الموضوع: حصريا على نايل موتورز وبس، اول تقرير عن بيجو 508 الجديدة

المشاركة الأصلية كتبت بواسطة maskeen

الف مبروك يا صاحبى...انا اللى كتبت التقرير الاول عنها..هى عربية زوجنى وعاملين بيها 7000 كيلو جتى الان.

انا ليا نقطتان مختلف معاك فيهما, الاولى نقطة عزل الصوت, انا شايف ان العزل فيها دون المستوى خالص, يعنى انا بابتدى اسمع صوت الهوا من سرعة 80 كم..وعلى 140 بيكون واضح جدا
ثانيا موضوع الكراسى..انا احساسى انهم ضيقين بدون داعى وكان ممكن يبقوا اعرض من كده وحصوصا ان فيه حوالى 5 سم فراغ بين جنب الكرسى والباب.

ألله يبارك فيك يا حبيبى، اهلا بيك

بالنسبة لنقاط الاختلاف فانا هقول وجهة نظرى بردو عشان الناس تستفاد ولوجهة نظرك كل الاحترام بجانب انى مقتنع بكلامك فانا بقارن بالسكودا وانت بتقارن ب5 series وانا جربت الاتنين وعارف الفرق بينهم كويس..

بالنسبة للهوا هو انت بتسمع صوت الهوا وانت قافل الازاز ولا وهو مفتوح سنة (معلش اصل انا مش بسمعه خالص او انا سمعى تقيل :)) بس هقوللك على حاجة انا بالنسبالى العزل يكون افضل لو انا مش سامع صوت الموتور او الناس والعربيات حوليا فى اشارة مثلا وانا الحمد لله مش بسمع الموتور ولا الكلاكس اساسا، عموما لما ارجع اجازة هجرب موضوع الهوا دا تانى واركز معاه بس الموتور والكالاكس انا متأكد من انهم مش مسموعين خالص واخيرا لو صوت الهوا بس اللى واضح ممكن تكون كاوتشة الباب عاوزة تتظبط، فى نفس الحوار دا فى الاوكتافيا الA5 والفانتازيا بتتظبط ومافيش هوا بيتسمع خالص من بعدها..

بالنسبة لموضوع الكراسى فهى حجمها فعلا اكبر من الاوكتافيا والباسات وممكن انت تكون حاسس انها ضيقة عشان الاجناب بتاعتها عالية وانت ساقط فى المنتصف بس دا يخليك متثبت فى الكرسى كويس فى الملفات مثلا واعتقد اننا بنقارن بحاجتين مختلفين يعنى انا بقارن باوكتافيا وانت بتقارن اكيد يعربيتك ال525 فاكيد هى افضل من الاوكتافيا فى الوسع واقل من الBMW، كمان انا والدى ما شاء الله طولى وعرضى مرة ونص "ضخم يعنى" وهو معاه فانتازيا وكان عاجبه الوسع اللى هو اكبر من عنده.

واخيرا كلامك عنها فى المشاركة اللى انت كتبتها كان احد الاسباب اللى خلانى اطمنلها لان اللى انت كنت حاسه عيوب فيها كان موجود عندى فى الاوكتافيا اكتر شوية فلو دى العيوب تبقى العربية بالنسبالى مافيهاش عيوب :)) ..

وعلى فكرة اللى انا متفق معاك فيه 100% موضوع الاضائة ده هى فعلا كانت محتاجة Projector tn لجمع وتركيز حزمة الضؤ اكتر يعنى ممكن نقول تقييم الاضائة جيد مش ممتاز، بس بالنسبة للزجاج الخلفى فهو اكبر من الاوكتافيا 1.5 مرة لان الاوكتافيا ازازها مايل جدا عن البيجو فالرؤية لا تتعدى 25 سم بالطول حتى المرايات انا كان معايا أفيو ومراياتها نفس حجم البيجو وبالنسبالى طالما بتتلم خلاص (من غير تريقة موقف كوميدى انى تانى يوم ما كنتش عارف بتتلم ازاى فبطلت العربية وقفلتها عشان اعدى واحد:))..

ربنا يبارك للمدام فيها ويباركلى انا كمان ان شاء الله.

قوللى انت بقى عملت فى صيانة ال2500 والتوكيل ايه نظامه وقطع الغيار والعربية عاملة ايه بعد ال7000 كم، انا ما سدق لقيتك، ادينى شوية معلومات بقى :))

بالمناسبة انت جايب لون ايه عشان لو جايب ابيض حقد عليك عشان ملقيتوش خالص وجبت بلاتينيوم...