الموضوع: تحذير : من عصابة (المحور ) سطو وسرقة زوجتي العزيزة .

المشاركة الأصلية كتبت بواسطة mzeid

قدر الله و ما شاء فعل
الحمد لله على سلامة زوجتك
و دة مش غريب الحرامية مش بيغلبوا :(

الله يسلمك يا غالي ... فعلا الحرامية مش هيغلبوا ، كل يوم يخترعو طريقة عبقرية مبتكرة للسرقة ... أه لو يشغلو ذكائهم ده في حاجة مفيدة كنا زمنا نافسنا اليابان وهولندا وأمريكا بس المشكلة عندنا عباقرة بس في النصب والسرقة والائذية .

المشاركة الأصلية كتبت بواسطة a7med_pharma

حمد الله على سلامة المدام

وماينفعش اساسا تسيب مراتك تروح في حتة لوحدها الايام دي خصوصا بالعربية
سواء الصبح او بالليل او في اي وقت

معاك حق بس انتا عارف الستات عاوز واحد عندو طولة بال سواء في لبسهم ولا في زيارتهم ورغيهم ... يا أخي لمن بنكون بنزور ناس وبقولها يالله نمشي طيب نستئذن احنا بأه أمشي انا وانزل اسخن العربية واقعد استنى فيها ساعتين والاقيها لسه وقفه على السلم عماله تتكلم وترغي ... فلذلك جبتلها عربية وقلتلها عيش مع نفسك أحلى مافي اللحظة .

المشاركة الأصلية كتبت بواسطة elawany13

لا حول ولا قوة إلا بالله
عليه العوض ومنه العوض فى مصر
ربنا يعوض عليك ياميدو
قدر الله وماشاء فعل

تسلملي يا ألواني باشا ... انا مش مشكلة الي حصل مع مراتي بس نفسي بجد الي حصل معنا ميحصلش مع اي حد تاني غيرنا ويعيشو الناس في أمن وسلامة بعيد عن اللصوص الي زي كده .وتحياتي ليك ياباشا .

المشاركة الأصلية كتبت بواسطة tutankhamoun

أولا ربنا يعوض عليكم يا باشا و الحمد لله أن المدام بخير.
ثانيا
مفيش جياع بتعمل كدا يا فندم و مفيش أصلا ناس جعانة بالمعنى المفهوم
الناس الفقيرة أو المحتاجة أغلبها بيشتغل حتى لو شغل بيعيشه يوم بيوم .... بس مفيش واحد جعان يقعد يحضر خطة و يقف على المحور مستنى ضحية .
دي مجرمين أصلا
المشكلة دلوقتي في حاجتين
الأولى هي أن وزارة الداخلية دلوقتي نايمة في البلالة (مبدئيا هيبتهم راحت لأن كل من هب و دب مش عاجبه الشرطة و بيتخانق معاهم حتى لو غلطان و دول كتير و ده خلاهم مش عايزين يشتغلوا )
السبب التاني هو القوانين الخيبانة اللي عندنا

طيب أيه الحل .
الحل هو التطبيق الصارم للقوانين الموجودة حاليا .
و فين الأخوة بتوع مجلش الشعب اللي الشعب أنتخبهم علشان تحسين أوضاعهم ؟؟؟
المفروض أن المجرم معتدي الأجرام ذو صحيفة السوابق (متكرر حدوث الجريمة ) يتعدم شنقا في ميدان عام .
مرة و أتنين (حبس ) في المرة التالتة ..... اعدام في ميدان عام
إنما اللي بيحصل ده ............ قلة أدب
و بعدين الناس أصبحت قليلة الأدب بطريقة بشعة ......... ازاي تشتم الناس اللي بتحميك و هي المصد رقم واحد للبلد
اللي يقولك يسقط حكم العسكر و اللي يقولك يسقط العسكر
البلاد الجاهلة زي مصر ما ينفعش فيها ديمقراطية زي بتاعة الغرب
أحنا لينا المرزبة على دماغنا علشان نمشي عدل ... إنما حرية و ديمقراطية و الكلام الفاضي ده مش للشعب الهمجي اللي عايش في البلد دي .
أحنا يا سيدي الفاضل دلوقتي بنشوف الناس ماشية عكس الأتجاه عيني عينك في الشوارع الرئيسية و السريعة و جاي يقلب في وشك ..... و طبعا الأنفلات الأمني (اللي سببه تقاعس الشرطة عن العمل لبعض الأسباب اللي ذكرتها )
لازم الحزم و الشدة مع شعب زي الشعب المصري ......... مش بنمشي غير بالحزم و الشدة للآسف الشديد .
أنا مش بترحم على أيام مبارك برضه .

