المشكلة بتوضيح أكتر،
طول مالعربية عالسلانسيه مفيش صوت من التكييف
أول مادوس بنزين باسمع صوت تخبيط. وده في حالة ان التكييف شغال.
أفصل التكييف من زرار ac الاقي الصوت يختفي.
أرجع أشغل التكييف الصوت يظهر تاني
الصوت بيعلى مع زيادة ال rpm كل لما ادوس بنزين أكتر
الصوت بيختفي نهائياً، بمجرد مادوس دبرياج، ويرجع تاني لما أعشق على اي سرعة وأي غيار
أنا رحت للمراكبي بتاع التكييف في جسر السويس وقلتله عالمشكلة، خد بصة في السريع والعربية واقفة، وبعدين قاللي دوس بنزين سنة صغيرة عشان يسمع الصوت بنفسه، وفي خلال 20 ثانية قاللي والابتسامة في وشه ... الكباس بايظ
وطبعاً، حسيت إني عايز أبيع العربية ونا واقف في مكاني من خنقتي. قلتله التكييف كان زي الفل، ولسه شاحنه من 10 أيام وأساسا أنا استخدامي ليه معتدل، ايه اللي خلاه يبوظ، قاللي هو كده عمره الافتراضي خلص.
طب بكم الكباس، بص عليه وقاللي ده ب 1800، قلتله طب مفيش استيراد؟ قاللي فيه بره بس بلاش تجيب استيراد، وبعدين سبته ومشيت.
رحت لواحد تاني بتاع تكييف جنبنا، شرحتله الوضع، قام قاللي الكباس بايظ هو كمان. بكم الكباس ياعم الحج؟ ب 2000. طب فيه استيراد، قاللي فيه بس انت ونصيبك. ممكن نصيبك يكون في كباس حلو وخصوصا انهم مش بيستخدموا التكييف برة كتير، وممكن تجيب كباس يبوظ بعد شهرين. سألته طب هو بكم الاستيراد؟ ب 600 جنيه تقريباً
قلتله لو جبتلك كباس هتعرف انه كويس أو وحش؟ قاللي بمجرد ماركبه واشحنه، هاعرفلك من صوته حالته ايه؟ قلتله قشطه فيه ناس بتبيع كباسات بضمان اسبوع، قاللي هتبقى حاجة كويسة، بس لو الكباس طلع بايظ هتخسر فلوس شحن الفريون، ومفيش طريقة نجرب بيها الكباس غير لما يتشحن. واخر سؤال سألتهوله؟ ينفع استنى عالكباس ده قد ايه لحد لما يبقى فيه فلوس واغيره؟ قاللي طول ماهو مش بيعمل صوت عالسلانسيه، ممكن تستنى، لكن أول ماتسمع صوته عالسلانسيه إياك تشغله. ولو هتمشي بيه دلوقتي متضغطش عليه كتير، عشان هيعمل رايش والرايش هيبوظلك السربنتينة
السؤال دلوقتي: ايه رأيكم في المعلومات دي، وهل فيه حاجة تانية ممكن أعملها وتحل المشكله بعيد عن تغيير الكباس؟ طب ايه رأيكو في كباس استيراد؟ ولو استيراد أو جديد، اجيب نوعه ايه وسعره في حدود كم؟ وأخيراً، تكلفة تركيب الكباس وتنضيف دورة التكييف كلها وشحن الفريون هتعمل كم على بعضها تقريبا؟
اللهم أجرني في مصيبتي، واخلف لي خيراً منها
المفضلات