النهاردة رفدت 23 عامل بسب 25 يناير

**l0new0lf** · 01-02-2012 10:24 PM

المشاركة الأصلية كتبت بواسطة l0new0lf

على فكره قانون العمل مليان مشاكل و ثغرات بس ميعرفهاش غير اللى وقع فيها او شغال فى المجال ده
المشكله ان المحكمه مش بتاخد بالقانون ده بنظام يا ابيض يا اسود و ساعات كتير مبتاخدش بيه على حسب عرضك للمشكله و الطريق اللى مشيت فيه و اسباب وظروف مشيانك فى الطريق ده
لأن القاضى انسان و بيعرف يفكر
و برضه انسان و لكل انسان اخطاء و زلات و اهواء

**أحمد كمال** · 01-02-2012 11:08 PM

مش عايز اتوقف ...... هاقفل بقي و اخرس

**KHALED AYMAN** · 01-02-2012 11:29 PM

عاوز كمان اوضح انى اقسم بالله لما قولت للعمال محدش يمشى مكنش هدفى الاول هو الشغل ..كان هدفى مصلحتهم
لان انا اه رئيس العمال دلوقتى
بس منساش بردو ان وانا صغير فى ابتدائى كنت بروح العب فى المصنع هناك ..كانو بيعلمونى سواقه العجل !! و يصلحولى العجله ..و كانو بيعتبرونى اخوهم الصغير مش ابن صاحب الشغل ...

**shalaby2001** · 02-02-2012 03:59 PM

المشاركة الأصلية كتبت بواسطة heshamzaky

معلش العمال دى علشان غلبانة مش فاهمين حقهم و حضرتك لازم تعرف معلومة ممكن فقط تكون غايبة عنك
لو حا تنزل عامل يوم اجازة رسمية القانون بيقول تدى لة بدل عملة عن اليوم دة يومين أجازة
حبى حا تديلة يوم بدل و تخلص القصة
= لو العمال متأمن عليهم وراحو مكتب العمل ممكن جدا يرفعو عليك قضية و التسلسل بتاعها سهل و معروف جدا حضرتك حا تخرجهم أزاى من على شاشة التأمينات لازم يكتبو استقالة و يمضو لك على استمارة رقم 6 غير كدة حا تتحط فى خانة اخرى و هى الخانة الى بيتكتب فيها سبب ترك الخدمة مش حا تقدر تكتب فيها رفد شهادة الخبرة حضرتك ملزم بموجب القانون تكتب لة شهادة خبرة و ممكن باللغة الانجليزية لو العامل دة طلب كدة دة حقة و انت ملزم بكدة و تديلة ما تم ايداعة لديك من اوراق تخصة مثل شهادات الميلاد و الخبرة و خلافة
علشان تمشى العامل من عندك طالما لم يمضى فى الخدمة عندك اكثر من 10 سنوات لازم تخطرة قبلها بشهرين كتابة و لو زادت مدة خدمتة عن 10 سنوات تخطرة قبل ما تمشية ب 3 شهور
و يستحق يوم أجازة فى كل اسبوع بخلاف أجازتة الاسبوعية للذهاب للبحث عن عمل اخر و الاجازة دى مدفوعة من قبل صاحب العمل و اليوم الى العامل حا يحددة بمزاجة
يستحق ما تبقى لة من رصيد اجازات عن أخر 3 سنوات عمل
لو جيت تمشية قبل انتهاء فترة الاخطار الى هية شهرين حا تقبضهم لة كمرتب
و بالمناسبة المرتب مش حا يتخصم منة الضرائب و لا التامينات حا يقبضة كاملا
لو العامل رفع عليك قضية فى المحكمة حا تضطر انك تدفع لة شهرين مرتب عن كل سنة قضاها فى العمل لديك
و الفلوس دى حا تتودع فى خزنة المحكمة ما دفعتش ممكن المحامى يعمل حجز على المصنع بتاعك و لو مفيش فلوس يبيعو اى اصول ثابتة لحين سداد الديون
================================

