الموضوع: عايز اجيب موتور مياه ..لعمارة او لشقة !!!!!

بص يا استاذ حسين , مبدأيا و نظرا لتفشي ظاهره الاستغلال و انعدام الضمير و عدم وجود مكاتب هندسيه متخصصه للاشراف علي الخدمات المنزليه و اصلاح مرافقه , هنا لامانع ابدا من تعلم بعض المهارات و فهم كيف تعمل الأشياء من حولك و اصلاحها بنفسك اذا لزم الأمر .

نيجي لموضوعك ,

استأذن سيادتك بالقاء الضوء علي فكره عمل مجموعه ضخ المياه اللي سيادتك مركبها , قبل ما نحل المشكله , اولا سيادتك طبعا مركب الموتور في منور العماره يعني تحت عند خط التغذيه العمومي , جميل , الموتور ده وظيفته انه بيرفع المياه من مستوي منخفض لمستوي اعلي ( الدور الخامس) بس , طيب ايه لزوم البالونه اللي موجوده فوقه ؟ و الأوتوماتيك و السكس بالف و عداد الضغط ؟ البالونه دي عباره عن كفر معدني لتحمل الضغوط العاليه و جواها قربه مطاطيه عاليه الجوده ووظيفتها ايضا رفع المياه من مستوي منخفض لمستوي اعلي !!! طب ازاي يعني الموتور ده ما لوش لزمه؟؟؟
هقولك , الموتور لوحده بدون اي حاجه ممكن يشتغل , بس طبعا كل ما حضرتك تفتح الحنفيه عشان تغسل ايدك الموتور هيشتغل و لما تقفلها هيقفل ( طبعا حضرتك مركب اتوماتيك) لأنه ببساطه الأوتوماتيك بيحس بانخفاض الضغط فيوصل كهرباء للموتور و يشغله و سيادتك لما تفتح الحنفيه بيحصل انخفاض في الضغط داخل خط مواسير المياه من اول دخله الحنفيه عندك في البيت و انت نازل لتحت لحد ما تقابل الموتور و ده بيسموه ( خط الطرد) اما المواسير من اول الماسوره العموميه لحد الموتور بيسموه ( خط السحب) اظن واضحه؟

الحاله التانيه , ان حضرتك مركب الموتور ( برضه لوحده) بس من غير اتوماتيك ( يعني مركب مفتاح في بيتك بتشغله وقت ما تعوز او لما تلاقي المياه ضعفت ) في الحاله دي هتبقي مشكله , ليه , لانه انت لما تفتح الحنفيه هتفضل تستهلك في المياه اللي متحوشه في مواسير خط الطرد لحد ما كميه المياه تضعف و تقل او تنقطع و بعدين تشغل الموتور , فطبعا الموتور بياخد وقت عقبال ما يبتدي يشتغل و يشحن خط المواسير بالمياه من جديد و طبعا بتكون المواسير فيها هواء فالمياه تاخد وقت كبير لما توصلك .


طب ليه العذاب ده ؟ هنا بقي لزوم البالونه , البالونه ببساطه عباره عن خزان مياه بيشتغل بضغط الهواء , و فكرتها ببساطه انه لما تملاها مياه من الفتحه اللي تحت , المياه هتدخل و تفضل تنفخ القربه المطاط لحد ما تتمدد و اقصي تمدد ليها انه تشغل الحيز الكامل للوعاء الحديدي الذي يحيطها تمام كده ؟ طيب الكلام ده لزمته ايه؟ اللي بيحصل بالضبط زي ما تفضل تنفخ بلا لين العيد و تقوم تفك زور البالونه عشان الهواء يطلع باندفاعه القوي , و يطير البالونه! الفكره ان احنا بنستغل الطاقه دي و نخلي الهواء المحبوس جوه الغطاء الحديدي انه يدفع قربه المياه المطاطيه و يدفع المياه لحد ما توصل لعندك في الدور الخامس ! طبعا الغطاء الحديدي دي بيتملي هواء زي عجل العربيه بالضبط , وده عشان كل ما ضغط الهواء زاد جوه الغطاء الحديدي هيتطلب طاقه اكبر لنفخ القرب المطاط بالمياه و في المقابل يعطي قوه اندفاع اعلي بضغط مناسب لمسافات بعيده .


طولت عليك مش كده ؟ المهم نلخص الموضوع عشان ندخل في مشكلتك ,

الخلاصه , الموتور لو ركب لوحده بدون بالونه ممكن يشتغل بس هيشتغل بعدد ساعات اطول مما يقلل من عمره الافتراضي بالاضافه لتذبذب الأداء , البالونه مع الموتور تعطي اداء افضل وده لان اول ما انت بتفتح الحنفيه البالونه اول ما بيرفع لك المياه , وطبعا بتاخد وقت اكبر في امدادك بالمياه لحد ما تنزل للمستوي اللي الأوتوماتيك بيحس بيه و يبتدي يشغل الموتور , وده معناه قله تشغيل الموتور بالمقارنه بالحاله الأولي , بالاضافه لثبات الأداء و الاعتماديه العاليه .


