الموضوع: كباريه و الريس عمر.. هي دي مصر؟

المشاركة الأصلية كتبت بواسطة meza

و أنا بتكلم جد صدقينى .... و المشاهد اللى مثلتها مكنتش مبالغة قوى حسب ما أنا شايف.
عارفة ... حتى لو الكاتب و المخرج و الممثل نيتهم وحشة من ورا المشهد ده ... أنا ممكن أبص ليه من ناحية تانية و أفهم معانى أكبر من الكلام الفاضى ده.
أنا عارف إن معظم شبابنا متربوش على كده .... و التأثير العام عليهم سلبى ... و دى مشكلة تربية فى جيل كامل من الشباب.

على فكرة الحكاية مش حكاية نية كويسة و نية وحشة.. يعني ما أظنش ان خالد و لا سمية نيتهم او هدفهم إفساد الشباب عن عمد يعني.. هي بس طريقة بيعتبروها بتكسر كل الحواجز بيعلنوا عنها في أفلامهم.. بس فيه حاجة ما ينفعش نغض الطرف عنها و هو الأذى الناتج عن مثل هذه المشاهد.. انا و كثيرين بنعتبره أذى. أما عن التأثير السلبي فما أظنش ان المشهد الجنسي (آسفة لاضطراري على استخدام اللفظ ده) اللي كان بين أطفال الشوارع في فيلم حين ميسرة كان ليه تأثير إيجابي على أي حد و لا هو بالدخول في تفاصيل مخجلة زي دي آل بيظهر اوي واقع اللي بيحصل بين أولاد الشوارع .. معلش بأه و خلينا نتكلم بصراحة اكتر شوية.. المشهد كان عبارة عن اتنين مبسوطين جدا من اللي بيعملوه.. و مش قادرة أزود عن كده في التوضيح الصراحة.. بس ما أظنش ان فيه شاب غير متزوج هايشوف مشهد زي ده و مش هايبقى "عايز من ده".. ماهم مبسوطين اهم و آخر انسجام.. يعني الرسالة من الآخر ما وصلتش، ده لو كان خالد يهمه من المشهد ده فعلا توصيل رسالة مش مجرد استعراض عضلات و عرض قوانينه على المشاهد.

كلامك صحيح ... وللأسف معظم الشباب فى مصر مش بيقدر يكون وجهة نظر .... على قد ما بتكوت توجهات تحكمها خلفيات زى ما حضرك ذكرتى.
بس المشكلة هنا فى الشباب أنفسهم .... لو عودناهم يبصوا للأمور بمنظار أكبر و أعقل من كده .... مكناش هنواجه مشكلة زى دى.
جيل الشباب الحالى عنده شغف جنسى رهيب ..... يختلف من شخص لآخر لكنه بالمجمل عبر مرحلة الخطر و أصبح فى مستوى قد يؤدى إلى كارثة بهذا الجيل.

طيب ازاي يا ميزة؟ نعودهم يبصوا للأمور بمنظار أكبر و أعقل من كده ازاي؟ فعلا عايزة افهم ممكن نعمل كده ازاي عشان نتجنب مشكلة هوس الشباب بالموضوع ده.

طيب ازاي يا ميزة؟ نعودهم يبصوا للأمور بمنظار أكبر و أعقل من كده ازاي؟ فعلا عايزة افهم ممكن نعمل كده ازاي عشان نتجنب مشكلة هوس الشباب بالموضوع ده.

المشكلة أكبر من إن تحلها بعض الكلامات يا أستاذذة علا
لكن اللى أنا شايفه إنه حاجات كتير لازم تتغير .... لازم نغير نظرة الولد للبنت ... لازم نعلم كل واحد يحترم الآخر .... لازم نعمله يحترم حقوق الآخر .... نغير نظام تعليمنا فى المدارس و ميبقاش منهج علمى أو أدبى فقط ..... لازم الآباء و الأمهات يتعلموا إزاى يربوا أولادهم تربية سليمة ....

حاجات كتير لازم تتعمل ... و مش هقدر أجمعها كلها.

ممكن نبص على تربية الشباب بره .. ليه مناخدش إبجابيات التربية دى و نسيب السلبيات .... الشباب بره بيعرف يتحمل المسئولية كويس قوى و عندهم حاجات أحسن من شبابنا ألف مرة.

