الموضوع: مبروك . الحكومة هاتعطف علينا ب 5 لتر بنزين كل يوم

المشاركة الأصلية كتبت بواسطة ahmed salamaa

(خدمات صحية - خدمات تعليمية - خدمات الدفاع عن أرض البلد - الطرق - بناء المدارس و المستشفيات
اللي هما مش موجودين اصلا و بلاش نتكلم عن الطرق او المستشفيات

إنما أحنا بنصرف مليارات في الهوا (علشان حضرتك عايز تركب عربية 2000 سي سي )
ممكن بكل سهولة تبيعها و تجيب عربية 1300 و توفر معاك جامد
حضرتي راكب العربية دية مش بمزاجي والله انا مش راكب بي ام او مرسيدس انا عربيتي موديل 78 و راكبها عشان مصاريفها علي ادي و استحمالها معايا كويس حضرتك انا لو جبت ال1300 هجيب 128 و اقعد اصرف عليها عند الميكانكية دم قلبي ولو روحت بيها جمعتي مشوارين في التالت هقعد جمبها
نيجي بقى لأوروبا و أمريكا و دول آسيا المتقدمة
و لا دولة فيهم بتدعم الطاقة
دخل الفرد كام في اوربا و امريكا اصلا مواصفات العربيات اللي هناك عاملة ازاي جودة البنزين هناك عاملة ازاي الطرق عاملة ازاي معدل دخل الفرد اد اية التعليم هناك بيتكلف اد اية العلاج بقيت السلع عاملة ازاي قبل ما نتكلم عنهم يا ريت نقارن بين و بينهم في كل حاجة و لو عاجبينك اوي كدة سيب البلد و روح عيش برة زي ما انت عايزني اغير عربيتي
اللي عايز يركب عربية ...... بيركبها من شغله ........ و كمان عليها ضرائب
من شغلة زي ما بتقول بياخد كااام بقي حضرتك من شغلة حتي اللي مش راكب عربيات هناك المواصلات نضيفة انما هنا الواحد اما بيصدق يلاقي حاجة ترحمو من زحمة المواصلات و بهدلتها متفتكرش ان كل اللي راكب عربية مرفه اوي زي ما انت فاكر في ناس اتمرمطيط علي ما جابت حاجة تلمها اظن بقي اني كمان ليا حق علي الدولة اني اخد دعم علي بنزينها
أنجلترا بتتباع فيها الجين 2 ب 100 ألف مصري ........ و ماليزيا بتتباع فيها بنفس الثمن في ماليزيا
يعني كمان مصر أرخص منهم ........
الجين في مصر هنقول ب 85 الف فيا ناس هيتشال عنها الدعم و عربيتها متسواش 15 الف متفكرش في نفسك بس اللي مش واصلهم الدعم ليهم حق طبعا بس ماتجيش علي حد عشان تدي التاني اكييد في اكتر من طريقة غير موضوع البنزين

أنا أصلا مضرور زيكم لما الدعم يتشال ....(أنا مش غني )
أنا بتكلم عن عدالة توزيع الدعم (اللي مفيهوش عدل أصلا )
و كمان مساؤى الدعم عليك و علي و على كل المواطنين ..... دعم يعني فلوس بتروح بدون أستثمار
يعني لما الدولة تستثمر فيك (تعليم و صحة و طرق ... الخ ) أفضل مت تديهالك فلوس تروح بها الجامعة في عربيتك .
أنا كنت بروح الجامعة مواصلات .... أيام ما كنت في الجامعة ... و كان ساعتها اللتر بجنيه بس و برضه كنت بروح مواصلات .....

أنت باصص لنفسك بس ... أنت هاتضر أد أيه
و لكن مش باصص للموضوع بشمولية .

و أي خدمة حكومية سيئة موجودة في مصر .... مش هاتتحسن بوجود الدعم أصلا .

المشاركة الأصلية كتبت بواسطة al_manara

80 لتر في الاسبوع . طريق شغلي 55 كيلو رايح وزيهم راجع . دة غير الزحمة طبعا .

زيك بالظبط على فكرة ..... الفرق أن طرقي سالكة مش زحمة .




الرد في مشاركة العضو الفاضل بعد الرد . وهازودلك شوية حاجات بسيطة . وبعدها انا معاك نشيل الدعم



+
6- مطلوب مستوي معيشة للافراد زي الدول الي مافيهاش دعم
7- مرتبات
8- شوارع مضائة
9- شفافية (الفلوس التي يتم توفيرها في الدعم هاتروح فين بالضبط)
10- مصاريف ليس لها لازمة في اجرائات استخراج رخص السيارات (زي التامين)
11- ........................


