الموضوع: رابطة الوحوش ملاك السيفيا (ج2)

واليكم جولة جديدة فى صيانة السيفيا

النهاردة روحت لأبو أدهم وجيبت ماتور مارشدير ب 40 جنيه علشان لما كنت باجيب غيار المارشدير النور الابيض اللى ورا ماكنش بينور وجيبت المارش كله ب 150 علشان كنت كل مرة اجى ادور العربية اسمع صوت نحرة والعربية تحتاج كذا محاولة لغاية اما تدور .

بعدين قلت اطقس على الراجل اللى بيصلح علبة الدركسيون فى شمبليون وسبق الناس اتكلمت عنه هنا وانه بيدى ضمان وحاجات من دى المهم طلع اسمه الاطرش واكتشفت ان علشان اصلح علبة الدركسيون ممكن ادخلى فى حسبه من 500 ل 600 جنيه وعرفت ان فيه حد تانى برضو بيلعب فى نفس السعر المهم روحت للميكانيكى قالى عندى واحد شاطر ولسه فاتح محل ليه وراح واخدنى ليه الورشة اسمها باللو باور فى شارع الجلاء فى ضهر جمعية الشبان المسلمين وصاحب الورشة شاب اسمه ناصر وعنده كيا شوما من هنا لهنا الراجل قالى حاصلحلك علبة الدركسيون على 350 خلال ساعتين ثلاثة ومن غير ما تجيبلى طقم اصلاح وليك عندى ضمان كمان 6 شهور ولو عايز تركب علبة استيراد عندى وحاتتكلف 700 جنيه بالمصنعية ....افتكرت ساعتها صاحبنا جورج اللى قالى حاتجيبلى طقم اصلاح ب 100 جنيه ومصنعيته 250 وحاسيبهاله يومين علشان يخلصها ولقيت نفسى بدل ما كنت رايح اطقس بقول للراجل ابدأ شغل ... وفعلا لقيت 3 معاه بدأوا شغل الساعة 2 وخلال الشغل لقيتهم بيطلعولى القاعدة الخلفية للموتور اللى عايزة تتغير عندى فقلت فرصة بالمرة اغيرها روحت جيبتها من حلمى سليمان ب 120 جنيه واديتهولهم يركبوه وخلصوا شغل على 5 ودفعت المعلوم .

الملاحظات بعد التصليح الدركسيون بقى اتقل شوية وكنت بسمع صوت تخبيط فى دواسة الدبرياج مع كل نقلة طبعا رجعتله تانى قالى التخبيط بسبب قاعدة الماتور الجديدة باين علشان هى اعلى والموتور محمل عليها وقعد يشرح شوية حاجات بس أنا كنت مهنج وقالى حاظبطهالك بحتة كاوتشة ولما مشيت لقيت فعلا الصوت بقى اخف بس لسه فيه تخبيط وعلى خفيف بعدين جيت اخد يوترن لقيت الدركسيون ما بيردش زى الأول فقلت خليها بكرة لغاية اما اجرب العربية اكتر واطلعله كل الملاحظات

وعلى فكرة أنا ظبطت معاه لو ان شغله طلع تمام حاظبطه هنا فى المنتدى ولو حد عايز يروحله يقله من طرف أحمد الجندى اللى معاه السيفيا الزيتى

على فكرة يا ماكس بكرة كده مش حاينفع اجيلك أنا فلست والحمد لله

هوة اخر سرعة للسيفيا او الشوما كام انا جيبت بالعربية 180 حسيت ان دة اخرها انا ما كنتيش دايس اخر الدواسة بردو بس دية لقطة كدة عشان العربية في منزل علي طريق اسكندرية هية بتجيب اكتر من كدة يا جماعة ؟؟ في حد جاب 200 بعربيتة

انا جبت بيها 200

النهاردة روحت للميكانيكى علشان صوت الخبط فى دواسة الدبرياج وقلتله على اخر المستجدات علشان ما ياخدش وقت طويل فى التخمين نزل بص على قاعدة الماتور اللى لسه راكبه وفضل يربط فيها وكده وبرضو الصوت خف شوية بس لازال موجود وأنا حاتجنن من القصة دى ... كلمت عصام قالى ممكن يكون العيب من القاعدة نفسها فمش عارف بقى ايه رأيكم فى الموضوع ده ؟

وبعدين روحت بنزينة موبيل نزلت زيت الفتيس كله وحطيت زيت فتيس موبيل الفتيس اخد 3.5 لتر وحسابهم 69 جنيه ... ثم حميت زوبا حمية العيد علشان انضفها من زروطة زيت الاسكاترا ولما لقيت ان العربية بتنزل من كل حته كتل طين تسد عين الشمس ... ظرفت الراجل 10 جنيه علشان يتوصى بقى بيتشقلب على العربية وفضل ينظف فيها لغاية اما المية اللى بقت بتنزل من العربية ممكن تتشرب علطول !! :)