الموضوع: تعالوا نعرف ازاي نغير سير الدينامو

بسم الله الرحمن الرحيم
السلام عليكم و رحمة الله و بركاته


بعد غياب طويل عن السلسلة انهاردة فيه جزء جديدة للسلسلة تعالوا نعرف التعليمية

http://www.nilemotors.net/Nile/252145-a.html

و هو عن كيفية تغيير سير الدينامو

انا لسه مغير سير الدينامو في عربيتي و هي سوزوكي التو

http://www.nilemotors.net/Nile/27946...post3874199099 (تقرير-مصور تغيير سير الدينامو لسوزوكي ألتو)

فقولت انزل شرح كيفية فك سير الدينامو و تركيبه في السوزوكي الألتو عشان لو حد ناوي يجرب او حتي لو حد هغير يبقي عارف ايه اللي يحصل ( اعملي فيها مهندس ميكانيكي بقي .....ياااااه انت لسه عايش يا عم انت ده انا افتكرتك مت )
طبعا انتوا عارفين ضميري اللي ملاحقني طول الوقت

نبتدي ع بركة الله

اولا الادوات :

- مفتاح ربط
- مفك عادة و يمكن متحتاجوش
- سير الدينامو نفس المقاس او اكبر درجة واحدة



ثانيا هيحصل الآتي :

هتتأكد ان العربية مطفية و تسمي
و تجيب المفتاح و تفك الــ3 مسامير اللي مشار اليهم في الصورة بس مش معني تفك انك تشيلهم لأ مجرد تفك بس عشان الدينامو سايب شوية




بعد ما تفك تشد الدينامو عليك ناحية الفوانيس يعني لبرة و هتلاقي مجري زي ما الصورة موضحة يمشي فيها في عربيات تانية ممكن المجري بالعرض و فيه عربيات سنون ع حسب لكن كله نفس النظرية بس السنون لازم تظبط تمام
( لو مش هتعرف تظبط الشدة بتاعت الدينامو و معاك نفس المقاس قبل ما تفك المسامير علم مكان المسمار و هو مربوط بقلم ع مكان الربط عشان ترجع تاني و عامة هتلاقي مكانه متعلم خلقة من التقريطة الفبريكة زي ما الصورة موضحة عندي)
( اما لو اكبر درجة يبقي هتشد الدينامو لجوة شوية عن المكان الاصلي لحد ام تظبط الشدة و ظبط الشدة انه ميكونش مشدود اوي و لا مرخي اوي يا دوب مشدود بحيث لما تدوس ع السير لجوة يكون في حدود 1 سم و بنبه لو مش هتعرف روح لواحد يعملها عشان الشد اكتر من اللازم ممكن يقطع السير )

بعد ما فكينا الدينامو و شيلنا السير القديم نحط السير الجديد ع الطنابيير الأول ع الطنابيير اللي لبرة و بعدين ع الدينامو و تشد اهم حاجة تتأكد ان مجري السير داخل في مجري الطنابيير زي عاشق و معشوق و ماشي تمام فيهم
بعد ما تحطه و تظبط شدة الدينامو تربط المسامير تاني و تربط كويس و تتأكد من شدة السير زي ما اتفقنا
و تسمي و تدور و تشوف السير اخباره ايه و هو راكب و شغال و تزود بنزين عشان تتأكد انه ماشي تمام

و مبروك عليك السير الجديد


فيه طريقة تانية بس مجربتهاش الحقيقة و انا بسميها طريقة الدكتور ههههههه لأن د \ حازم hm414 قالي عليها و هي ميزتها انك مش هتفك حاجة
هترفع العربية من الجنب اليمين ع كوريك و تجيب مفك عادة و تدخله بين السير و الطنبورة اللي بتلف و تمشي العجلة واحدة واحدة و تطلع السير كانك بطلع جنزير العجل و في التركيب نفس الطريقة لكن بصراحة مجربتهاش بس تنفع لو ع نفس المقاس و تبقي الشدة مظبوطة
لكن لو هتركب درجة اكبر هتكون مضطر تستخدم الطريقة الأولي



و انبه تاني مرة و اقول لو مش هتعرف خلاص روح لواحد يعملها قدامك و شوفه بيعملها ازاي و اتعلم و بعدين اعملها بنفسك

المشاركة الأصلية كتبت بواسطة hm414

طيب لو هشرح الطريقة البسيطه بتاعتي ببساطه شديده

1هترفع الهاند بريك
2هتدي العربية أعلى غيار (رابع او خامس)
3هترفع المن الفرده الاماميه اللي جنب الطنابير
4هجيب المفك العاده وتحطه بين السير والطنبوره وبايدك تلف الكاوتش لقدام هتلاقي السير بيطلع زي جنزير العجله بالظبط

5هات السير الجديد..
6حطه عالطنابير لحد اما يبقى مشدود وفاضلك طنبوره واحده يعضق فيهاهتشده عليها وتلف الفرده تاني وبالظبط كأنك بتركب جنزير عجله
6+مركبش حط المفك تحته زي مفكيت وحاول (ومتقلقش السير مش هيحصله حاجه من المفك)
7شوف الشد وهل السير محتاج شد ولا يترخى (اقصى انضغاط يكون 1 سم)
دور عربيتك

شروط الطريقه
السير يكون 100% نفس مقاس الاصلي
اما لو اصغر او اكبر هتظطر تفك المسامير بتاعة مجرى الدينمو...
في الماروتي هوا مسمار واحد فقط

بالمناسبه
سير التكييف بنفس الطريقه وفيه مجرى للكباس لو احتجت تشد او ترخي..

طيب شوية معلومات متقالتش في الموضوعين بتوع اكسيل سريعا

اهم حاجه تركز عليها وانت بتشتري تاريخ الانتاج
زي زي الكاوتش
اوعى تديب حاجه انتاجها اكتر من سنه لان كده كده انت دافع الفلوس فتدفع فحاجه مركونه وممكن تكون معروضه في الشمس ومش متخزنه صح ليه؟؟

ثانيا الصناعة
انا بحذر اهو وبأكد
جيب اي حاجه الا الصين لانه بيتقطع فعلا وعمره قصير وبنفس سعر الكوري

ثالثا لازم نعرف ايه مخاطر ان سير الدينمو يتقطع...
السير لو اتقطع العربية هتعتبر دايره عالبطاريه وده معناه ان العربية بطاريتها هتفضى خلال لو الطريق مفتوح هقول 10 كيلو ولو واقف مش هتكمل كيلو وهتفصل والعربية مش هتدور

كمان حاجه السير ده عليه حركة طرمبة الميه وبالتالي العربية غير انها ماشيه عالبطاريه طرمبة الميا مش شغاله وبالتالي ممكن تسخن منك وانت وحظك تاخد بالك ولا متاخدش

السير ده بيتغير كل 40 ألف فمتبخلش على عربيتك بيه وتشيك عليه من فتره للتانيه..

طبعا نفس القصة في كل العربيات لكن بتفرق في مكان الدينامو او السير و نوعه و طوله


اتمني اني اكون افادتكم


و انتظروني و جزء جديد ان شاء الله في سلسلة تعالوا نعرف التعليمية

http://www.nilemotors.net/Nile/252145-a.html


و توتا توتا فرغت الحدوتة حلوة و لا مضروبة
( مضروبة زي خلقتك ....... ضربة تضربك يا بعيد انت مبتتهدش )


بالتوفيق ان شاء الله