الموضوع: رابطة مالكى الاكسيل-الجزء الثانى

المشاركة الأصلية كتبت بواسطة mohamed_salama

الحمد لله يا جماعه انا جبت عربيه خلاص واخيرا انضميت للرابطه الجميله دى اللى حببتنى فى الهيونداى اكسيل من قبل ما اجبها

انا جبت 1500 مو 1995 من غير جنوط اسبور وكامله الحمد لله بالتكييف وراشه بره نظافه قوايم وحوض وشانطه سلام 100 % والسعر 29,500 وانتوا اللى تقولوا السعر حلو ولا ايه بقه
بس هى فيها شويه شغل بحوالى 500 جنيه كمان يعنى ممكن نقول السعر حلو ولا ايه ؟؟؟؟
منتظر التقييم !

الف مبروك وربنا يباركلك فيها يارب
السعر كويس جدا

المشاركة الأصلية كتبت بواسطة khaled_rz78

السلام عليكم
انا جبت اكسل 1500 بس الدركسيون تقيل ممكن حد يساعدني و الجوانب يتاعت البابين الامامي مقطعين اجيبهم منين و بكم

باشا ممكن صور للكلام ده علشان يبقى الموضوع سهل فى الرد عليه من الزملاء ونفيد بعض بالقدر المستطاع

المشاركة الأصلية كتبت بواسطة su35flanker

سلام عليكم
هل من الممكن تسقيط موتور اوتوماتيك لسياره اكسيل مانوال موديل 95 بدون تغيير فى الحوض او وضع قواعد عموله
و لو ممكن ما هو افضل موتور يتم اسقاطه لها
شكرا لحضراتكم

وعليكم السلام ورحمة الله وبركاته.
لو الموتور عند حضرتك 1500 سى سى ممكن تركب فتيس اوتو من غير ما تغير الموتور نفسه يعنى هتشيل الفتيس المانوال وتحط مكانه فتيس اوتوماتيك واير يعنى ما تحطش فتيس اوتو كهربا علشان هيحتاج ضفيره.
اما لو 1300 سى سى هيبقى صعب تركب فتيس اوتوماتيك ولازم تبيع الموتور بال فتيس وتحط مكانه موتور 1500 بفتيس اوتو وممكن موتور اللانسر الكريستاله 98 هو نفسه موتور الاكسل.

المشاركة الأصلية كتبت بواسطة magoda

ياجماعه انا بعد ما غيرت طرمبة الباور الدركسيون بقى حلاوة بس فيه مشكله وهيا انى لما اجى اركن او اخد ملف ع ضيق بلاقى دركسيون تقيييييييييييل اوووى للحظات ويرجع يبقى ناعم معايا ده ايه بقى بالظبط الطرمبة مش كويسة

يبقى لسه المشكله موجوده والعيب برضوا فى الطرمبه ولازم تتأكد ان زيت الباور نضيف والاحسن انه يكون موبيل .
وهل والعربيه واقفه لما تيجى تلف يمين او شمال بتسمع صوت ونه او الباور بيكون تقيل ويخف ويرجع يتقل تانى.

المشاركة الأصلية كتبت بواسطة amoor89

مساء الخير على كل الناس اللى فى الرابطة الجميلة
ليا استفسار صغير
هو بيكات الكاربيراتير بيبقى ليها مقاس معين عشان انا العربية خاربه بيتى فى البنزين مع انها 1300 ولو ليها بيبقى كام وايه اللى يتغير تانى عشان يظبط الاستهلاك

فى حاجه اسمها طقم اصلاح كاربيراتير فى حدود 145 جنيه بس المهم اللى يركبه يكون واحد موثوق فيه وفى شغله ويكون متخصص كاربيراتير
وانا عن نفسى روحت لمركز الصفا وده مركز متخصص وعند كل قطع الغيار واصبح الاستهلاك زى الفل
وسؤال على جنب لاستاذ احمد زيزو
حضرتك عملت ايه فى مشكلة قاعدة خزنة زيت الباور ياريت بالتفصيل لانى ركبت الباور والعلبة سايبة ملهاش مكان تتربط فيه ودى حاجة معصبانى لانها سعات بتخبط فى الكبوت مع حركة العربية
وسؤال كمان معلش شداد الفتيس اللى بيبقى فى العربية من تحت ده بيتجاب جديد ولا استعمال وسعره فى حدود كام وهل لو مشيت بالعربية فترة وهو بايظ يعمل زى صوت خبطة فى العربية من تحت مع الغيارات
واسف على الاطالة

المشاركة الأصلية كتبت بواسطة nader1818

مساء الخيييير
انا كنت عايز اشترك معاكم فى المنتدى الجميل ده
انا عندى عربية اكسيل موديل 1997 - 1500 cc اوتوماتيك
وعندى مشكلة فى الفتيس تقريبا - من فترة كان زيت الفتيس نقص شوية وانا ماخدش بالى وبقى يحصل خبطة فى النقلة من الاول الى الثانى وبعد كده زودت الفتيس وبقيت واخد بالى منه ومخلدوش ينقص تانى - لكن دلوقتى بداية الخبطة ده تحصل تانى وبالذات مع الحمولة فممكن اعمل ايه ؟؟؟؟؟

مساء النور واهلا وسهلا بيك .
حضرتك بالفعل مشترك معانا ومنور الرابطه كلها.
لازم تتأكد ان الخبطه من الفتيس مش من الكبالن ودى هتروح عند ميكانيكى ويبص تحت الموتور على القواعد بتاعت الفتيس والموتور ويبص على الكبالن لو كل حاجه تمام يبقى فى مشكله فعلا فى الفتيس اما ان الزيت صلاحيته انتهت وعايز يتغير او فى مشكله فى اسطوانات الداخليه اللى بتقلب من الاول للتانى وهى عامله زى اسطوانه الفتيس المانوال بس طبعا على اصغر ومع الوقت بتتآكل.