بس عايز الجيش و الشرطة يمسكوا البلد بحشمة و حزم شوية .

كلمتين واللهي في الجون ... بحييك عليهم ... وياريت فعلاً يطهرو المجتمع من الناس الحرامية دول العالة على المجتمع ... بس المشكلة انهم بيسجنو كل المساجين مع بعض ويدوهم فرصة انهم يتعلمو من بعض والي عندو طريقة اوفكرة جديدة للسرقة والنصب يقولها لزميلو ... والي عاوز يشكل عصابة او يشكل شلة مجرمين او يعمل منظمة أعتقد أن السجن الجماعي أنسب مكان ... أنهم يعملو أجتماع أو مخيم تدريبي أو لقاء القمة للمجرمين والحرامية في السجن ويتعلمو من بعضيهم ويطلعولنا أحنا بأه هههههههههههههه .

المشاركة الأصلية كتبت بواسطة wael_power

حسبي الله ونعم الوكيل في الحرامي وفي اللي سايبهم يسعوا في الارض فسادا....

أه واللهي وحسبي الله ونعم الوكيل في الشرطة مش عارف مستنين أيه ... ننزل نبوس على راسهم ونحب على ايديهم ونقلهم حقكم علينا أنزلو أشتغلو ... ولا نروح نشجعهم ونوقف نسقف لهم ونقلهم يالله يابابا يالله يابيه يالله ياباشا أتي كميلة يالله يابيضة انزلوا اشتغلو ... ولا نبعت نجيب شرطة أجانب من بره . أعارة .

المشاركة الأصلية كتبت بواسطة hema_lancer

أعمل محضر
وروح غير نمر العربية بالمرة

هو ممكن الواحد يغير نمر عربيتو ؟؟؟؟؟؟؟ طب ياريت بس ينفع ...

المشاركة الأصلية كتبت بواسطة khaled_2012

لا حول ولا قوة إلا بالله عليه العوض ومنه العوض البلد خلاص خربت..أنا حاسس اننا في شيكاغو, حسبي الله ونعم الوكيل

أول حاجة الحمد لله على سلامة زوجة حضرتك..المهم انها بخير.

تاني حاجة ودا المهم: انك تروح تعمل محضر أو اي حاجة تثبت الكلام ده عشان لاقدر الله الورق والحاجت اللي في شنطة المدام محدش يقدر يعمل بيها حاجة ودا المهم.

تالت حاجة: حاول بقدر الإمكان انك متسيبهاش تمشي لوحدها في اي حتة إلا للشديد الأووي, خليك معاها ووصلها انتى,

وحاول بقدر الإمكان انك متخليش أي حاجة في العربية ملفتة للنظر زي شنطة المدام أو شنطة لاب او أي حاجة مهمة تلفت النظر, وابقى غطي العربية عشان متلفتش النظر للعربية نفسها.

والله العظيم المفروض يمسكو كل بلطجي ويعدموهم رميا بالرصاص في ميدان عام عشان يخافو بعد كدا يعملو أي حاجة, دي قلة أدب وسفالة(معليش يا جماعة اعذروني بس الموضوع حرق دمي بصراحة الواحد خلاص حاسس انو مبقاش في أمن خالص), حسبي الله ونعم الوكيل.

ياررررررررررررررريت لو المجرم فعلا يتحاكم صح الصح مفيش حد هيفكر انو يتحول لمجرم او بلطجي ... بس مره كنت في نقاش مع احد المستشارين في الموضوع ده قالي يافندم عقوبة تجارة المخدرات الاعدام ... ومع ذلك ناس كتير بتاجر بالمخدرات أن مكنوش اطفال صغيرة ...
فتغليظ العقوبة لا يقلل من الجريمة لأن عندنا شعب جبلة مبيحسش ... وممكن لو حطو واحد في ميدان عام علشان يقصو ايدو علشان سرق الناس كلها تروح بس علشان تتفرج وتلاقي ناس بتبيع تيرمس وبطاطا وكياس كوشري وتين شوكي علشان يتسلوا وياكلو وهما بيتفرجو ههههههههههههههههه .

