الموضوع: كباريه و الريس عمر.. هي دي مصر؟

بالرغم من اختلاف الآراء، إلا ان الحوار ثري و راقي إلى حد مرضي :)

طيب انا هاحط ردي في نقاط:

1- بالرغم من تشعب الحوار حابة بس أذكر بعنوان الموضوع.. كباريه و الريس عمر.. هي دي مصر؟ و تسائلت عن مغزى نزول فيلمين في وقت واحد الأول بيصور حياة الكباريهات و التاني بتدور أحداثه في صالة قمار و تسائلت عن النماذج الجيدة في البلد.. مافيش يعني خلاص نموذج واحد كويس لشخصية تطرح ضمن أحداث الفيلم الواحد يحس من خلاله ان فيه أمل في البلد دي؟

2- بالنسبة لفيلم كباريه معظم اللي شافوه أثنوا عليه و واضح انه فيه فكرة بالرغم من إعتراض البعض على مشاهد الرقص الخليعة اللي فيه.

3- بالنسبة للريس عمر فأنا بالرغم من اني ما شفتش الفيلم إلا ان اعتراضي مش ع الفيلم في حد ذاته، انما على المخرج و إسلوبه الفج في عرض المشاهد ذات الصبغة الجنسية و التركيز عليها بطريقة مبالغ فيها و قلت اني مقاطعة لأفلام خالد يوسف من ساعة ما اتهورت و شفت فيلم حين ميسرة.

4- نقطة توضيح بس بالنسبة للمشاهد اللي بنتكلم عنها دي و اللي عدد من الأعضاء هنا أشاروا بأهميتها دراميا.. انا بس عايزة أقول اني و لله الحمد دراستي في كلية الآداب قسم اللغة الانجليزية أتاحت لي اني أدرس جانب من الفن و النقد الأدبي و من ضمن ما درسنا هو ان العمل الفني الجيد هو اللي يقدر رب العمل انه يقدمه بأقل قدر ممكن من التفاصيل.. أما الإغراق في التفاصيل ده فبيظهر لنا مخرج مش متمكن من أدواته كويس و مش قادر انه يوصل لنا الفكرة كاملة عن طريق الإيحاء. فبالرغم من ان المفروض ان خالد يوسف مخرج متميز، إلا انه عجز عن انه يوصل لنا مشاهد معينة من غير ما يأذينا.. على سبيل المثال مشهد الاغتصاب في فيلم حين ميسرة.. كان ممكن بمنتهى البساطة ان الكاميرا تتنقل بين الغرفة اللي فيها سمية الخشاب و المغتصبين و برة الغرفة اللي فيها الشاب و هو بيتعاطى المخدرات.. في تصوري انه كان هايكون أفضل كتير لو الكاميرا فضلت تتنقل هنا و هناك لحد ما تفاصيل عميلة الاغتصاب بدأت، هنا الكاميرا كانت هاتثبت على الولد اللي بيتعاطى المخدرات و بيتقطع بين رغبته في إنقاذ المغتصبة و بين رغبته الجامحة في تعاطي المخدرات اللي في إيده.. و في الخلفية الصراخ بتاعة المغتصبة شغال.. لحد الحتة بتاعة الولد و هو بيقرر إسكات ضميره بجرعة زائدة من المخدر و ينتهي المشهد على كده. هل المشهد بالطريقة دي مش مفهوم؟.. هل الأحساس ما وصلناش ببشاعة الاغتصاب و عبودية المدمن للمخدرات؟.. هو خالد يوسف مستغبينا اوي كده عشان يورينا مشهد الاغتصاب بتفاصيله المؤذية دي؟ و بعدين فيها إيه لما المخرج يرمز باللي بيحصل في المشاهد دي بشمعة تنطفي و لا إزاز شباك يترقع و لا اي من الحاجات دي؟ طيب ماهي مدارس فنية كاملة قايمة على الرمزية.. يعني الرمزية مش عيب، ده لو ما سلمناش بإنها مطلوبة في أحيان كثيرة منها المشاهد اللي بنتكلم عنها دي.

راجعة أكمل ان شاء الله عشان كده طولت اوي في رد واحد :)

بالنسبة لنقطة للكبار فقط هي الحكاية مش كبار و صغار.. هو انا ينفع تحت اسم للكبار فقط أقدم فيلم من إياهم و بعدين اللي يسألني أقول له ما انا حاطط يافطة للكبار فقط؟؟ و هي يعني المشاهد اللي بيقدمها خالد يوسف مش صادمة للكبار؟ انا من ساعة ما شفت حين ميسرة و انا فهمت الرسالة اللي عايز خالد يوسف يوصلها للناس.. الرسالة محتواها هو ان هي دي طريقتي في تقديم أفلامي القادمة و اللي يقبل بشروطي يدخل أفلامي و اللي مش قابل ما يدخلش.. و بالفعل صدقت توقعاتي و جه الريس عمر أسوأ بكثير من حين ميسرة من حيث المشاهد إياها و المبالغة في تصويرها و ده بشهادة كل اللي شافوا الفيلم و منهم ناقدة سينمائية مستاءة من الطريقة دي.

