الموضوع: صيانة الألف كيلو متر - نيسان صني الجديدة

سلام عليكم ياشباب

بما ان العبد لله مشواره اليومي يتعدى الـ 120 كيلو متر على أقل الفروض ...., فخلال أول أسبوع عملت بالعربية ألف كيلو !!!


شعور عجيب انك تبقى لسة مستلم وبتحجز صيانة, يالله أهي الحمدلله غانيانا عن سؤال اللئيم (وسائل المواصلات بكافة أنواعها)



استلمت العربية من السبع, فرع مصر الجديدة. وكان معاها هدية ان صيانة الألف كيلو وكمان الـ 5,000 مجاناً شاملة الزيوت والمصنعيات, فالحمدلله مادفعتش قرش !!


ملحوظة: كل اللي ربنا أكرمهم باستلام النيسان الجديدة لازم يعملوا تفعيل للضمان , انت بس اتصل بنيسان على 16244 وقول لهم انك عايز تفعل الضمان, هايسألك عن بياناتك الشخصية وبيانات العربية وبيانات ترخيصها, ويديك كود (احتفظ بيه كويس علشان هاينفعك وقت الصيانة) , الكود ده يفضل معاك على طول بإذن الله لأنه بيقول لأي توكيل بتروح له انك مشمول بالضمان.


تحديد المعاد: كان قبلها بحوالي أربع أيام, الحجز ماشاء الله شديد جداً رغم اني حاجز أول معاد الساعة 10 الصبح بس لقيت ناس قبلي !! وكل واحد كان مستني دوره بفارغ الصبر


المكان : حتة مقطوعة محدوفة في أواخر دجلة في زهراء المعادي, هي قريبة من نادي وادي دجلة .... تحت الجبل على طول !!!





المهم, مهندس الصيانة بعد مابيسألك عن ملاحظاتك على العربية وعايزهم يبصوا على إيه زيادة فيها, بيطلع يعاينها ويستلم منك مفتاحها (وطبعاً تشيل أي متعلقات شخصية ليك منها) ... وهنا عندي ملاحظة:

رغم نسياني لبعض الحاجات في العربية وكنت فاكر اني أخدتها, لقيتهم مسكوا كل حاجة فيها (حتى الولاعة ! ) شالوها حطوها في كيس مطبوع عليه اسمهم, وقفلوه وشالوه في شنطة العربية, ودي حاجة تحسب لهم بشدة.


بتطلع في الانتظار - انت مضطر تنتظر لأن الحتة مقطوعة ومافيهاش مواصلات غير بعيد جداً - وبتشوف الورشة من تحتك وعربيتك بيتعمل فيها إيه.


قدام عيني حصل التالي:

- قبل مايفتحوا أي حاجة عملوا فحص كامل على الأنوار والمصابيح كلها, على الزجاج الكهربا والمرايات, وعلى المساحات والمية بتاعتها.

- فكوا فلتر التكييف ونضفوه بالهواء

- نضفوا الموتور كله بضغط الهواء

- غيروا الزيت (بيسألك عايز زيت خمستلاف ولا عشرتلاف - اخترت خمسة علشان هايتغير تاني بعد صيانة الخمستلاف الجاية ان شاء الله).


- كان فيه صوت للفرامل على السرعات البطيئة (الزحف بتاع كوبري أكتوبر وأول المحور ) , وقاللي المهندس ان كدة طبيعي جداً وده صوت احتكاك عادي...ياريت أي حد عنده خبرة يفيدنا لأنه مش صوت صفارة, ده عامل زي المقطورة وهي بتقف بس على خفيف !!

المهم اني ماشفتش حد فك الكاوتش علشان يبص على التيل...يظهر ان الصوت ده مش مشكلة بالنسبة لهم.


-عملوا تربيط للعفشة , ولاحظت انها أصلاً ماكنتش اتفكت - رغم كل الهبد والدب والرزع اللي الطرق المصرية بترحب بينا بيه - وبصراحة العربية عليت في نظري من ساعتها ماشاء الله تستحمل طرقنا الميمونة !



- كنت لسة مركب طاسات الكاوتش (وبالمناسبة كاوتش ماكسيس اللي راكب فيها ضروري يتغير علشان صوته عالي وناس كتير بتعيب فيه ..وان شاء الله أغيره بعد ماعمل الأربعين ألف كيلو - كمان شهور ان شاء الله ).

المهم اني كنت دايخ مش لاقي الأفيز البلاستك اللي بيمسك الطاسات ولفيت عليه كتير ... لقيتهم من نفسهم عملولي كل الكاوتش من غير ماقول ...وده شئ مشكورين جداً عليه.


المفروض العربية بعد مابتخلص بتتغسل (موتور وجسم خارجي)...هما غسلوا الموتور وقلبوني ...عموماً كدة كدة غسيل الجسم الخارجي مش هايكون له لازمة بعد ماتطلع من عندهم في سفح الجبل ده !! المكان مترب قوي وهايبوظ كل حاجة اتعملت.


المتابعة: اتصلوا بيا يومها يفكروني بالمعاد (وكنت خلصت تقريباً) .... واتصلوا بيا تاني يوم يعرفوا رأيي في الخدمة , وقلت على ملاحظاتي , بس الخدمة بشكل عام ممتازة جداً.



الأداء بعد الصيانة: دلوقتي عامل حوالي ألف ونص, الأداء اتحسن طبعاً بس ماحدش يتوقع انه يكون اختلاف جذري , لأن العربية أصلاً مش محتاجة تليين شديد ولا حاجة, محتاجة انك تراعي ان الموتور لسة جديد والأجزاء المعدنية بتتطبع على بعضها, استهلاك البنزين اتحسن بس مش كتير, هي أصلاً بتعمل 550 كيلو بالتانك اللي هو أصلاً 41 لتر !! أعتقد حد عايز تحسن أكتر من كدة يبقى مفتري !!


أداء التكييف اتحسن , رغم اني مش أنصار فكرة انك ماتشغلش التكييف أول ألف كيلو , وفعلاً المهندس قاللي التكييف مالهوش دعوة بأول ألف كيلو شغله عادي, بس بصراحة انا مشغله على 2 وقاعد في التلاجة , ماكانش كدة قبل الصيانة بصراحة.



وليا ملحوظة أخيرة على دواسة البنزين : تحس انها شغالة ببرنامج كومبيوتر, محتاجة قدم حساسة جداً في الأول, وبعد كدة بتتعود على ضغطة رجلك المعتادة وتتجاوب معاها, بس العيب اني لما باحاول اطلع بالعربية فجأة واجري (اهرب من أوتوبيس ولا مقطورة جاية ورايا) الدواسة بتتعامل معايا بنظامي العادي لمدة ثانية , بعد كدة تبدأ تفهم اني محتاج أجري حالاً وساعتها تبدأ في التعامل, بصراحة ماخذلتنيش الحمدلله بس الفكرة انك ماتستناش لحد ما الثانية دي تيجي.



وفي النهاية أرجو أكون أفدتكم بحاجة جديدة وربنا يبارك في كل مالديكم , ورمضان كريم