المشاركة الأصلية كتبت بواسطة corsair

انا فعلا مش عارف امتي هيطبق الشريعة الاسلاميه علي السارق والبلطجي يعني لما واحد حرامي يشوف واحد حرامي زيه ايده مقطعوعه اكيد هيفكر الف مره قبل ما يسرق حد احنا عليه العوض ومنه العوض في البلد دي خلاص

قصدك أكيد هيفكر ألف مره أزاي يحسن من مستواه وأدائه في عمليات السطو الي جيه علشان ميتمسكش .

المشاركة الأصلية كتبت بواسطة tiger76

قلبى معاك والله و حاسس باللى انت حاسس بيه ربنا يسترها علينا جميعا
و الحمد لله قضى أخف من قضى
و انا تحت امرك لو حبيت تعرف عنوان و تليفون المكان اللى انا ركبت فيه الفامية المقاوم للكسر
و تحت امر كل أعضاء المنتدى

تايجر باشا ... تسلملي يا غالي ...واللهي فرجت المدام على الموضوع الي حضرتك عاملوا ... ومن ساعتها اتجننت وعاوزة اعمل لها حكاية حماية الزجاج بأي شكل .. بس فعلاً احترم فيك حتت بعد النظر للأشياء وشعار أمن وعيش مطمن ... تحياتي ليك ياباشا ... وياريتني خدت الموضوع الي انتا عملتو بمنتهى الجدية ومستهترتش بيه ، أهو الواحد عايش بقلق ليل نهار بسبب موضوع الرخص والبطاقة الي اتخدت دي ... وياعالم الايام مخبيه لنا ايه ؟؟؟؟ تحياتي ليك ياباشا .

المشاركة الأصلية كتبت بواسطة mxz911

حمد لله على سلامتها .. وربنا يكفيك ويكفينا شر ولاد الحرام الانجاس

يااااااااااااااارب ... اللهم أميين .
لأن بجد بجد الناس فيها الي مكفيها مش ناقصة كمان تعيش برعب وقلق وعدم الامان في بلادهم ... لأن المشكلة احنا معندناش بلاد تانيا نروحلها غير مصر ، وحتى لو هجرنا من بلدنا هنروح فين ... ومهما رحنا لازم نرجع لبلدنا بس لمن تبقى بلدنا كده ... أكيد هتخلي الواحد يفكر يسبها ويروح اي بلد تنيه فيها أمن وأمان

المشاركة الأصلية كتبت بواسطة Elawany13

تتبع الموبايل مش شرط يكون بالشريحة

سهل قوى يتتبعهوه بالسيريال نمبر بتاعه بغض النظر عن الشريحة الموجوده فيه
بس اهم حاجه يسلكوا ويهتموا ويشتغلوا بضمير
والمهم يكون عندك كارتونة الموبايل علشان السريال نمبر مكتوب عليه

وخد بالك الايفون فيه تطبيق بيتحمل عليه
تتقدر انت تتبعه زى الجى بى اس تراكر بتاع العربية
وتشوفه على الخريطة
وتتحكم فيه كمان

حبيب قلبي طب أنتا فكرك لو تتبعت الموبايل وقالولي ان مكان الحرامي في العشة الفلانية او في القرية الفلانية ورحتلو ... أول ماهشوفوا هيقولي مش أنا ومخدتش منك حاجة ... ويزعق ويلم عليا الناس ويلبسني قضية اني أتهجمت عليه في الفيلا بتاعتو أو بيتو أو عشتوو الصغيرة ده اذا مكنش عايش في وسط قطاع طريق وبلطجية وعلشان اخود قوة من القسم ونروح نجيبو من قفاه ههههههههههههههههه يافرحتي على القسم والشرطة والبوليس أسم النبي صاينهم وحرصهم ... بفكر أخود شوية بخور واروح أبخر قسم الشرطة الي جمبنا يمكن يكونو تحسدو ولا حاجة ... ولاعين صابتهم .