كل الكلام ده جميل و أنا معاكم فيه
و لكن تحسين الجودة هاييجي ازاي و الميزانية كل سنة فيها نقص بسبب الدعم ؟؟؟؟
يبقى مفيش حاجة هاتتحسن إلا لما الدعم يتشال و الناس تسترشد في أستهلاكها العام لأي شئ مش الطاقة بس لغاية على الأقل ما نعدي الأزمة المالية دي
لو حابب كمان ممكن اكتبلك





:ta_clap[1]:

المشاركة الأصلية كتبت بواسطة al_manara

دة تمن العربية في انجلترا
proton cars uk

يعني انا شغال هناك ب 11 الف يورو بجيب عربية (العملة في أنجلترا أسترليني مش يورو )
لاكن هنا ب 11 الف جنية بتجيب اية !!
مفيش بلد في العالم تمن العربيات فيها زينا . احنا حاجة تانية خالص .

لا يا فندم
العربية ثمنها زي هنا بأختلاف سعر العملة .
تكلفة الحياة هناك أصلا أغلى من هنا بكتير و مش كل الناس بتقدر تشتري عربية (علشان ترخيصها غالي قوي )

الناس هنا في مصر أغلبهم يملك المكان اللي هو عايش فيه بعكس هناك ... ضرائب رهيبة على كل شئ
أنا ذكرت في الأصل ثمن العربية هناك و هناك .... علشان أعرفكم أن العربية في أوروبا ثمنها زي مصر بالضرائب اللي عليها طبعا .

أما تكلفة العملة و قيمتها ده شئ تاني .

المشاركة الأصلية كتبت بواسطة youssef_u

انا مستغرب من الناس اللي بتقارن مصر ب اوروبا و امريكا ،،، يا حبيبي في امريكا سعر البنزين اغلى من هنا بس بيقبض خمس او ست اضعاف المرتب اللي بنقبضه هنا و هناك في الطرق النضيفة و الرعاية الصحيه و الخدمات التعليمية


لا دكتور .
البنزين سعره أغلى من هنا علشان هناك مفيش دعم .
أما موضوع الدخل ..... أنا معرفش الدكاترة بتأخد كام في أمريكا ....
بس اللي أقدر أقوله لحضرتك ... أن وظيفتي في أمركيا بيأخدوه عليها أكتر بكتير من اللي أنا بأخده هنا في مصر .
بس أنا عايش في مصر و في ظروف مصر .و مكنتش بقارن سعر البنزين
أنا بقول للناس أن مفيش دعم في أي حتة مع وجود الضرائب
علشان ناس كتيرة فاكرة أن الجمارك دي منة على الحكومة و لكن كل حكومات العالم بتجبر مواطنيها على دفع ضرائب للحصول على خدمات حكومية

بالمناسبة الجمارك في مصر بتدخل مليار و نصف المليار جنيه سنويا على السيارات
و دعم البنزين بس ......... 20 مليار جنيه
ده كان وجهة المقارنة .
الطرق هناك نظيفة و الخدمات كويسة علشان مفيش دعم .... أي دولة فيها دعم هي دولة فاشلة و مفيهاش لا خدمات كويسة و لا طرق كويسة .
الدول الناجحة فقط هي الدول اللي بتنتج و تشتغل ... و مقابل العمل ده تحصل على خدمات جيدة .

و كمان ليه العربيه اللي اركبها ب ١٠٠ الف بره اركبها هنا ب ٣٠٠ الف + ادفع بنزين غير مدعم ، لو العربيه اللي بركبها بره ب ١٠٠ الف هشتريها هنا بنفس السعر يبقا انا موافق ادفع بنزين غير مدعم .

فيه عربيات كتيرة في مصر ب 100 ألف ...... حضرتك ممكن تركبها .
و بعدين حضرتك بتقارن أسعار العربيات فين ؟؟؟
بين مصر و أوروبا ؟ أسعار العربيات واحدة في المنطقتين تقريبا .
و لو بين مصر و أمريكا ؟ فأمريكا أرخص شوية و لكن مش بنفس التصور .

و لو كان بين مصر و الخليج ؟ فلا يجوز المقارنة أصلا لأسباب سياسية و أقتصادية و سكانية .