مثلاً ... يعنى بره لو شاب عايز يقيم علاقة مع أى بنت .. عادى .... لكن مش عادى إنه يقيم علاقة غصب عنها .... ليه .... لأنه إتربى على إحترام الآخر .... و لو ما إحترمش هياخد فوق دماغه .... ليه مناخدش الجزء الكويس .... و نعرف إزاى ربوا شبابهم على كده؟
هل وصل اللى عايز أقوله؟

الموضوع كبير قوى يا علا .... و مش هقدر ألم كل نواحيه مرة واحده ... لأن دماغى مشحونة دلوقتى ... أصل من الصبح عمال بذاكر .... فإعذرينى لو حاجة ناقصة فى كلامى.

المشاركة الأصلية كتبت بواسطة meza

بالنسبة ليا أنا ... أنا مشهد إغتصاب سمية الخشاب . عينى دمعت فيه .... و أنا مش محرج و لا حاجة .. بس ده فعلاً اللى حصل.
عارف إن شباب كتير مهمهمش كل التفاصيل دى و ركزوا على حاجات معينة .. بس ده فعلاً كان رد فعلى.

غريبة يا ميزة ان مشهد إغتصاب سمية الخشاب أثر فيك و خلى عينيك دمعت.. أصلها مش خضرة الشريفة يعني و الوحشين دول اغتصبوها.. دي واحدة كانت عايشة مع حبيبها قبل كده في الحرام و حملت من زنا و رمت ابنها في أتوبيس عشان تخلص من مسؤوليته.. و بعدين هي مش ممرضة راجعة من شغلها متأخر و بتجري على رزقها قاموا شلة صيع خطفوها و اغتصبوها. عموما دي آراء ممكن نختلف فيها :)

و على فكرة أنا مش مع خالد يوسف .... بالعكس أنا شايف خالد يوسف أساء التقدير ... و مثل فيلمه على معايير تانية مش بتاعتنا ... لهدف واحد إنه ينهض بالسينما المصرية عشان تبقى زى بتاعة بره متناسياً آثار عرض الفيلم على الشباب.

في دي بأه احنا متفقين :)

لما شبابنا يبقى بنفس عقلية شباب بره ... يبقى ينزل أفلام من النوعية دى

هنا بأه مختلفين.. بس مش هاطول معاك في النقاش اكتر من كده و هاسيبك تقوم تذاكر و انا كمان هاقوم انام.. عندي بكرة زدني من الصبح يا ناس :)

شكرا يا ميزة على الحوار الراقي :)

المشاركة الأصلية كتبت بواسطة Dr Ahmed

يا شباب
أنا شفت الفيلمين الأسبوع الماضى

فيلم الريس عمر حرب:
كإخراج: يمكن القول إنه عمل فنى متقن
كفكرة ومضمون: على حسب فهمى:
القصة مغزاها إن الشيطان يسيطر على الأشخاص المفسدين ويصبحون عبيده ويصبح كأنه ربهم ، وحين يسيطر الشيطان فسيكون ذلك على حساب كل القيم الموجودة فى حياتك...
كلام جميل .. ولكن..
ليس كل من رأى الفيلم وصلته هذه الفكرة... لأن طريقة توصيلها مليئة بكل أصناف القذارة التى تستحى معها أن تذهب حتى لوحدك لمشاهدة الفيلم ، ناهيك لو معك أسرتك... دعارة عينى عينك ، سمية الخشاب والتانية (مش فاكر اسمها) وغيرهم: كلهن قرايب للأسد فى الفيلم وسامحونى لأنهم فاقوا كل كل الحدود حتى اللى كان المتساهلين عاملينها... ومش هقول أكتر.. باختصار: إياك أن تذهب لرؤية هذا الفيلم.