المشاركة الأصلية كتبت بواسطة hosar

قدر الله و ماشاء فعل و الحمد لله أنها سليمة
بث بقا انت أولا بعد ما تعمل محضر سرقة طبعا دا حيخليك فى أمان لأن حتى لو الحرامى عمل موضوع البيع و الشراء لأى حد تانى حتبقى أنت فى أمان يعنى انت إلى مبلغ بالسرقة الأول و دا حيخليك بعيد عن أى رد فعل غبى منة بالبطاقة و باقى المسروقات
ثانيا بالرغم اننا شايف انها مالهاش لازمة بس علشان انت تستريح خالص بيع العربية ليك أنت بحيث تبقى العربية موجودة فى حيازة شخص آخر غير إلى أسمة مدون على العربية و بالمرة أثبيت البيع فى المرور و غير النمر ( كدة بقا بيقى العربية و كل آثارها أتمحت بالتلاتة )(بس حبيت برضة أقولك الحل مع أننى شايف ان الموضوع كدة حيبقى كبير )
و كن مستعدا أن ممكن أى واحد يلاقى البطاقة و الرخصة يرجعهم ليك و يقولك انه لاقاها فى الشارع مثلا ... تعامل مع الموضوع بحسن نية ( قد يكون كذلك ) و لكن بحيطة ... أشكرة و أديلة إلى فية النصيب و بينلة انك خلاص عملت بدل فاقد و أن العربية خلاص أتباعت و الرخصة مش محتاجها بس برضة ألف شكر ليك على أمانتك .. يعنى و تعامل معاة

انا اقترحت عليها الموضوع بتاع حضرتك بعد ماقريت كلامك وياريتني ما قلتلها ... بقولها حبيبتي انتي اكتبيلي العربية باسمي علشان لو حصل انو عمل الحكاية الي قلتلك عليها دي نبقى في السليم ... قلتلي واللهي فكرة أنتا أكتبلي العربية الهوندا الار بي بأسمي وأنا أكتبلك العربية اليارس بأسمك ... ولمن تبقى عاوز تسوقها هدهالك هو انا هقولك لأ يعني ... قلتلها ياسلالالالالام وانا مالي ياحبيبتي بالموضوع ده انا كل الحكاية عاوز أحللك المشكلة ... بصيت لقيتها عيطت واتقمصت ... وانتا مستخسر العربية الجديدة في مراتك حبيبتك
وهيا العربية أهم مني ودخلنا في مهاترات ملهاش اي لزمة
http://www.nilemotors.net/Nile/279947-rb.html
قلت لنفسي ياريتني مافتحت السيرة دي ... وسكتها بكلمتين وقلتلها ان جواب المرور طالع بأسمي ولو رحنا المرور وغيرتها بأسم حد تاني هندفع غرامة 4000 جنيه ... بصيت لقيتها سكتت كده وقالت لي خلاص أحنا نروح مع بعض المرور ونسئل ههههههههههههههه بس انشاء الله وانا رايح ارخص هحاول انام بدري واصحى بدري وامشي انا بشويش وهيا نايمة ، ولمن ارجع هقولها انا شوفتك تعبانه فصعبتي عليا ومرضيتش اصحيكي .

المشاركة الأصلية كتبت بواسطة hosar

و الله من خلال دراستى ان أنسب حل هو تشريع قانون جديد للحرابة ( قاطعى الطريق) و يكون فية العقوبات مدرجة و آخرها الاعدام طبقا لما قام بة من تروع للناس و يكون تنفيذ العقوبة فى ميدان عام لتحقيق الردع

هما لو يشنقو المجرمين مجرم مجرم وحرامي حرامي البلد تنضف بقى وتخف الزحمة وتفوق من الناس دي بجد .

المشاركة الأصلية كتبت بواسطة tamertamer

بص انا بعد الموقف قالى مريت بية ناس طلعو علية امام باب القسم وفين يوجعك خلاص مبقتش تفرق معاية وعايز اسيب البلد واطفش

أده أده قدام القسم ... حصل أزاي الكلام ده ؟؟؟؟ وأيمتى ؟

المشاركة الأصلية كتبت بواسطة Myth

[/center]


الف سلامة للمدام وربنا يهدي ويصلح الحال .،. بس اعذرني انا مــُــت من الضحك علي المقطع اللي فات ده .،. حقيقي كوميديا سوداء لذيذة

ههههههههههههه الله يسلمك ياباشا .