شكلك كده تقصدني .. عموما كتر خيرك .. بس انت برده مردتش علي سؤالي

أستاذى العزيز أدهم .... و أنا بكتب الرد مكنتش حاطط فى دماغى حد معين ... و كنت أقصد كل الناس اللى بتكتب آرائها عن حاجة لم تختبرها ... و أسف لو كنت ضايقتك ... ده إحنا هنا كلنا إخوات. :)

الناس اللي بتقول ان مشهد الإغتصاب مفيد ...
كنت عاوز اسألهم يا تري يرضوا ان اختهم او امهم تقوم بالدور ده علشان توضح المعاناه والمأساه ..يعني الأغراض النبيله والكلام الكبير ده ؟؟؟ أترضاه لأختك ؟؟ أترضاه لأمك ؟؟

حضرتك أنا مبحبش الأسئلة اللى من النوعية دى ... بس ما دام حضرتك مصر .... هجاوبك عليه من وجهة نظرى الخاصة.

لازم أولاً نقسم الممثلين .... فى منهم محترمين و قى منهم زى الزفت
الممثلة اللى بتمثل مشهد الإغتصاب ممكن تكون نيتها مش سيئة ..... و يكون هدفها فعلاً هو توصيل رسالة .... بقول ممكن ... يعنى حسب الممثل و نيته.

لو أخدت مثال على الفنانة سمية الخشاب ..... لما بتفرج على لقائتها بحس إنها طيبة جداً و مش قصدها وحش من أى مشهد بتمثله ... بالعكس دى مرة ذكرت إنها دايماً بتاخد رأى والدتها فى المشاهد دى ... فأنا اللى حسيته إنها كويسة و مش زى ناس تانيين.

أما بخصوص أمى أو أختى .... فمش هعمل فيها حمش و أقول لع و هقتلها لو فكرت بس تعمل كده .....لكن أنا واثق فى تربيتها و أخلاقها ... و لو إختارت إنها تكون ممثلة .. أنا عارف كويس هى هتختار إيه ... و كمان واثق فى القرارات اللى هى هتاخدها .... بالإضافة إلى إنها مش قاصر و المفروض عارفة الصح من الخطأ .... و أكتر حاجة ممكن أقدمها هى نصيحة ... مش أكتر.


و كمان كل واحد و وجهة نظره
ممكن واحد يشوف مشهد إنه سىء و مخل و واحد تانى يشوفه مشهد رائع و هادف.

بالنسبة لنقطة للكبار فقط هي الحكاية مش كبار و صغار.. هو انا ينفع تحت اسم للكبار فقط أقدم فيلم من إياهم و بعدين اللي يسألني أقول له ما انا حاطط يافطة للكبار فقط؟؟ و هي يعني المشاهد اللي بيقدمها خالد يوسف مش صادمة للكبار؟ انا من ساعة ما شفت حين ميسرة و انا فهمت الرسالة اللي عايز خالد يوسف يوصلها للناس.. الرسالة محتواها هو ان هي دي طريقتي في تقديم أفلامي القادمة و اللي يقبل بشروطي يدخل أفلامي و اللي مش قابل ما يدخلش.. و بالفعل صدقت توقعاتي و جه الريس عمر أسوأ بكثير من حين ميسرة من حيث المشاهد إياها و المبالغة في تصويرها و ده بشهادة كل اللي شافوا الفيلم و منهم ناقدة سينمائية مستاءة من الطريقة دي.

بتختلف يا أستاذة علا حسب المتلقى ..... يعنى لو طفل صغير... أكيد مش هيفهم المشاهد دى ... و كمان هو لسه منضجش لدرجة إنه يفهم معنى المشاهد دى .... و تأثيرها عليه هيبقى سلبى.

أما الكبار بقى .... ففى منهم اللى هيفهم ...و للأسف فى منهم اللى عقله معداش طفل صغير.

المشاركة الأصلية كتبت بواسطة meza

لازم أولاً نقسم الممثلين .... فى منهم محترمين و قى منهم زى الزفت
الممثلة اللى بتمثل مشهد الإغتصاب ممكن تكون نيتها مش سيئة ..... و يكون هدفها فعلاً هو توصيل رسالة .... بقول ممكن ... يعنى حسب الممثل و نيته.

لو أخدت مثال على الفنانة سمية الخشاب ..... لما بتفرج على لقائتها بحس إنها طيبة جداً و مش قصدها وحش من أى مشهد بتمثله ... بالعكس دى مرة ذكرت إنها دايماً بتاخد رأى والدتها فى المشاهد دى ... فأنا اللى حسيته إنها كويسة و مش زى ناس تانيين.

