الموضوع: انا عاوز حق اخويه

البقاء والدوام لله
اللهم أرحمه رحمة واسعة
وأسكنه فسيح جناتك يا كريم
(كل البرامج الحوارية ليها فيس بوك ممكن تنشر الموضوع بكل سهولة)

المشاركة الأصلية كتبت بواسطة damasry

اللى ها اقوله ده الظابط اللى كان بيتابع معانا هو اللى قالى عليه وحكالى بالتفصيل اللى حصل

بعد الثورة المشير قرر دخول الجيش لسيناء والجيش عدد قواته حوالى ٥٥٠ الف، دخل سيناء عدد كبير من حجم القوات وقرر انه لازم يزيد عدد القوات لحد ٩٥٠ الف على اخر ٢٠١١

طبعا ده كان على حساب ان شبه كل الشباب بيدخلوا الجيش ومفيش حد بياخد تأجيل او اعفاء.

وكمان اختزال فترة الاعداد اللى هى ٤٥ يوم الى ١٤ يوم فقط

كل ده ادى ان فيه ضغط كبييييير على المجندين فى معسكرات الاعداد.

احمد وصل دهشور يوم الاتنين هو وباقى زمايله لكن كان عددهم ميكملش ٢٠٠ فرد والدفعة اللي احمد دخلها كانت حوالى ٢٠٠٠ عسكرى

الناس فى المعسكر اديتهم التلقين الامنى وسلمتهم مهماتهم وسكنتهم وقعدوا اول وتانى يوم ميعملوش حاجة غير طوابير بسيطة لحين اكتمال او زيادة عدد المجندين.

بعد يومين توالى وصول المجندين وابتدوا فترة الإعداد.

يوم الحادث، الناس متقسمة كتيبة ١ و٢ و٣

احمد كان كتيبة ٣

الكل نزل ارض الطابور عشان ضرب النار، كتبية ١ راحت ضرب النار ورجعت على سكنها، وك٢ نفس الكلام

كل ده وكتيبة ٣ لسه واقفة فى ارض الطابور فى شهر ٧ فى درجة حرارة ٤٤

كتبية ٣ راحت ضرب النار بعد ك٢ والمفروض يرجعوا سكنهم زى ك١ وك٢ لكن اللى حصل انهم جمعوا ك١ وك٢ لأرض الطابور وضموا ك٣ معاهم بدون راحة.

طبعا حصل تعب كتيييييير واغماء لحوالى ١٤ مجند وكلهم من ك٣

اللى حصل لطاهر انه تعب وجاتله ضربة شمس حوالى الساعة ١ الظهر ولما وقع زمايله هاجوا جدا ورفضوا يودوه العيادة وكانوا مصممين يطلعوا بيه بره المعسكر

مصاب ضربة الشمس بيكون مصاب بارتفاع ضغط الدم والعظام بتكون هشة جدا.

الوضع كالتالى، طاهر وقع مغمى عليه وزمايله بيشيلوه من اديه ورجليه وراسه محدش شايلها وجريوا بيه كام كيلو لحد بوابة المعسكر ولما الامن رفض يطلعهم رجعوا تانى بيه على العيادة، طبعا معظم عظامه تكسرت ورقبته كمان اتكسرت.

النتيجة ان طاهر توفاه الله، عربية الاسعاف (اللى المعسكر كله مفيهوش غير عربة واحدة فقط) خدت طاهر على مستشفى القبة وطبعا واصل متوفى.

تقرير الطب الشرعى كسر فى عظام كثيرة (المصدر قالى لكن الصراحة مش فاكر)


طيب ايه الوضع هناك فى المعسكر؟؟؟

غليان من المجندين، مع استمرار وقوفهم فى ارض الطابور ثم ذهابهم لضرب النار ثم رجعوهم لارض الطابور مرة اخرى.

توالى سقوط المجندين (على ما اتذكر حوالى ١٤ مجند) ٩ مجندين دخلوا مستشفى دهشور وتانى يوم ٥ تانيين راحوا المستشفى.

احمد (الله يرحمه) وقع على الارض تعبان ومغمى عليه ومفيش حالته تستدعى الذهاب لمستشفى كبير وعربية الاسعاف لسه مجاتش ومتأخرة.

نقلوه بعربية (معرفش انهى عربية) لمستشفى المعادى، طبعا وصل متأخر وحاولوا معاه لكن للأسف توفاه الله.

الوضع فى المعسكر:

طبعا العساكر كلها هاجت من المعاملة السيئة ومن اللي حصل وتم التعدى على قائد المعسكر جسديا من قبل المجندين عشان كان بيعاملهم وحش فى الايام السابقة.

