الموضوع: ولا تقول abs ولا ebd كلة محصل بعضة

المشاركة الأصلية كتبت بواسطة MMamdouh

الABS مش بيفرق فى مسافة التوقف... مسافة التوقف بيفرق معاها تماسك الاطارات مع الارض و قطر الطنابير و معامل احتكاك التيل مع الطنبورة والقوة اللى بيضغط بيها بستم بتاع ماستر العجل على التيل... دى العوامل اللى بتفرق فى قوة الفرملة و بالتالى مسافة التوقف

الفكرة هنا ان الطريقة اللى السائق بيستعمل بيها الفرامل بتفرق برضة و هنا بيجى دور الABS... الABS عنصر مساعد للسائق و بيحاول ينظم عملية الفرملة للحصول على افضل اداء منها لكن من المستحيل ان اداء الفرامل يبقى افضل مع الABS مقارنة بعدم وجودة لانة وسيلة مساعدة لاستخدام نظام له امكانيات محددة

انا هدى مثال بلدى كدة يوضح الفرق بين قوة الفرملة و طريقة استخدامها عشان ابين الفرق بين الوسيلة المساعدة و زيادة الاداء

هنفترض اننا عندنا 2 لتر مية فى طبق و سفنجة اقصى قدرة ليها فى الامتصاص هى لتر مية... و هنغطس السفنجة فى الطبق و بالتالى هتمتص لتر مية لان دى اقصى قدرة ليها

دلوقتى هنحاول نعصر السفنجة بطرق مختلفة:

فى اول تجربة واحد مسك السفنجة بايد واحدة و فعصها فا نزلت نص لتر مية

فى التجربة التانية واحد مسك السفنجة و فعصها بايديه الاتنين فا نزلت ثلاثة ارباع لتر مية

فى التجربة التالتة جبنا بطل كمال اجسام عصر السفنجة لما موتها و نزل منها 900 مللى مية

فى التجربة الرابعة جبنا عصارة ميكانيكية فعصت السفنجة و نزلت 900 مللى مية من السفنجة


كدة احنا غيرنا طريقة التعامل مع السفنجة عشان نعصرها و كل مرة نزلنا مية اكتر عن طريق تغيير طريقة العصر لكن فى النهاية السفنجة بيبقى فيها لتر مية فى بداية التجربة... و احسن نتيجة حصلنا عليها كانت عن طريق العصارة... و ان كان نتيجة بطل كمال الاجسام مماثلة لنتيجة العصارة

بالتالى بالنسبة للشخص الاول العصارة دى اختراع التنين و اكتشاف مذهل.. و بالنسبة للراجل التانى العصارة حاجة مفيدة... و بالنسبة لبطل كمال الاجسام العصارة ملهاش اى لزمة

طبعا لو جة واحد يقولى "انا اجيبلك عصارة ممكن تنزل لتر و نص مية من السفنجة" يبقى هجاس اخر حاجة لان هى اصلا مفيهاش غير لتر واحد بالتالى افضل طريقة للعصر مش هتنزل اكتر من اللتر دة باى حال من الاحوال... لو عايز تنزل لتر و نص من السفنجة يبقى تكبر السفنجة و تخللى سعتها لتر و نص... و تتعلم الطريقة الصح اللى تعصرها بيها عشان تنزل اللتر و نص دول تانى

طبق المثل دة على الفرامل... سعة السفنجة هى قدرة نظام الفرامل على الفرملة و ايقاف العربية... و طريقة العصر هى طريقة استخدام الفرامل و كل شخص قام بالعصر هو سواق مختلف و المية اللى نزلت من كل طريقة عصر هى مسافة التوقف... و العصارة هى نظام الABS

اذا معنى كدة ان اى نظام فرامل لة قدرة و امكانيات محددة لايقاف السيارة (سعة السفنجة 1 لتر بغض النظر عن اى حاجة تانية اتغيرت)

و حسب طريقة استخدام الفرامل نقدر نحصل على اداء مختلف منها (تغير كمية المية المعصورة حسب طريقة العصر)

و تتساوى النتيجة (نظريا) لما نجيب سواق فاهم و نقارن ادائة مع الABS (بطل كمال الجسام مقارنة بالعصارة)

و من المستحيل ان تزيد قدرة الفرامل مع وجود الABS (مينفعش تنزل لتر و نص مية من سفنجة فيها لتر مية واحد حتى لو استعملت عصارة)

فايدة الABS هنا انة بيتيح لكل السواقين استخدام الفرامل و الاستفادة من ادائها الافضل بدون ما يكون خبير و متمرس... يعنى بمعنى اخر الABS "بيساعدك" تحصل على افضل اداء من الفرامل عن طريق استخدام طريقة فرملة صحيحة بدون ما تكون مايكل شوماخر (مش لازم تبقى بطل كمال اجسام عشان تعصر السفنجة... فيه عصارة ميكانيكية بتقوم بالمهمة)

و علية فان قوة نظام الفرملة متغيرتش خالص بوجود الABS لانك مازلت محكوم بنفس العناصر اللى بتحدد قوة الفرامل بالفعل.. وزى ما شرحنا اللى عايز يزود قوة الفرامل يقدر يركب طنابير اكبر او تيل معامل احتكاكة اكبر او حتى يركب كاوتش تماسكة مع الطريق اعلى (يكبر سعة السفنجة نفسها) و بعد كدة يتعامل مع الفرامل بشكل صحيح مع الفرامل للحصول على افضل اداء و الاستفادة من التعديل (يعصر السفنجة زى الناس عشان ينزل منها اكبر قدر من المية)

انا عارف ان المثال طويل و معقد شوية بس معلش استحملونى لانى مش لاقى طريقة ابسط عشان اشرح بيها الفرق

MMamdouh

تشبية جاااااااااااااااااااامد