ده كده يبقى انت انسان فعلا نيتك طيبة اوي.. انا باتكلم بجد :)

و كمان كل واحد و وجهة نظره
ممكن واحد يشوف مشهد إنه سىء و مخل و واحد تانى يشوفه مشهد رائع و هادف.

طيب اسمح لي أختلف معاك في دي.. فيه حاجات مش بتخضع اوي لوجهات النظر على أد ماهي ممكن تخضع لرؤى متخصصين، يعني ممكن مشهد من المذكورين دول يختلف على رؤيته الفنية اتنين نقاد فنيين او دارسين فن من ناحية الحبكة الدرامية و أهميته دراميا من عدمه.. انما ان اتنين عاديين يشوفوا نفس المشهد و واحد منهم يقول عليه مشهد رائع و التاني رأيه انه مشهد زبالة فدي لا تعتبر وجهات نظر على أد ماهي توجهات تحكمها خلفيات مالهاش دعوة بالفن كحرفة في شئ.. ده رأيي.

المشاركة الأصلية كتبت بواسطة meza

بتختلف يا أستاذة علا حسب المتلقى ..... يعنى لو طفل صغير... أكيد مش هيفهم المشاهد دى ... و كمان هو لسه منضجش لدرجة إنه يفهم معنى المشاهد دى .... و تأثيرها عليه هيبقى سلبى.

أما الكبار بقى .... ففى منهم للى هيفهم و فى منهم اللى عقله معداش طفل صغير.

طيب خلينا نتكلم بواقعية بعيدا عن المسميات اللي اخترعتها السينما الأمريكية بتاعة للكبار فقط و للصغار فقط دي و نقيس بمقاييسنا احنا مش بمقاييس ناس كل اللي يفرق معاها في الفيلم هايشوفه كبار و لا أطفال. ده غير ان مصطلح للكبار فقط ده أصلا يضحك.. آل يعني اللي عنده 18 سنة ده خلاص ما بقاش يتخاف عليه من أفلام فيها مشاهد زي دي، انما المهم ان ما يشوفوش أطفال.

انا طبعا مش قصدي أحجر على رأيك في الموضوع ده.. ده رأيك و انت حر فيه.. انما عايزة اسألك سؤال هل انت شايف المشاهد اللي من النوع ده عادية و ما بتلفتش نظرك أصلا و لا شايفها ملفتة للنظر بس ضرورية للسياق الدرامي و لو اتخففت حدتها شوية او لو شلنا بعض التفاصيل السياق الدرامي هايتأثر؟ سؤال منتظرة إجابته :)

ده كده يبقى انت انسان فعلا نيتك طيبة اوي.. انا باتكلم بجد :)

و أنا بتكلم جد صدقينى .... و المشاهد اللى مثلتها مكنتش مبالغة قوى حسب ما أنا شايف.
عارفة ... حتى لو الكاتب و المخرج و الممثل نيتهم وحشة من ورا المشهد ده ... أنا ممكن أبص ليه من ناحية تانية و أفهم معانى أكبر من الكلام الفاضى ده.
أنا عارف إن معظم شبابنا متربوش على كده .... و التأثير العام عليهم سلبى ... و دى مشكلة تربية فى جيل كامل من الشباب.

طيب اسمح لي أختلف معاك في دي.. فيه حاجات مش بتخضع اوي لوجهات النظر على أد ماهي ممكن تخضع لرؤى متخصصين، يعني ممكن مشهد من المذكورين دول يختلف على رؤيته الفنية اتنين نقاد فنيين او دارسين فن من ناحية الحبكة الدرامية و أهميته دراميا من عدمه.. انما ان اتنين عاديين يشوفوا نفس المشهد و واحد منهم يقول عليه مشهد رائع و التاني رأيه انه مشهد زبالة فدي لا تعتبر وجهات نظر على أد ماهي توجهات تحكمها خلفيات مالهاش دعوة بالفن كحرفة في شئ.. ده رأيي.

كلامك صحيح ... وللأسف معظم الشباب فى مصر مش بيقدر يكون وجهة نظر .... على قد ما بتكوت توجهات تحكمها خلفيات زى ما حضرك ذكرتى.
بس المشكلة هنا فى الشباب أنفسهم .... لو عودناهم يبصوا للأمور بمنظار أكبر و أعقل من كده .... مكناش هنواجه مشكلة زى دى.
جيل الشباب الحالى عنده شغف جنسى رهيب ..... يختلف من شخص لآخر لكنه بالمجمل عبر مرحلة الخطر و أصبح فى مستوى قد يؤدى إلى كارثة بهذا الجيل.

على فكرة أنا رأيى إن عرض مشاهد زى دى على النوعية دى من الشباب ... سلبياته أكتر من إيجابياته .... لكن هل الحل فى منع المشاهد دى تماماً .... أم إصلاح الشباب من الناحية الآخرى؟
حضرتك جاوبينى على السؤال ده و أنا هرد على حضرتك