طبعا الامن والمخابرات الحربية استلمت المعسكر وتم التحقيق مع قائد المعسكر ونائبه وفعلا تم عزلهم من الوظيفة العسكرية واللي كان بيتابع الموضوع هو ضابط رقم ١ فى قوات الدفاع الجوى عشان الموقف المتأزم ده وكمان لتأثره بحالتين الوفاة بسبب وفاة نجله الوحيد من فترة كبيرة.


كل اللى سردته عرفته من الظابط اللى كنا بنتابع معاه (هو ظابط محترم جدا ويوم المشرحة هو اللي لما جيه غير كل التعليمات اللى كانت مع العقيد وخلانا نستخدم عربية خالد ونستلم احمد هناك مش فى المحلة)

الله يرحم الفقيد ويجعل مثواه الجنة ويصبر اهله ويعوضهم خيرا ... اللهم آمين
الرواية دي هي فعلا الاصدق بالمنطق لأن هناك قاعدة في الجيش تقول " اذا مدت الآيدي تساوت الرتب " الجيش مافيهوش ضرب في تكدير فقط ولي اخي الكبير رحمة الله علية توفى اثناء الخدمة العسكرية في 1992 نتيجة ضربة شمس في معسكر دهشور ايضا صاحب السمعه الغير طيبه من انه من اصعب معسكرات الجيش الضباط الكبار يسمونه " مصنع الرجال " والعساكر يسموه " معسكر دهشور لا ميه ولا نور الداخل مفقود والخارج مولود "

متابع

المشاركة الأصلية كتبت بواسطة walidadel

ماهو الجيش ده دوله لوحدها كده بتحاكم نفسها بنفسها
يتبعوا مبدأ "حاكموا انفسكم بانفسكم" و المخابرات العسكريه دي مابترحمش و بيني و بينك كده حقك وصلك في نظرهم و مش هاتعرف تاخد اكتر من كده
يعني قائد الوحده اتنفخ هو و النائب و حصلهم غزل و المخابرات استلمت المركز كله و صرفلكوا تعويض و خلاص الموضوع خلص بالنسبالهم علي كده
افتكر ان اي حاجه بعد كده مش هاتوصلكوا لحاجه غير انك هاتدفعوا فلوس للمحامي في الهوا و هو المستفيد لانه بيديكوا امل انه هايعمل حاجه و هو علي يقين من جواه انه مش هايعرف يعمل حاجه بس اهي مصلحه و جايه

مين قال الكلام دا ؟
مين قال ان المخابرات العسكريه او اداره التحريات العسكريه عندهم ضمير
عن تجربه شخصيه محدش فيهم هيجبلك حقك الا لو كانت الجزمه فوق دماغه
يعنى مغصوب على كدا
خصوصا لو كانت شكوتك من ضابط
والجهتين هتحاول تلم الموضوع ودى باكبر شكل ممكن

المشاركة الأصلية كتبت بواسطة abouleila

البقاء والدوام لله يا خالد

كلنا بنقدر تماما الموقف اللى انت فيه وعلامات الاستفهام اللى مش لاقى ليها اجابة
وواضح ان حالة والدتك هى اللى بتدفعك انك تعيد التفكير فى الموضوع من تانى
علشان تعرف الاسباب وتحاول تريحها بقدر الامكان .
الرواية اللى اتقالت وسمعتها من محمد قاسم مقنعة لحد كبير ولكن تفضل الشكوك
موجوده برضه وعلشان تعرفها كاملة استحالة دلوقتى لان اللى هيقلك عليها
هما زمايله اللى لسه اصلا ملحقوش يكونو اصحاب وبالتالى التعاطف معه هيكون
قليل جدا وكمان هما لسه تحت سلطة الجيش حاليا .
...تقرير الطب الشرعى مش هتلاقى فيه غير اللى عرفته .

هون على نفسك يا صديقى واحتسبه شهيد عند الله واكثر من الدعاء والزكاة

الدوام لله وحده ...
حاله والدتى طبعا صعبه ..
وانا نفسى حاسس بتأنيب ضمير ..
هل انا بضيع حقه ؟
وهل لو مشيت فى الموضوع يبقى بسبب ضرر نفسى اكتر لوالدتى ؟
محتار جدا
روايه محمد قاسم زى ما انت قولت ..مقنعه ..لكن في علامات استفهام ..وان كانت قليله فى الروايه دى
لكن ..هل الروايه دى كده مفيهاش ظلم ليه ؟
طبعا فيها ظلم و غباء و تصرف همجى حيوانى ..هو السبب الرئيسى فى موته ..
تقرير الطب الشرعى انا عاوز اشوفه بنفسى ..لكن الواسطه مشافوش بنفسه ..حد قاله عليه ...و مكانش حد راضى يقوله لانهم عارفين علاقته بينا ...فممكن يكون مضحوك عليه ..