فيلم كباريه:
كنت متوقع أن يكون فيلم هابط (كانوا 3 أفلام فى السينما الصيفية) .. لكن المفاجأة: فيلم على مستوى فكرى عالى جدا جدا ، بيعرض حياة بشر مليئة بالمتناقضات والازدواجية .. وبتتجمع خيوط قصص كثيرة فى ليلة واحدة فى الكباريه الذى ينفجر وتختلط دماؤهم..
الفيلم بيقدم رسالة رهيبة.. ما يهمنى منها طريقة محاربته الراقية للعنف الدينى ، فلم يسخر من المتدينين كعادة أبالسة السينما.. بل قدمهم بصورة قريبة من الواقع...
ولن أحرق الفيلم على من لم يره ، فباستثناء بعض مشاهد الرقص -الخليع طبعا- والأغانى الهابطة - كجزء من الكباريه- يصير الفيلم تحفة فنية
لا أستطيع أن أنصح أحد برؤية فيلم.. لكنى لست نادما على رؤيته، بل بالعكس تماما..
أما الريس عمر فنادم على كل دقيقة قضيتها أمامه، وقررت مقاطعة أفلام مخرج الفيلم الذى يسير على نفس الوتيرة الرديئة - مهما كانت حججه- لأن الغاية لا تبرر الوسيلة.

شكرا على النقد الموضوعي و على موقفك الإيجابي تجاه أفلام خالد يوسف :)

غريبة يا ميزة ان مشهد إغتصاب سمية الخشاب أثر فيك و خلى عينيك دمعت.. أصلها مش خضرة الشريفة يعني و الوحشين دول اغتصبوها.. دي واحدة كانت عايشة مع حبيبها قبل كده في الحرام و حملت من زنا و رمت ابنها في أتوبيس عشان تخلص من مسؤوليته.. و بعدين هي مش ممرضة راجعة من شغلها متأخر و بتجري على رزقها قاموا شلة صيع خطفوها و اغتصبوها. عموما دي آراء ممكن نختلف فيها :)

رؤيتى لشخصية سمية الخشاب مكنتش إنها بنت وحشة ... فى الأول علاقتها مع حبيبها ... كانت عن حب و بسبب ظروف معينة ما إتجوزتش ... صحيح علاقة خاطئة .. لكن هى مش بنت وحشة و بتقيم علاقات مع كل من هب و دب.
الإغتصاب هو اللى قلب حياتها و خلاها تتحول لشخصية من وجهة نظرى فاسدة .... لكنها فى الأخر ضحية و ليست جانى.

شكرا يا ميزة على الحوار الراقي :)

ربنا يخليكى يا علا
و مش هنكر ... أنا فعلاً إستفدت من الكلام مع حضرتك .. إقتنعت بحاجات حضرتك قولتيها و غيرت شوية من وجهة نظرى بسبب حاجات كانت غايبة عنى و وضحت لما إتكلمت معاكى.

شكراً

المشاركة الأصلية كتبت بواسطة Adham_Sabry

ليه نروح ندور علي اخلاقيات الغرب ؟؟ وفين دينا واخلاقنا ؟؟ وفين رسولنا اللي عاوزين ننصره ..
[/color][/size]
مش كده يبقي اسمه زني ولا حاجه تانيه ؟؟
وبعدين انت موافق علي اقامه العلاقات دي طالما ان البنت موافقه ؟؟
يا ريت توضح علشان انا مش فاهم قصدك ؟؟[/color]

أنا مش عارف ليه حضرتك بتاخد المعنى السىء لكلامى.

أنا يا سيدى نيتى مش سيئة

بقول ... بره ممكن شاب يقيم علاقة مع بنت ... عادى (بالنسبة لمفاهيمهم) .... لكن يقيم علاقة غصب عنها ..... مش عادى ...... ليه بقى مندورش على سبب إن الشباب مبيترجئوش إنهم يقيموا علاقة مع بنت غصب عنها ... يغتصبوها يعنى .... أكيد فى حاجة فى تربيتهم خلتهم ميعملوش كده ... ليه منستفدش منها.

و هقول لحضرتك حاجة .... الأسلوب ده :

وبعدين انت موافق علي اقامه العلاقات دي طالما ان البنت موافقه ؟؟
يا ريت توضح علشان انا مش فاهم قصدك ؟؟

أنا بسميه أسلوب ترهيب فى الحوار ... و أنا مش بحبه .... و ممكن أتوقف عن محاورة اللى قدامى بسببه.
و حصلت قبل كده فى المنتدى هنا إن أستاذ فاضل .. توقف عن الحوارات بسبب ردود بالشكل ده ..... و أنا مستعد أعمل زيه.

و أرجو إنك متاخدش الكلام ده على إنه تهديد ... لكن أنا بوضح موقفى.

تحياتى