الموضوع: دخلت في عربية وعايز اعرف مين اللي غلطان

المشاركة الأصلية كتبت بواسطة semi

السلام عليكم ورحمة الله

امبارح كنت ماشي وعندي احساس كده ان العربية هتزعل النهاردة
الله اعلم جالي منين الاحساس ده بس كانت حاجه عمالة تلح علي
وحصل فعلا ان العربية اتخبطت والحمد لله من قبل ومن بعد ان الموضوع كان بسيط
بس اللي حصل بعد كده مش ظريف وقفت مع الراجل وكان مصمم اني غلطان
وانا كنت مصمم اني مش غلطان هو يتكلم وانا اتكلم ومختلفين تماماً
وانا حاسس اني مش غلطان بس برضه خايف اكون ظلمته
المهم انا خلصت الموضوع لانه طول تقريبا لنص ساعة اني اصلح له عربيته ويتحمل معايا نص التكلفة
وده بعد عرض ان كل واحد يصلح عربيته وهو رفض
المهم انا نفسي اعرف مين اللي غلطان فينا وعايزكم ياجماعة تحكموا بالعدل
وهقولكم اللي حصل بالظبط

انا كنت داخل ملف يوتيرن ودخلت ومفيش اي حد معايا وخدت الملف على الواسع
وكنت باصص وتركيزي كله على اللي جاي سريع
من ناحية اليمين ومش بصيت خاااالص شمالي في المراية
قمت دخلت كاسر عشان ابقى في اول حارة جنب الرصيف واعرف امشي
لقيت فجأة دررررب وجنبي عربية عدلت نفسي ونزلت
الخسائر خبطة عندي في الرفرف الشمال ومش عارف افتح بابي لكن عدلتها شوية
وعنده خبطة في الاكصدام دخلت لجوه مع شرخين حولين الخبطة
عربيته دايو شكلها خليجي وبيقولي اكصدام غالي ومش عارف ايه
انا قولتله انت المفروض مكنش تكبس علي كده واني لي الافضلية طالما واخد الملف على الواسع
وانك طالما جت جنبي كده كان المفروض تزمر تعمل اي حاجه لان طبيعي تركيزي كله على اللي جاي سريع
قام رادد علي انا كنت واقف اعملك ايه يعني وقعدت ابص عليك بشوفك هتعمل ايه !!!
ودي صورة لمحاولة شرح اللي حصل بالظبط

انا شايف انك انت الغلطان

طالما اليوترن يساع عربيتين يبقى كل واحد يمسك حارتة و يلتزم بيها و مفيش اى حاجة تفرض على باقى السواقين انهم ميخشوش اليوترن معاك خالص طالما اليوترن يساع اكتر من عربية جنب بعض و بشرط كل واحد يلزم حارتة

لو فرض و انت قلقان من السريع يبقى كان من الاول تمسك الحارة الضيقة عشان تبقى فى ابعد نقطة عن اللى جايين فى الطوالى... و غالبا محدش بيمسك الحارة الخارجية الا اللى داخل يمين على طول بعد اليوترن (حالة متكررة فى يوترنات شارع جامعة الدول العربية)

و لو معملتش دة و فكرت تنقل للحارة الديقة يبقى الاول تبص فى مرايتك اليمين و تشوف اذا كان فيه حد اصلا فى الديقة ولا لا... مينفعش تنقل من حارة لحارة من غير ما تبص فى مرايتك... و مينفعش تفترض ان مفيش عربيات ماشية معاك فى الطريق.. حتى لو انت معتقد ان غلط ان حد يخش جنبك... توقع خطاء الغير

و لو فرض و فية حد فى الضيقة زى حالتك يبقى قدامك حل من الاتنين... اما تكبس و تدخل مع الطولى و انت و حظك... و اما تهدى لما اللى فى الديقة يعدى و تدخل وراه فى الفاضى... انت عملت خليط بين الاتنين و فضلت تفضل كابس و تمسك الضيقة فا دخلت فى اللى كان جنبك

من وجهة نظرة هو: هو كان داخل اليوترن فى الحارة الشمال الفاضية الضيقة و هو فى وسط او ثلاث ارباع الملف اللى جنبة رمى علية و حشرة بينة و بين الرصيف

MMamdouh