الموضوع: اللى بيقارن الكورى بالاوروبي واليابانى ازاى تدفع 150الف ومافيش Safety ولا Stability..

المشاركة الأصلية كتبت بواسطة tamerosman

اولا ان مش ضد الكورى خالص ، بالعكس انا ركبت عربيتين كورى على الزيرو و اخدت خيرهم و بعتهم و كانو مريحنى جدا و بعتهم بسعر كويس ( لانوس 2001 - ركبتها 3 سنين و النترا 2005 ركبتها 5 سنين ) ...... الفكرة ان ايام ما كنت باشترى كورى كان سعرها منافس جدا ... اللانوس اشترتها زيرو ب 43 الف جنيه فى 2001 و الالنترا اشترتها فى السعودية فى 2005 ب 33 الف ريال .... يعنى كانت بنصف تمن التويوتا كورولا فى الوقت ده ..... انما لو كانت بتمن اى عربية يابانى فى نفس الفئة استحالة كنت فكرت اشتريها

العربية الكورى ميزتها انها عربية اقتصادية سواء فى سعر الشراء او تكلفة التشغيل ...و لو فقدت الميزة دة تبقى خارج المنافسة ...... و ذلك للاسباب الاتية:

مواصفات الصناعة بتاعة الكورى اقل بكتير من الالمانى و اليابانى و ده حاجة مش بتتشاف بالعين المجردة يعنى سمك الصاج المستخدم فى الشاسيه و البودى و نوعيته بتكون بمواصفات اقل

عفشة اقل تقدما ،،، مواصفات امان اقل .... اليابانين و الالمان بيصرفوا مبالغ طائلة على تصميم و تطوير العربية و موصفات الثبات و الاتزان و الامان .... و ده سبب ان الشكل فى اليابانى و الالمانى مش بيتغير كل 3 سنين زى الكورى

نرجع بقى لموضوع الثبات

انا عندى الاحساس ان العربية ثابتة و متزنة شى مهم جدا .... بمعنى انك لو راكب عربية ثباتها مش قوى هتبقى قلقان و انت بتجرى و لو حصل اى موقف طارى يخليك تاخد غرزة علشان تتفادى حادثة او فردة كاوتش ضربت و انت على سرعة عالية العربية هتعوم منك .....انما لو عربية ثابت و و متزنة زى الالمانى او المازدا 3 او السيفيك هتقدر تتحكم فى العربية بسلاسة وتبقى مطمن و انت سايق


من الاخر لما ادفع 150 الف فى النترا و ابقى خايف و انا ماشى فوق 120 يبقى حرام فيها الفلوس .


انا قبل الالنترا كنت راكب مازدا 3 و كانت فى منتهى الثبات و الاتزان و قمة المتعة فى السواقة اضطريت ابعها لظروف السفر و اركب النترا 2005بعدها حسيت بفرق رهيب فى الاداء لصالح المازدا 3 ( علما ان موديل الالنترا 2005 الى كانت معايا تعبر من اثبت موديلات الالنترا لانها واطية و عفشتها الخلفية تعليق مستقل )


من الاخر لما يكون معايا 150 الف ليه ادفعهم فى عربية عشان شكل و شوية تنفيخات و عدادات ديجتال و اضحى بحاجات اهم زى الثبات و الاتزان و انى اركب عربية معمرة تحافظ على رونقها على الاقل 10 سنين زى الاوكتافيا مثلا .... و شوف الاوكتفايا الى بقالها ماشية 15 سنة عاملة ازاى ... هتلاقيها واقفة زى الاسد و الهيونداى موديل نفس سنتها عاملة ازاى ...هتلاقيها ماشية تشخلل

دى وجهة نظرى بعد ركوب الكورى 7 سنين من الزيرو ....مع كامل احترامى للكورى كعربية من ناحية الاقتصاد فقط و ليس كاداء و اسف على الاطالة.

ما هو لو عربية ب 150 الف مفروض تكون ثابتة على 180 بغرز قطم ( بغض النظر ان جنون المشي على سرعات زي دي وخروج عن القانون وكمان في مصر ) يبقى ال sports cars مفروض يعملوا ايه