايه يا باشا قولتله ازبط زوايا قالى ادخل ع المجرى
قبل ما انزل من العربية كانت الاربع عدد راكبه ع العجل وواحد جاب مقاس ضغط عجل وقالى هواء ولا نيتروجين ؟ قولتله نيتروجين راجع الضغط تانى
شكل الجهاز اللى عندهم اول مرة اشوفه عامل زى اجهزة الدفاع الجوى ولا الحرب الالكترونية والرادار عمود طالع من دراعين وبيهم عواكس بتلقط من الاربع اجزاء من على العجلات
لسه باحكيلهم المشكلة وكلام بريدجستون والعجلة اللى عاوزة تتقدم سم الا ربع
قالى ياباشا كل الحكاية الزاوية مفتوحة شوية بسيطة مش مكملة 0.1 وهاتتقفل وكل اللى بتقوله ده يروح
مفيش بالزبط 5 دقايق ولقيت الفاتورة اتطبعت ب25ج والنسب كلها صفر والعجل تمام التمام وعقبال ما طلعت المحفظة وحاسبت وقولت شكرا لقيت العربية واحد مخرجهالى قصاد الورشة وخدتها ومشيت وانا فى قمة السعادة بعد النكد اللى كنت عايش فيه من ساعة لما الاخ بتاع بريدجستون قالى موضوع الزرجينة ده

ولك جزيل الشكر يا استاذ عاطف وباذن الله لينا لقاء قريب