الموضوع: التيدا .. ومسلسل المؤامرة

الحلقة الرابعة


زنجة زنجة




لو تفتكروا في أول حلقة من الجزء التاني لما كنت رايح مطروح .. قلتلكم إن وأنا في الطريق حصلتلي شوية حاجات غريبة
وقلت منها موضوع الفتيس .. ومخالفة السرعة .. والحدفة اليمين
في حاجة كمان حصلت .. وهي إني كنت مشغل الكاسيت اللي بيشغل 6 اسطوانات وحاطط فيه اسطوانتين اتنين
وبعد 5 ساعات شغل طول الطريق .. فجأة لقيت الصوت وقف ومكتوب eject
ضغطت على eject عشان يطلع الاسطوانة بس معرفش وكتبلي mechanism error
أعدت المحاولة مره واتنين وعشرة ومفيش فايدة .. الاسطوانة مزنوقة جوه وحلفت ماهي طالعة
ياستي اطلعي .. والله مانا طالعة
يا حاجة اطلعي .. والله مانا طالعة
هجيبلك علبة جديدة واحطك فيها بس اطلعي .. للللللللللللللللللأ
يهديكي يرضيكي .. بردو مفيش فايدة
دخلت عالمنتدي وسألت يمكن ألاقي حل
بعض الشباب قالولي بعض الآراء .. بس على مين .. دي زنقة متكلفة
واحد قالى إعمل ريستارت وجرب
عملت ريستارت للعربية .. وفكيت الكابل من البطارية نص ساعة وركبته تاني
وسبحان الله .. شوف الحركة البسيطة دي ..هي اللي عملت المفاجأة
جيت أطلع الاسطوانة بعد ما عملت الريستارت .. وضغطت عالزرار



وبردو الاسطوانة مطلعتش :)

حاولت كل المحاولات .. مكنش ناقص غير إني أجيب زمارة طويلة وأقعد أزمر قدام الكاسيت زي الهنود اللي بيطلعوا الأفعى من الأفه
بس طبعا ماكنش ينفع إني أعمل كده
لييييييييييييييه ؟؟؟
لسبب بسيط جدا .. وهو إني معنديش عمة كبيرة زي اللي بيلبسوها على دماغهم

















وبصراحة بردو خفت لو طلعتها بالطريقة دي إنها تقلب عليا بعد كده وتقرصني :)
المهم .. وأنا في توكيل السبع بتاع المنصورة سألت المهندس مصطفى عالموضوع ده
وقلتله هو انتوا اللي بتفكوا زنقة الاسطوانات ولا الكاسيت له توكيل تاني
قالي توكيل الكاسيت في القاهرة واسكندرية بس .. وهحاول أشوفهولك كده
جرب معاه .. وعرف يفك زنقة اسطوانة واحدة بس .. وعرفنا سبب الزنقة إيه
وهقولكم عليه عشان محدش يتزنق زنقتي .. ربنا مايزنقكم في أي زنقة .. قادر يا كريم
السبب كان إن الورقة اللي بتبقى ملزوقة على ضهر الاسطوانة اتفكت من كتر الشغل واتفركت حتت صغيرة واتحشرت في الكاسيت من جوه وزنقت الاسطوانة وحبستها جوه ومنعتها من الخروج وتنفس الهواء الطلق واستنشاق عبق الحرية

