ايه الحكمة في وجود 3 جوامع في محيط يقل عن 100 متر؟؟

شارعنا فيه جامع.. و الشارع اللي ورانا فيه جامع و بينهم على الناصية بأه فيه برج.. البرج ده جديد.. و معرفش ليه من كام شهر بس تفتق ذهن المالك / الملاك على فتح جامع في البدروم؟. هل لاحظ مثلا ان جامعين يفصل بينهم فركة كعب مش كفاية فقال يحط جامع مكان فركة الكعب دي؟

طبعا انا باتكلم عن زوايا مش جامع كبير.. بس المهزلة بأه فعلا بتبقى يوم الجمعة لما اتنين من الجوامع دول - و الحمد لله انهم مش التلاتة - بتبقى الخطبة في الميكروفون و إقامة الصلاة و كل واحد مع نفسه خالص

المأساة بأه بتبقى كل يوم في صلاتي المغرب و العشا.. ليه الصلاة في الميكروفون؟ ليه جامعين لازقين في بعض يصلوا في الميكروفون و أصوات قراءة الإمامين تتداخل؟ لييييييييييييه؟

انا مش عايزة أقول ليه الصلاة في الميكروفون اساسا، بس بلاش السؤال ده دلوقتي و خلينا نسأل: ليه 3 جوامع لزقين في بعض و ليه اتنين منهم يصلوا في الميكروفون؟