حضرتك موافق تدفع فاتورة مياه بمثل سعرها في الخليج ؟؟؟؟؟؟؟؟؟؟؟؟؟؟؟؟؟؟؟؟؟
لو موافق ............ يبقى البنزين في مصر يصبح زي البنزين في الخليج ....

أنا بس بضرب المثل ده علشان أعرفك أن سعر السلعة بيتحدد على أساس مختلف من بلد للتاني

عندك مثلا التفاح في أنجلترا ......... مرمي في الشارع ببلاش تقريبا بعكس البرتقال هناك ... غالي لأنه مستورد .
و العكس هنا ......... البرتقال رخيص .......... والتفاح غالي .

أعتقد برضه أن أحنا بندفع ضريبة على الأكل ....... و مش بنأخد دعم عليه ؟؟؟؟ صح

يبقى الضرائب (الجمارك ) على السيارة مش بالضرورة أنه يشيل الضرائب من عليها علشان يبعلك البنزين بالسعر الحر .

و الزحمه المروريه اللي ممكن توقفك ساعتين في المحور اللي هو ١٢ كيلو كله على بعضه + الطرق الزباااااله اللي كلها مطبات و حفر


طبعا دي مصايب لازملها حلول .
يا اخي ارفع الدعم بس عايزين مقابل في الطرق و باقي الخدمات و ليه وانا ماشي ابقا عامل كأني في امتحان سواقه عمال اروح يمين شمال عشان اتفادى الحفر و اعرض العربيه عالمطب عشان متحكش و ليه وانا مسافر بليل البس مطب يبوظلي ام العربيه عشان الباشا حاطه في مكان عقيم ولا ليه اي تلاتين لزمه و مفيش اناره عالطريق ولا عواكس توضح ان في مطب ،،،

حسبي الله ونعم الوكيل في كل من كان السبب

ما هو علشان يبدء يقدر يقدملك أي خدمة كويسة لازم الأول يوفر في الميزانية .
و إلا هايقدملك خدمة كويسة ازاي و الميزانية أصلا فيها عجز سنويا بيحصل ؟؟؟؟؟؟؟؟؟؟؟؟؟؟؟؟؟؟؟؟؟؟

المشاركة الأصلية كتبت بواسطة deshahcoka

الله يفتح عليك يا باشا ! انتا الكلمتين دول ارفع لحضرتك القبعة عليهم بجد في الجون ...

و لو قلنا عربيات الغلابة و الموظفين و الاقساط و الي اشتغلوا 20 سنة و طفحوا الدم عشان يجمعوا 100 الف يركبوا سيراتوا او اي عربية في رنجها و هيا اصلا بره ببتاع 50 الف جنيه ... يعني في بتاع 70 الف جنيه متفهمش يا اخى بيروحوا فين ... ده بغض النظر عن ال 700 الف في العربيات التانية ...

كل دول العالم بتطفح الدم علشان يجيبوا عربيات ..... و بيدفعوا عليها مصاريف أكبر من عندك كمان

لا امل في البلد ديه ... حنفضل كدة و ربنا يتولانا ... الواحد عايش عندوا امال و طموحات لكن تحس انوا البلد ديه الي بيمسكها هدفه تحطيم و دفن الناس ...


بالعكس
أزالة الدعم هو دعم الناس الفعلي .
أنا لما أستثمر في البلد أفضل مليون مرة أني أدعم الناس علشان يحطوا بنزين في عربياتهم .
لما ننتج و نبقى دولة صناعية و منتجة .......... هاتقدر تدفع ثمن البنزين
و الأفضل تجويد الخدمات ........ و زيادة الأستثمارات بدل من حرق 20 مليار جنيه مصري في الهوا سنويا على المحروقات .
احنا بس الي على دمغنا .. فئة الحرامية مش فارقة معاهم حاجة اديه بيسرق بيبلطج و بيتسطل و كل يوم على كدة ... و الي ربنا كرمهم و فوق دول يا صفوا اموالهم و هاجروا و سابوها تخبط تخرب يا اصلا عارفين يعيشوا فيها ازاي و ليهم درعات و ضهر ( فلوس و سلطة )

هو أنا مش عارف حضرتك تقصد مين .
بس البلد فيها عجز سنوي في الميزانية بسبب الدعم (اللي الله يسامحه قدمه ناصر لمصر )

