الموضوع: التيدا .. ومسلسل المؤامرة

والله كانت مقابلة زي العسل
واتعرفنا أكتر على ناس زي العسل
ومكنش مزعلني غير الناس اللي ماجتش وكان نفسي أشوفهم
بس متعوضة بإذن الله في مقابلة جاية

طالما معرفتهاش في المقابلة معاك تليفوني
كلمني وأنا مش هقولك على طول

الحلقة الثالثة


سبع .. ولا ضبع


لما كنت قاعد منتظر النتيجة في الاستراحة
طلع المهندس مصطفى المحلاوي
وقالي: فعلا جلب المقص اليمين بايظة .. وهاغيرلك المقص كله في الضمان
فرحت أولا لأن العربية لسه في الضمان وأنا اللي كنت مفكرها بره الضمان
وفرحت ثانيا لأن المقص هيتغير في الضمان
سألته طب إيه السبب .. دا العربية لسه عاملة خمسين ألف كيلو بس .. لحقت تبوظ
قالي: العربية اتخبطت من تحت من الناحية اليمين وده اللي قطع الجلبة الكاويتش وخلى المقص يسيب وده اللي كان بيعمل صوت النقرة
فرحت ثالثا جدا لأني اتطمنت عالعربية وإنها مش ملعوب فيها وإن السبب خبطة عادية من تحت ولما المقص هيتغير كله هيبقى تمام
يعني العربية الحمد لله طلعت سبع مش ضبع
وتوكيل السبع بردو .. طلع سبع مش ضبع
قلت يااااااااااااه دا ربنا ده كريم قوي .. الحمد لله إنه استجاب دعايا وأنا صايم في ول يوم في رمضان
نزل المهندس وغير المقص وقالي عايزة بس ضبط زوايا لأني معنديش ضبط زوايا
قلتله دا انت تشكر قوي على كده
نزلنا مع بعض نجرب العربية في شوارع ترابية معضعضة عشان نشوف الصوت اختفى ولا لأ
والحمد لله كله بقى تمام
وقالي سلملي سلام جامد قوي على الاستاذ أحمد مصطفى
وبعد ما غيرت المقص .. اللي كان عاملي مغص
روّحت البيت وأنا فرحان .. في أول يوم من رمضان
ومشيت وأنا مبسوط بالتيدا .. وحسيت إنها عربية شديدة
ومبسوط أكتر وأكتر كمان .. بالعمدة بتاعنا منسق نيسان
روح ياراجل ربنا يقويك .. ومن كل خير يارب اعطيك


أيها المشاهدون الكرام .. مع هذه اللحظة السعيدة .. في قصة إيهاب والتيدا .. أحب أن أوجه عناية حضراتكم إلى أن الحلقات .. لسه مخلصتش ..
والمؤامرات .. بردو مانتهتش
وقبل ما أوصل لحد البيت .. رجعت تاني واتغميت
شكلي كده زي ماحبيتكم ومش عايز أسيبكم .. التيدا بردو حبتكم ومش عايزه تفارقكم
اللي حصل إني وأنا راجع من المنصورة على الطريق الأسفلت كله كان تمام
ماعدا موضوع الحدفة اليمين لسه موجود
قلت يبقى عشان ضبط الزوايا زي ما المهندس مصطفى قال
قبل ما أروّح قلت أعدي على الراجل بتاع ضبط الزوايا اللي روحتله الأول خالص .. أصلي بصراحة كنت محروق قوي على العشرين جنيه اللي خدها من غير ما يعمل أي حاجة .. يعني لو كنت دفعت الألف ونص في تغيير المقصات يمكن ماكنتش حرقتني قوي زي العشرين جنيه دي .. لسبب بسيط لأني حاسس إني إتنصب عليا فيها
لأني عمري ما اتنصب عليا في حياتي