المشاركة الأصلية كتبت بواسطة SaimOnatoR

أسهل طريقة انك تعمل محضر بالسرقة و فقدان البطايق و الرخص و تبلغ البنك إنه يوقف ال atm و بعد كدة تعمل محضر بالتليفون المسروق و بياناته و تروح عند شركة المحمول اللي انت تبعها تعمل عندهم تتبع و هم هيبلغوا عن بيانات الخط اللي اتحط في تليفونك دة اولاً، ثانيا بقى و دة الأهم إن التوكيلات في الشهر العقاري مش بتتم بالسهولة دي و لو تمت في مبايعة و المبايعة لازم تتسجل او يتعملها صحة توقيع و طبعا عشان الحرامي بتاع الشنط يجري ورا كل دة دي حاجة في نظري مستبعدة، بس للأمان روح إعمل بدل الفاقد للرخص في أسرع وقت و لو عرفت إنقل ملكية العربية من المدام ليك و سجل الملكية و بكدة حتى لو اللي انت خايف منه حصل تقدر بسهولة انك تثبت إن المدام مش مالكة العربية عشان تبيعها أصلاً، طبعاً هي إجراءات كتير و تعقيدات بس لما تخلصها حتطمن و ربنا يسترها معانا و مع الناس كلها.

صدقني العملية دي في بلد زي مصر كل حاجة فيها سبهلله أسهل شيء أنتحال شخصية حد ... ومفيش حاجة اسمها مطابقة صحة توقيع الكلام ده في البنك فقط حضرتك ... يكفي اني أقول لحضرتك أن 95% من الشهر العقاري في مصر لا يملك كمبيوترات ولا داتا بيز ولا شبكة أليكترونة ... أو معلومات متاحة ... والعملية ماشية عك في عك ... وبالنسبة لشركات الاتصالات انا عندي في البلاك بيري على ما اسمع كمان ممكن احدد مكانو وأحمي كل البينات الي عليه فبسئل فرحت الشركة سئلت 3 موظفين هناك وكل واحد يقلي معرفش وأقعد انتا حاول فيها حاجة أسمها BlackBerry Protect
ده لو انا بعيد عن الموبايل وحبيت امسح كل المعلومات الي عليه واحدد مكانو اقدر وكمان لو اشتريت موبايل تاني أقدر أستعيد بيناتي ... لكن مع الاسف الشركات او الموظفين مش فاهمين عارفين فيلم احمد حلمي عسل اسود ... يوم أجر عربية ووقف في الشارع بيسئل واحد أشغل الجي بي أس أزاي فرد عليه واحد قالو مش فاهم هو الكاسيت مالو بالضبط فيه ايه ههههههههه اهو نفس الحكايه على شركات الاتصالات في مصر حسرة علينا .

المشاركة الأصلية كتبت بواسطة adel13

فى الاول الف سلامة على المدام وفى داهية اى حاجة طالما هيا كويسة
تانى حاجة حضرتك لازم تعمل محضر وتقولهم ان الرخصة اتسرقت والبطاقة ورخصة السواقة
ولما حضرتك هتعمل المحضر دا هتروح على المرور علشان تعمل ورق فحص وتجديد تانى للعربية علشان الورق اللى اتسرق يبقة ملوش لزمة
ممكن حضرتك لو سالوك الحادثة دى حصلت امتى وكدا ولية مبلغتش من الاول ممكن حضرتك تقولهم انك كنت راكنها واتسرقت بس اهم حاجة انك لما تعمل المحضر لازم تروح المرور علشان تجيب ورق الفحص والتجديد للعربية علشان يتعملها رخصة جديدة

تسلم يا غالي ... انا فعلاً رحت عملت محضر ... ورحنا طلعنالها بطاقة جديدة بس هتستلمها بعد 15 يوم تقلش هيروحو أمريكا يطبعوها ويجيو .. المهم رحت المرور قالولي هتلنا صورة من كعب بطاقتها ونمرة العربية ونمرة المتور والشاسية واحنا نديك رخصة مؤقتة لغاية ماتجبلنا صورة البطاقة الاصلية هههههههههه طيب يا جماعة ماهي صورة البطاقة الاصلية موجودة في ملف العربية قالولي لا ملناش دعوة هيا دي الاجرائات ... ودوخة بعيد عنك واجرائات وروتين ... يعني بعد كده لو حرامي هيسرقك اديلو الفلوس والموبايل وقلوا ابوووس ايدك ابووس رجلك بلاش الورق بلاش الورق سيبلي الرخص ... خود العربية وادي المفتاح بتاعها اهووو بس سيبلي البطايق والرخص ... فعلا بلد فستك بستك كل حاجة فيها ورق في ورق ... تصدق الورق أهم من البني أدم ذات نفسو .