البلد هاتتقدم ازاي بدون أستثمارات حقيقية ؟

المشاركة الأصلية كتبت بواسطة dr-mohamed

اولا فيه ردود بالأمانة زي ما قال احد الاعضاء مينفعش يرد عليها غير حسين وبس
ثانيا انا بسافر 3 ايام للشغل ولو غلسوا هايبقي 4 ايام
المسافة 400 كيلو * 3 = 1200 كيلو في الاسبوع
1200 * 4 = 4800 كيلو
متوسط الاستهلاك للتر 8 كيلو يعني نقول محتاج تقريبا علشان اروح الشغل بس حوالى 600 لتر
لما اخد 150 بسعرهم والباقي الله اعلم بكام يبقي المرتب هايضيع كله بنزين
حد يقولي روح بالقطار اقوله تذكرة القطار الان ب30 جنيه يعني لو هروح 3 ايام بس يبقي 3*2*30= 180 جنيه * 4 اسابيع = 720 جنيه شهريا زود عليهم استهلاك ال5 لتر بردو لاني هروح بالعربية لمحطة القطار يعني استهلك البنزين بتاعهم وادفع عليه 720 جنيه شهريا تذاكر قطار

حضرتك 1 % من المستهلكين .
==========
وانا موافق ادفع تمن البنزين زي امريكا لكن بشرط اخد مرتب لا يقل عن 25 الف دولار شهريا و ده اقل مرتب لوظيفتي في امريكا وقتها مش هايفرق معايا لما ادفع الف دولار بنزين شهريا

مفيش حد في أمريكا بيأخد 25 ألف دولار ؟؟؟؟؟؟؟؟؟؟ هو حضراتكم بتجيبوا الكلام ده منين ؟؟؟؟؟؟؟؟؟؟؟
===========
اللى بيقول الغاء الدعم مساعدة علشان الصحة والتعليم بقولهم اسف الكلام ده كذب بيقولوه لتبرير رفع الدعم فقط


والدليل ان في الوقت اللى بيخفضوا وبيلغوا فيه الدعم ميزانيات التعليم في الجامعات بتتخفض بردو وميزانيات الجامعات نقصت السنة دي في المتوسط 20% وكان فيه وحدات خاصة بتساهم في تمويل العجز الاصلي في الميزانية بتاعة الجامعات وزارة المالية كانت بتحصل منها على 6% زودوها وصلت حصة المالية 20%
يعني حكاية تخفيض الدعم او الغائه لدعم الصحة والتعليم كدب كدب كدب كدب


ما هو أنت أصلا الميزانية فيها عجز ... و موضوع تحسين الخدمات مش هايحصل بين يوم و ليلة ؟؟
لازم الموضوع يأخد وقت علشان تتحسن العملية
===========
الخلاصة
كم انتي عظيمة ايها النهضة

و بلاش كلام التريقة لو سمحتوا
اللي عنده مناقشة بناءة .... يتفضل أنا معاكم .

أنما رد حسين و مش عارف أيه بلاش منه
كلنا ناس محترمة و ياريت نناقش بعض بأحترام .