أبدا

غير مره واحدة

أو مرتين

أو 15 مره
مش فاكر الصراحة
المهم قلت أروحله عشان أحس إنه عمل حاجة بالعشرين جنيه
لما روحت لقيت واحد صنايعي تاني غير اللي شوفته أول مره
صنايعي بس إيه .. فهلوي
قالي أنا شغال هنا عند صاحب الورشة .. وأنا كنت شغال في توكيل غبور لمدة 18 سنة .. وأنا هظبطهالك .. وأنا .. وأنا .. وأنا
وقعد يشتم في الصنايعي الأولاني
حسيت إنه من النوع الهمبكاوي درجة أولى .. بس شكله شاطر
قعد يظبط في العربية من تحت .. ويروح ويجي .. ويجي ويروح
كل ده عشان ازرفه بأي حاجة كده
وبعد ما خلص قالي بكل ثقة: بص يا باشا أنا عايزك تقفل عداد السرعة وإن حدفت يمن ولا شمال سنتي واحد حط رقبتي تحت الفردة
وعمال يصدرلي رقبته وهو بيتكلم كأني هاخدها معايا رهن
قلتله خلي رقبتك معاك ياعم الحاج أنا عندي واحدة والحمد لله .. وزرفته باللي فيه النصيب وقلت إما أجرب العربية عشان أشوف الهمبكاوي أبو رقبة ده عمل إيه

تتوقعوا لقيت إيه ؟؟؟





بصراحة وأنا ماشي على الأسفلت لقيت العربية مظبوطة عالشعرة .. لا بتروح يمين ولا شمال
قلت: يااااااه .. أخيرا ..
روحت على العيادة ودخلت في شارع ترابي عمري ما دخلته من يوم مابعت الشاهين .. مش عارف دخلت منه ليه المره دي
أول ما مشيت في الطريق المتكسر .. كنت الأول بسمع صوت نقرة .. دلوقتي سمعت صوت نقرة ونقرور ونقرات ونقارير ونواقير .. وكل اللي إنت عايز تقول قول
قلت: اللهم صلي عالنبي .. إيه الحلاوة دي .. بقى أنا بخاف من الكلب يطلعلي أسد
بس ياتري من السبب .. التوكيل ولا .. أبو رقبة
طول ما أنا عالأسفلت ماكنش في مشكلة سواء وأنا جاي من التوكيل أو من عند أبو رقبة
اتصلت بالمهندس مصطفي وقلتله على اللى حصل .. استغرب جدا وقالي ممكن تجيلي التوكيل
قلتله تااااني .. ده مشوار طويل والوقت مش مساعدني
وبعدين قلتله طيب ممكن نتقابل في طنطا لما ترجع بالسلامة عشان تسمع الصوت الأول ولو لازم التوكيل أبقى أروح؟
قالي بكل ذوق تحت أمرك مفيش مشكلة
قابلته عند الموقف ومشينا بالعربية لحد البيت عنده واستغرب جدا من الصوت .. قصدي من الأصوات .. وقالي لازم تروح التوكيل عشان نرفعها ونبص عليها من تحت يمكن بتاع الزوايا يكون عمل حاجة
اتفقنا على تالت يوم رمضان وروحنا من طنطا للمنصورة مع بعض واتعرفت عليه أكتر طول الطريق
طلعت الاستراحة وكانت يوم أول محاكمة للريس .. وعدى الوقت مع المحاكمة بسرعة وبعدين طلعلي وقالي: لقينا صامولة سايبة في الناحية اليمين اللي بتاع الزوايا كان شغال فيها .. والحاجات اللي كانت مربوطة بالصامولة دي عمالة تخبط في بعض
طبعا هو قالي على الحاجات دي بس أنا مش فاكرها بالظبط .. أصلي بصراحة كنت مركز مع الريس وهو بيلعب في مناخيره
وطلعنا تاني بالعربية .. ومشينا عالأرض الترابية
وكل شيء بقى مية مية .. وزي الفل وأكتر شوية
ولما رجعنا للتوكيل قلت للمهندس مصطفى: أؤمرني يا هندسة
قالي ولا حاجة خالص
قلتله إزاي ولا حاجة .. المره اللي فاتت ماشي لكن المره دي لأ
قالي لا والله ولا حاجة
وبردو رفض .. حتى بعد الاصرار والإلحاح .. وحسيت إن الهم انزاح .. وبقيت عال وآخر إنشكاح .. وفكرت إني خلاص هرتاح ..


لكن عيب .. مش بالسهولة دي ..
التيدا لازم تعمل معاكم أحلى واجب ..
والعين المدورة لازم تعمل بردو أحلى واجب ..
أمال .. أصل أنا راجل بركة
لدرجة إن في حاجة بخمسة جنيه إتزنقت في العربية .. عشان أفك زنقتها وأطلعها كلفتني 522.5 جنيه .. ومشوارين إتنين من طنطا للقاهرة

إزااااااااي ؟؟؟؟؟




نكمل الحكاية .. في الحلقة الجاية
اللي هتكون بعنوان




زنجة .. زنجة