المشاركة الأصلية كتبت بواسطة minicooper20

بعد رحله من العذاب و سوقت طوب الارض و عملت تظلم و عملت البدع علشان اخود اعفاء انا استحقها
و الحمد الله نجحت يمكن انا مدخلتش الجيش بس انا ليا ابن عمى كليه حربيه صاعقه و لما سالتو قالى انو سمع عن الحدثه دى
و بحلفلى انو مستحيل يكون اضرب مفيش ضرب فى الجيش
و سمع عن الدفعه دى و بيقول مكملوش مركز التدريب تقريبا
الله يرحم اخوك و يسكنو فسيح جناتو يا خالد يا رب
ومتتعبش نفسك فى التدوير لان الجيش مش هتعرف تاخد اكتر من الهوما ادهولك
و الله انا اول مره اعرف الواقعه دى و اتاثرت جداااااااااااا بالواقعه و حيات ربنا و بحمد ربنا انى مدخلتش و بدعى لاخوك يا خالد والله ربنا يرحمو و يصبر والدتو و اهلو يا رب
ربنا يصبرك

مفيش ضرب انا متأكد ..مش عشان هما كويسين لا عشان مفيش اثار ضرب ...

المشاركة الأصلية كتبت بواسطة a7med_pharma

بص ياخالد
لو عاوز تعرف التفاصيل بشكل غير رسمي
لازم تجبها من حد كان معاه ف وقتها
ودي علشان تجبها .. لازم حد غيرك يسأل حد منهم بطريق غير مباشر
يعني تشوف صول او عسكري من نفس المركز ... وتخلي حد من اصحابه يسأله بشكل عرضي
مايبانش انه مقصود

الموضوع - حسب ماقلبي بيقولي - حاجة من اتنين
1. اهمال من طبيب .. او من قائد الوحدة ولازم هيدارو عليه
2. قسوة او عنف من ظابط او تعنت او غباء .. ادت لاستشهاد احمد ... ولازم برضو هيدارو عليه

كلا الحالتين
دم اخوك في رقبتكم ياخالد
روح للنيابة العسكرية او حتى النائب العام
او حتى تعمل اعتصام قدام مقر المجلس العسكري

يا احمد انا بسمع حاجات كتير تخلينى عاوز اروح افجر نفسى فى دهشور ...
انا جربت كل الطريق ..وسالت بطريقه غير مباشره ...و مفيش فايده ..مفيش واحد بيقول حرف !!

المشاركة الأصلية كتبت بواسطة a7med_pharma

بس بأي حال ياخالد
لو اثبت مثلا ان احمد استشهد نتيجة اهمال قائد الوحدة مثلا ؟؟
هتكون عقوبته ف القانون العسكري ايه ؟؟
مش متخيل انها تكون اكتر من جزاءات او تأخير ترقية .. والله أعلم

و اصلا هثبت ازاى ؟
لا معايا ورق ولا شهود ولا اى شىء ...
و هيقولك ما انت خدت 50 الف ..و عزلنا القائد ..عايز ايه تانى ؟ ده توقعى يعنى ..
لكن المحامى بيحاول يقنعنى انه هيسجن المشير نفسه !!

المشاركة الأصلية كتبت بواسطة mustafavet

افضحهم علي القنوات الفضائية
المذيعين يتمنوا برنامج سخن زي دا
البقاء لله ياحبيبي وربنا يصبر مامتك

البقاء والدوام لله
القنوات الفضائيه الموضوع هيزيد اشاعات ..ودى هتأثر بشكل كبير على والدتى لانها هتصدق اى شىء تسمعه ..

المشاركة الأصلية كتبت بواسطة wa7d

انا مقتنع بالكلام دا وفعلا الكلام مقنع جدا وللاسف دي مش اول حادثة وفاة بسبب ضربة شمس فى الجيش

انا كان ليا واحده جارتنا ابنها مات برضوا بسبب ضربة شمس فى الجيش
دا غير انا شخصيا كنت فى مدرسة عسكرية فى الثانوي وكان ماسكها قائد عسكري غبي وكان برضوا بيزنب كل الطلاب فى الشمس وكنت بشوف الناس بتقع علي الارض وتتهبد وانا وقعت معاهم فى يوم

انا مش عارف ايه الدماغ الزبالة دي

طيب هو الوفاه بضربه شمس دى مش مفروض مسؤوليتهم ..
مفيش طريقه اثبات !!
حسبى الله ونعم الوكيل

المشاركة الأصلية كتبت بواسطة wa7d

بس مش معني كلامي دا انك تسيب حق اخوك , لا لازم الناس دي تتفضح ويتحاسبوا راسمي وانتم تحضروا محاكمتهم علشان يبقوا عبره لاي حد مريض بداء السلطة يعذب الناس فى الشمس بالمنظر دا وتسقط اعداد كتير من المجندين وهو معندوش دم

مهو رسمى ازاى ؟