أهم ما فى الموضوع تذكر أنك عاوز تقطع عيش بنى ادم شغال
و العامل دة هو الى بيدخلك الفلوس و الا حضرتك تقف تشتغل بايدك و توصفيك لهم بأنهم
((( للاسف العامل المصري لازم ياخد بالجزمة عشان يشتغل , لكن بالمعاملة الطيبة يتملعن )))
مش حلو و لا فية اى جدعنة فى الكلام الى حضرتك بتقولة
اعذرنى لصراحتى بس أنا مش بحب الظلم أو أنى افترى على حد كان ممكن تخصم لهم مش ترفدهم

بارك الله فيك
الظلم ظلمات

**Kareem.ElAraby** · 03-02-2012 06:40 PM

المشاركة الأصلية كتبت بواسطة sherif_m72

من فضل الله عليا والحمدلله انا
بس طبعا فى اختلاف بينى وبينك انت وصاحب الموضوع كبييييييييييييير جدا فى طريقه ادارة العمل بس ده ممكن ان يكون سببه انى بدأت من الصفر فعلا وانتم الظاهر مش حاسيين بيهم بمعنى انى كنت من واحد من العمال اللى مش مشرفينكم
وحاليا ولانى فهمت دماغهم ومعاملتهم بتعامل معاهم بالطريقه اللى متخسرنيش ومتخسرهمش وبفضل الله انا معنديش مدير او مشرف عمال عشان الشغل يمشى لان كل طرف فينا عارف اللى ليه واللى عليه
انا بخلى كل واحد فيهم مشرف على الباقى بالتناوب (مش جاسوس على زميله ) لا مش بيشتغل بايده فى اليوم ده وبيباشر الشغل و بنعمل حصر شهرى وبنشوف اعلى واقل مستوى وبنمشى مبدأ الثواب والعقاب
الرجاله عندى (وافتخر انهم رجاله والحمدلله) مش محتاجين اللى طريقتكم اللى نتايجها فاشله
(العند بيولد العند)
للعلم انى بشتغل شغل تانى وبيحصل انى مش بكون متواجد معاهم لظروف عملى التانى لكن والله لما بيحصل انى بزعل منهم فى حاجه وبحس ان حصل تقصير (وده نادر) بسيبهم واروح واقولهم انتم حرين ده مكانكم ويوم ما يخسر او يتقفل انت اللى هتخسروا
بلاقي مشرف اليوم بيتصل بيا على الساعه 10 او 11 وبيقولى ان الرجاله سهروا وخلصم الشغل
يبقى المشكله فى العمال ولا فى ::::::::::::::::؟
للعم انا اللى عندى رجاله مش عمال والحمدلله

ربنا يباركلك و يكتر منك
بخصوص صاحب الموضوع, انا مهندس بردو بس
أكره ما عليا أتعامل مع الصنايعيه و معاك في انهم مش بيجوم الا بالفلوس !

**MaZaGAngeE** · 03-02-2012 11:14 PM

المشاركة الأصلية كتبت بواسطة kareem.elaraby

ربنا يباركلك و يكتر منك
بخصوص صاحب الموضوع, انا مهندس بردو بس
أكره ما عليا أتعامل مع الصنايعيه و معاك في انهم مش بيجوم الا بالفلوس !

و لا بالفلوس حتى
العامل لا يهمه الا مصلحته الشخصية فقط و لا يهمه المكان اللي شغال فيه يكسب او يخسر و لا انت بتعامله كويس و لا وحش مش مهم عنده
و زي ما خالد بيقول على مواقف مع عمال عنده ...
عامل البوفيه عندي و هوه مروح خبطه تاكسي و رجله اتكسرت , طبعا هوه تحت الاختبار و كان ده اول شهر ليه .... طبعا اديته اللي فيه النصيب و قلتله خليك في بيتك لحد ما تقف على رجلك ( الدكتور قاله 3 شهور ينام فيهم و منهم شهر علاج طبيعي ) و مرتبه ماشي زي ما هوه ..