نيجي لمشكلتك ,
المشكله الأولي
بتقول فيها ,( لاحظت ان عند تشغيل الموتور بفترة بسيطة المياه تقطع واحتاج الى فتح الحنفية الأرضى بالحمام وهى اول نقطة واسفل نقطة يوصل ليها المياه) ده شيء طبيعي وده ليه سببين , اولا اما ان الموتور كانت الكهرباء مفصوله عنه و المياه فضلت تستخدمها لغايه لما البالونه فضيت , و طبعا المواسير خدت هواء , فانت لما جيت تشغل الموتور لازم ياخد وقت لغايه لما يشحن جميع تفريعات المواسير اللي داخل الشقه بالمياه . و السبب التاني ان الأوتوماتيك حساسيته لم تكن مضبوطه يعني اشتغل بعد ما المواسير فضيت من المياه , بالاضافه انه لا يوجد ارتباط بين فتح الحنفيه السفليه ووصول المياه لباقي الحنفيات , لان الحنفيه السفليه دي هي اول حنفيه بيوصلها مياه و بتكون اعلي ضغط مياه فيها عن خلاطات الأحواض مثلا, او انه نظرا لانقطاع المياه و دخول الهواء للمواسير , فانت لما فتحت الحنفيه السفليه عملت خلخله في ضغط الهواء في المواسير بشكل عجل بسرعه تفريغه و بالتالي وصلت المياه لباقي الصنابير .


المشكله الثانيه
بتقول فيها( عند فتح اى حنفية لا تصل المياه مباشرة ولكن تنتظر فترة وتلاحظ اندفاع المياه(المرة السابقة لا تصل المياه مطلقا الا بعد فتح الحنفية الأرضى) نزلت اراقب الموتور عند التشغيل والفصل ولاحظت ان عند تشغيل الموتور (مفتاح الكهرباء) يرتفع عداد الضغط الى اعلى رقم مش متذكرة ولكن هو الرقم الذى تم الضبط عليه اخر مرة وعند فتح الحنفية ينخفض الضغط الى نصف القراءة ثم يبدأ يزداد مؤشر الضغط وتصل المياه)


هو في بعض الأشياء مش واضحه في سؤالك , بس في الغالب هي احتمال يكون نفس السببين اللي ذكرناهم في المشكله الأولي , بالاضافه من تحليل المشكله ان البالونه كده لا تعتبر شغاله ,

علي العموم , نمسك الموضوع واحده واحده , و يا ريت تعمل فحص للكلام اللي هقوله,
1- نمسك الأوتوماتيك , يار يت تسيب مفتاح الكهرباء عندك شغال و تقفل كل الحنفيات( طبعا الموتور هيكون مش شغال) , و تنزل تحت و تخلي حد يفتح المياه فوق , و تراقب عداد الضغط , المفروض لو الدنيا عندك مضبطه و البالونه شغاله هتلاقي العداد بينزل بالتدريج و تختلفسرعه نزوله باختلاف معدل سحب المياه فوق في البيت , و هيفضل ينزل لغايه مستوي معين و بعدين الموتور يشتغل , و هتلاقي المؤشر بدأ يرفع تاني بالتدريج بس مش هيوصل للحد اللي يفصل عنده نظرا لسحب المياه , و اللي بيعمله انه بيعوض بل يتفوق علي كميه السحب اللي انت بتسحبها , بعد كده تقفل المياه هتلاقي المؤشر رفع للحد الذي يجعله يفصل , و يقف الموتور و المؤشر يثبت عند كده و لا يتحرك , و لو لقيت المؤشر بعد ما قفلت الحنفيات و الموتور سكت لقيته بينزل تحت تاني , يبقي هنا عيب في حاجه اسمها( سكس بالف) و دي عباره عن قطعه بتركب علي خط السحب لتمع ارتداد المياه الموجوده بالبالونه في اتجاه الشبكه العموميه.

2- نمسك البالونه, طبعا هتعمل نفس الموضوع , بس الفرق انك هتلاحظ سرعه نزول المؤشر , يعني لو لقيت المؤشر بينزل بسرعه قوي لتحت بمجرد فتح المياه , و يطلع بسرعه لنقطه الفصل بمجرد غلق الحنفيه , يبقي في مشكله في البالونه و ما تقلقش , البالونه سهل اكتشاف عيوبها و هي اما تكون في بارومه في الغطاء الحديدي و اتخرمت و بالتالي الهواء بيهرب وده احتمال مستبعد نظرا لانها جديده ( حسب ما فهمت) , الاحتمال التاني انه يكون حصل ان القربه المطاط فيها مشكله و بالتالي سربت مياه داخل الغطاء الحديدي , السبب التالث و الأخير هو ان البيه السباك ما نفخش البالونه هواء , فا بالتالي هنا حضرتك اكتر واحد يكون عارف هو طلعها من الكرتونه علطول و لا راح لبتاع العربيات ينفخها هواء الأول , لو ده ما حصلش يبقي سيادتك تفكها و تروح تنفخها عند ضغط 40 .

تفكها ازاي؟ اولا هتقطع الكهرباء عن الموتور , و بعدين تقفل المحبس اللي بين الخط العمومي و الموتور ( خط السحب ) , و بعدين تفتح الحنفيات السفليه عندك في البيت لغايه ما المياه( تخلص خالص) و ده مهم جدا و تسيبها مفتوحه , و بعدين تنزل تحت للموتور و معاك ايناء بلا ستيك خفيف و تجيب كيس نايلون او اكتر من واحد و تلفه حول الموتور الكهربي تحسبا لسقوط بعض المياه , و بعدين تمسك البالونه بكامل يديك ( لو كنت تمتلك قوه جسديه كافيه) و تلفها عكس عقارب الساعه , لو ما عرفتش امسكها بجسمك كله و لفها , هتلا قيها اتفكت و هتسمع صوت هواء بيطلع مه نزول بعض المياه متخافش , لو لقيت كده بيحصل معاك سيبها تخلص و ما تفكهاش للآخر , هات الاناء البلاستيك معاك و حطه تحتها عشان ياخد المياه و تقلل من سقوطها عل الموتور , و بعدين فكها خالص و روح عند بتاع العجل . و لما تيجي تركبها تاني ما تنساش تحط كتان و تلفه علي الزور .