حلوة عبق الحرية دي .. مش عارف سمعتها فين قبل كده

فياريت أي حد يشتري أي اسطوانة عليها ورقة على ضهرها يشيل الورقة دي الأول عشان مايقعش وقعتي .. ويضطر يشتري الزمارة الطويلة .. وبردو مش هيلاقي العمة الكبيرة .. إلا لو كان ليه واحد معرفة في الهند
سألت المهندس مصطفي على عناوين توكيل الكاسيت وخدتها منه وقالي شوف هتتكلف كام وهات فاتورة وأنا هدفعلك تمنها
مش بقولكم راجل محترم .. وكنز من الكنوز
الكلام ده كان أول يوم رمضان وماكنش ينفع أروح عشان الوقت مايسمحش
انتهى رمضان والعيد واسبوعين بعد العيد
لغاية ماعرفت موضوع المقابلة بتاعة المنتدى
قلت أضرب عصفورين بحجر .. واتصلت بتوكيل الكاسيت في مصر الجديدة
قالي هتجيب العربية نفك الكاسيت ونبعته المصنع وبعد 48 ساعة تيجي تستلمه
يعني لازم مشوارين للقاهرة عشان الكاسيت .. ده غير المقابلة .. وغير إني كنت عايز أنزل سوق العصر أشتري لاب توب
قلت خلاص أضرب 4 عصافير بحجرين
أروح قبل المقابلة بتلات أربع أيام أودي الكاسيت وأشتري اللاب توب
وبعد كده أروح يوم المقابلة بدري شوية أجيب الكاسيت وأحضر المقابلة
يا سلام عالفكاكة
وقد كان
روحت يوم الاتنين وبعد ما لطشت شوية تلطيش محترمين في مصر الجديدة لحد ما وصلت للتوكيل .. وده بسبب إن نادرا جدا لما تلاقي مواطن مصري في الشارع تسأله عن الطريق ويقولك "معرفش"
الحاجة الواحيدة اللي ميعرفش يعملها إنه يقول معرفش
لازم يفتي ويبعتك ويدوخك السبع دوخات
المهم وصلت التوكيل .. وحكيتله قصة "الاسطوانة الأسيرة" .. وكمان كان في 4 زراير مش شغالين في الكاسيت
قالي تعالى بعد يومين استلمه عشان الصيانة بتبقى في المصنع مش عندنا .. أحنا بنسلم وبنستلم
وبعد كده روحت سوق العصر في مصر الجديدة بردو .. أشتري اللاب توب اللي أنا باكتب عليه الكلام ده دلوقتي في مكان شغلي اللي ملك الموت مابيفارقهوش .. " في السلخانة"
الحمد لله اشتريت لاب توب جميل بفضل الله ثم بمشورة أخويا الكبير .. كبير المقام وكبير القدر .. الكابتن سامي .. اللي كان معايا عالتليفون وأنا بشتري اللاب واستفدت جدا من خبرته في الموضوع ده
وبعدين يوم الجمعة روحت تاني بدري وصليت الجمعة جنب التوكيل
قالي تكلفة الصيانة 475 جنيه .. قلتله عايز فاتورة قالي هتىدفع 10% كمان لو عايز فاتورة يعني 522.5
قلتله ماشي
ركب الكاسيت وخدت الفاتورة اللي كان ليها حكاية هي كمان وكان المفروض أستلمها الساعة 7 بالليل وبعد فيلم هندي قصير استلمتها بعد ساعة واحدة وده اللي أخرني شوية عالمقابلة
ووصلت لحبايبي الصقور .. اللي كان نفسي أشوفهم من شهور
وقضيت معاهم يوم من أحلى الأيام .. وعشت فيلم هندي طويل من أحلى الأفلام
وأكلنا مع بعض أحلى وليمة .. وحانت ساعة الفراق الأليمة
وروّحت البيت يومها وأنا طاير من الفرحة .. وأخدت لمراتي معايا حته من الفرخة
وعدى السبت والحد والاتنين والتلات والأربع كمان .. وفي يوم الخميس صحيت مالنوم على صوت الأذان
صليت الفجر ونمت كمان ساعتين .. وروحت الشغل وكشفت عالعجلين
وغسلت إيدي من الدم وقعدت عالمكتب .. وعشت معاكوا حياتي وكتبت عاللاب توب
وقعدت أكتب ليكم هذه الكلمات .. عشان تعيشوا معايا كل اللحظات


طبعا أكيد فكرتوا إن المسلسل انتهى عند النقطة دي .............. بس دا بُعدكم
إنتوا يعني تعرفوا إن في حاجة بتنتهي معايا بالساهل كده
دا التيدا عاملة معكم عقد احتراف
والعين عاملة معايا عقد انحراف
يعني لما روحت توكيل طنطا أول مرة والعربية زي الفل .. طلعلتلي مفاجئة طرمبة البنزين
ولما الإزاز اتشرخ وصلحته .. رجعت للراجل تاني بعد يومين
ولما روحت مطروح وقفوني في الكمين .. وبعدها بشوية العربية حدفت يمين
ولما المقص اتغير وروحت لأبو رقبة بتاع الزوايا
نسي يربط الصامولة كويس .. عشان يوجب معايا
تعرفوا دلوقتي ياناس يا عسل .. بعد كل ده إيه اللي حصل
لما ركّبت الكاسيت والاسطوانة طلعت وجربت كل الزراير اللي كانت مش شغالة .. وكله كان تمام
لما روّحت البيت قلت أظبط الساعة الموجودة في الكاسيت .. لقيت التوكيل اللي صلح الزراير اللي كانت مش شغالة .. بوظ زرار الساعة السليم اللي عمره ما اشتكي قبل كده
يادي الحووووووووووووسة .. اتصلت بيهم قالولي احنا مسؤولين عنه .. بس لازم تجيبه في يوم نفكه عشان نبعته المصنع وتيجي تاني ... بعد أدإيه؟


شاطرين يا ولاد .. بعد 48 ساعة عشان استلمه
يعني فيها كمان مشوارين للقاهرة .. يعني عصفور واحد بحجرين اتنين .. حاجة ماكنش ليها أي لازمة

وكمان مش عارف هل فعلا هاخد تمن فاتورة التصليح من التوكيل ولا لأ؟

دا غير إيه كمان .. صوت النقرة اللي في المقص رجع من تاني

اللهم لك الحمد
إنتوا عارفين .. بصراحة وأنا بعمل أول حلقة في أول جزء في المسلسل ماكنتش مقتنع بنسبة 100% إن اللي بيحصلي ده عين وحسد
لكن دلوقتي بابصم بالـ19 إنها عين .. وعين عقر كمان

ملحوظة:
طبعا هيطلعلي واحد يعملي فيها ناصح ويقولي تبصم بالـ19 إزاي .. المفروض تبصم بالعشرة بس
أقوله ماهو اللي بيحصلي يخليني أبصم بصوابع إيدي ورجلي كمان
هيطلع بردو واحد أنصح من الأولاني ويقولي طب يبقى تبصم بالعشرين ولا انت ناقص صابع يا عم الحاج؟
أقوله: ماهو في صابع في رجلي مينفعش أبصم بيه .. عشان فيه كالو يا عم الحدق

كل ده كوم .. وفي حاجة تانية خالص حصلت معايا .. أحكيهالكم في الحلقة الجاية ..
اللي اتاخدت فيها على خوانة
وكانت عبارة عن







طعنة من الخلف