الموضوع: حل مشاكل التكييف

المشاركة الأصلية كتبت بواسطة joe_techno

انا في اول الصيف رحت شحنت التكييف عند المراكبي في جسر السويس و غسل السربنتينة و كله تمام بعدها بجرب التكييف ظهرتلي مشكلة غريبة التكييف اول ما بشغلة بيبقي تلاجة بعد ساعة تبتدي كمية الهواء اللي خارجة تقل بس برضة ساقع زي ما هو , بعد ساعتين تقريبا بلاقي مفيش هوا بيخرج خالص مهما عليت المروحة مع اني ببقي سامع صوت المروحة بس مفيش هواء خارج لما سألت قالولي المشكلة في الكهرباء ممكن تكون cut out او فيوز مش عارف بقي هل الكلام ده صحيح ؟

مشكلة حضرتك سببها تكون التلج على تلاجة المكيف الداخلية مما يؤدي لانسدادها
طب ده من ايه
المكيف مش بيفصل... طب ليه؟؟
المكيف ليه كذا ميكانيزم فالفصل



اولهم واللي له علاقة بالموضوع ده... حساس حرارة موجود فالتلاجة... وده بيفصل المكيف اما الحرارة بتاع التلاجة توصل لـ 1 مئوية...ويفضل فاصل شويه على ما الهوا يدوب التلج... في معظم السيارات الحساس ده يكون متوصل بفيشه مستقلة طالعه من علبة التلاجة الى كونترول المكيف... فممكن يكون اثناء الشغل الفيشه بتاعه اتفكت (عادة بيكون فيشه واحدة مستقلة وبسلكين)

تانيهم ده حساس الضغط وده راكب في حوض الموتور قرب صدر العربية على المواسير بتاع الفريون (مش متذكر اذا كان الباردة وللا السخنة)... ودي وظيفتها ان الضغط اما يوصل نقطة معينة يفصل وده مهم للحفاظ على عمر الكومبريسور... وممكن يكون عبقرينو لقاه بايظ فاستسهل ولغاه او مخدش باله انه يفحصه



التالت... ميكانزم الحماية وده عبارة عن حاجة من اتنين
لو عربية كربيراتير هيبقى فيه حساس حرارة راكب في دورة مياة التبريد واول ما حرارة الميه تعلى عن 100 (تقريبا) بيفصل المكيف عشان السخونة الزايدة متحملش عالموتور
وكذلك الحال لو كانت العربية انجيكشن بس الفصل بييجي من كونترول الموتور بتاع العربية

الميكانيزم الاخير... وده في حالة لو حضرتك كنت مشغل المكيف وماشي عالطريق وكبست بنزين للآخر (كيك داون) لمدة 10 ثواني... ده بيفصل الكومبريسور

المشاركة الأصلية كتبت بواسطة omarkhaled55

انا عندى مشكلة فى التكيف وهى ان طول ما الجو برة حلو التكيف تلاجة وطول ما العربية مش سخنة التكيف تلاجة
اول ما العربية تسخن تعدى النص كدة الكمبروسور بيطفى والتكيف يبقى مروحة بس حتى وانا دايس على زرار ال ac
دى كدة ممكن تكون مشكلة اية ؟؟؟
مع العلم مستوى المياة فى اربة المياة عند الماكس ؟؟؟؟

دي ميكانيزم حماية للموتور عشان ميسخنش زيادة

حضرتك دور على اسباب سخونة العربية نفسها ايه؟؟

ممكن ترموستات الكوع يكون قافش... الردياتير مسدود... غطا الردياتير كاوتشته بايظة... مروحة الردياتير ضعيفة... الردياتير نفسه الزعانف بتاعه مسدودة من كتر التراب اللي عليها او تكون متنيه

لازم تخلي مروحة الردياتير تلقط من مروحة التكييف ويشتغلوا الاتنين مع بعض وللا لأ

المشاركة الأصلية كتبت بواسطة dandashx

أولاً: شكرا لمجهوداتك في الرد على استفسارات الأعضاء، وجعله الله في ميزان حسناتك

السؤال عندي: من 3 أيام بالضبط، صوت الموتور بقى عالي جداً لما اشغل التكييف. وكل لما ال rpm يزيد كل لما الصوت يزيد، الصوت مش عارف أوصفه، عامل زي ورررررررر كده، مع العلم إني شاحن فريون من 10 ايام تقريباً، وأدااء التكييف معايا كويس من بعد الشحن ولحد دلوقتي الأداء بالنسبالي مقبول جداً، بس الصوت اللي مزعج.

العربية كليو 2003 1200 سي سي

يا ترى المشكلة في ايه، ولو فيه قطعة غيار هحتاجها، ياريت تقول سعرها التقريبي بالمرة

وجزاك الله خيراً

حضرتك هي العربية انجكشان وللا كاربراتير؟؟