الموضوع: ثرموستات الكوعة... المفترى عليه

المشاركة الأصلية كتبت بواسطة ahmed a.maksoud

تسلم أيدك يا باشا على الموضوع الرائع.

كنا لسه بنتكلم من يومين فى موضوع فى دايو على الثرموستات و أهميته.......و للأسف كتير من الإعضاء مش مقتنعين بأهميته.

ليا إستفسار بعد إذنك............إزاي عدم وجود الثرموستات يوصل الموتور أنه يحتاج عمرة ؟

أنا اللى أعرفه أن فى الحالة دي هتكون العربية مش بتوصل لدرجة حرارة التشغيل الطبيعية و بالتالي الحرق مش هيكون مظبوط و استهلاك البنزين أعلى و العربية مش هتدي أفضل أداء ليها بس مش أكتر من كده.

مكنتش أعرف أنه ممكن يوصل الموتور أنه يحتاج عمرة.

درجة حرارة التشغيل في الموتور مهمة لعدة أسباب:

1- عشان الحرق يكون مضبوط وناخد أعلى كفاءة في استهلاك البنزين

2- عشان ناخد أعلى أداء من العربية

3- عشان الزيت يوصل لدرجة حرارة التشغيل اللي هو متصمم عليها، فيديك فاعلية تزييت أعلى، وبالتالي عمر أطول للأجزاء المتحركة داخل الموتور

4- عشان الخلوصات داخل الموتور محسوبة على أساس درجة حرارة التشغيل... خلي بالك إن معظم أجزاء الموتور معمولة من معادن بتتمدد وتنكمش مع تغير درجة الحرارة

النقطة الرابعة دي هي اللي ممكن تخليك تعمل عمرة للموتور قبل العمر الافتراضي بتاعه

مثلا... الخلوص ما بين شنابر البستم والشميز... أكيد والموتور بارد مش زي ما تكون والموتور سخن، وكذلك السبايك على عمود الكرنك

الخلوص الديق بيعمل تآكل أعلى من المعتاد.... والخلوص الواسع ممكن يسبب نقر وتشوهات بسبب الخبط

المشكلة إن الناس مش بتاخد بالها من الموضوع ده، وبتعتبر إن أعمار المواتير المفروض بتبقى في حدود الـ100 ألف أو 200 ألف كيلو، مع إن أنا شايف إن الموتور لو متحافظ عليه كويس المفروض ما يعملش عمرة إلا بعد 300 أو 400 ألف كيلو، وساعات بنسمع على عربيات ما عملتش عمرة مع إنها وصلت 500 ألف ومليون كيلو

يارب أكون قدرت أوضح الصورة



...