اولا موضوع هايل والناس كلها بتتكلم بمنطقيه
بس انا شايف ان المشكله الحقيقيه هو ترتيب الاولويات بمعنى ان الدعم المفروض يتشال لان ده منطقى جدا بس قبل ميتشال لازم نوفر حاجات ضروريه علشان فعلا الناس مش فى حمل انها تزود مصروفاتها لانها زى مبيقولو ماشيه بالزق
يعنى انا شايف انه المفترض قبل ماياخد القرار ده المفترض يفعل الحد الادنى للاجور علشان انا كمواطن اضمن معيشه كريمه وبرضه لازم يوفر مواصلات ادميه للناس فى كل المحافظات علشان زى الدول المتقدمه الناس بيكون عندها عربيات بس بتحب تروح شغلها بالمواصلات "توفيرا وراحه من السواقه ويقلل اهلاك عربيته علشان تبقى للخروجات بس وفى نفس الوقت مش هيدور على بارك للعربيه " ولازم يوفر ان المواصله دى تكون مناسبه لكل الطبقات بمعنى انك لو مدير بنك وركبت اتوبيس فى امريكا ببدلتك بفلوسك بهيئتك هتنزل منه زى مطلعت عكس هنا خالص "
واظن القرارين دول مش محتاجين مجهود ولا وقت محتاجه نظام بس يعنى الحد الادنى يتراقب كويس والمواصلات اللى متنفعش يا تتكهن يا تتجدد ويتعمل خطوط للسير اقدر اوصل بيها لاى مكان انا رايحه من غير بهدله او اركب 15 مواصله ولو عملت ده وشيلت الدعم هتلاقى مشكله المرور اتحلت لوحدها لان الشعب كله طالما جرب الموضوع ولقى تغيير على طول على الاقل توفيرا بس هيسيب عربيته ويركب مواصلات
اما بخصوص التوقيت فانت عايز تعمل ده فى وقت الشعب عمل ثوره وكان مستنى انها حتجيب الفرج انما انت كده بتحسسه انه معملش حاجه واظن ان اكيد الحكومات الثوريه بيكون عندها حلول لده وفى حاجات كتير تم طرحها بالفعل علشان تسد العجز وتجيب فلوس زياده زى
" ترشيد الانفاق الحكومى وده ولا محتاج وقت ولا جهد يعنى الوزير علشان يبقى بجد حاسس بالمواطن يبقى زيه زى مدير البنك يركب المواصلات العامه المحترمه اللى حتحافظ على ادميته وانا موافق ياخد بدل مواصلات عامه وييجى فى عربيته الملاكى ويدفع هو صيانتها وفرق البنزين بس ساعتها انا كمواطن مش ححس ان الوزير راكب اربع عربيات انا جايبهملو وكل مديرين مكتبه كمان راكبين عربيات وعايزينى ارشد استهلاكى ؟؟؟؟؟؟؟ "
"عندك كمان وقف العمل بالسفارات اللى ملهاش لازمه بره واللى انا شايف مليش مواطنين هناك ونعمل موضوع السفارات الاقليميه فى البلاد دى اظنها بسيطه برضه وواقعيه ولما البلد تشد حيلها ابقى رجعهم تانى واعمل 90 قنصليه فى كل بلد كمان لو عايز "
"عندك كمان ان الموظف العام يشوف شغله كمثال اداره المرور لو اتنظمت صح تجيبلك مبالغ محترمه جداجدا واسهل مثال ممكن اتكلم عنه نظام المرور فى امريكا ولو حبينا نعمله مش محتاج اى وقت ولا مجهود سوى ان كل ظابط مرور يشوف شغله <ممكن نتكلم عنه بعد كده> "
" الجمارك دى قصه تانيه فى حاجات كتير بتدخل البلد وملهاش بدائل محليه وتعتبر من الرفاهيات اللى هيه لما تسمعها ضغطك يرتفع ممكن نزود جماركها واللى بيستخدموها مش هيعترضوا لانها مش هتفرق معاهم خالص ولو مشتروهاش يبقى احسن لانهم هيقللوا عجز ميزان المدفوعات اللى بالتبعيه هيقلل الموازنه العامه "
ولو فضلت اعدلك الحاجات اللى ممكن تتعمل بس محتاجه مجهود من المسئولين فقط مش حنخلص وده اللى الناس كانت مستنيه الثوره تعمله علشان حكوماتنا تلاقى فلوس تسد العجز وتحسن البلد بعدها قول للناس احنا تعبنا الفتره اللى فاتت وريحناكوا عيزنكوا تتعبوا معانا شويه علشان هنشيل الدعم علشان نحسنلكم حاجات تانيه هتلاقى كله بيقولك سمعا وطاعه حكومتنا الجميله ومعارضيك فى حينها الشعب هيتكفل بالرد عليهم
يعنى فكره الرفض هى بتتلخص فى قله الشفافيه و عدم الثقه بكلام اى حكومه سواء من التيار المحافظ او من المدنيين او الفلول وده من اللى الشعب شافه من النظام القديم وحس ان النظام الجديد سائر على نفس النهج وده بسبب اخطاء الكل معترف انها حصلت الفتره اللى فاتت من المسئولين فانت لما تطلع قرار زى ده فى الوقت ده وانا مشوفتكش افدتنى بحاجه وكلها وعود اللى الناس شبعت منها حتى لو انت صادق فمن حقى اعترض واشك وبدوافع منطقيه ليست كما تصور انها لهدم البلاد وانها مؤامرات
واخيرا انا عايز اقول ان كل اللى انا قولته-واسف طولت عليكم - دى وجهه نظرى وقولتها بس لما لقيت الموضوع بيناقش باسلوب كويس خصوصا من المؤيدين زى ا/ tutankhamoun واتمنى نستمر بالاسلوب ده