الموضوع: عايز حل معايا قشقاي و فيها مشاكل كتيرة

بصراحه لفت نظرى جدا عداد الكيلومتر اللى حضرتك كاتبه : ٢٣ الف كيلو و شويه فى ٦ شهور يعنى زياده عن ٣.٥ آلاف كيلو فى الشهر ولو أضفنا عليه استهلاك الفرامل يبقى حضرتك عملت معظم الكيلومترات دى داخل البلد مش على طرق سفر . هو بس فى ملاحظه لو حضرتك كنت بتغير تيل فقط كنا قلنا فى مشكله فى الطنابير لكن حضرتك بتقول انك مغيرهم هما كمان. لو مفيش حد بيسوق العربيه غير حضرتك يبقى لازم تراجع اسلوب قيادتك لان لو رجلك تقيله على الفرامل مع الاستهلاك العالى ده للسياره فى وقت قصير ده ممكن يتسبب فى تلف الطنابير و التيل لان ممكن واحد تبقى رجله تقيله لكن استهلاكه للعربيه قليل فالموضوع ياخد معاه وقت لحد ما تحصل المشكله. حضرتك انتظر سماع باقى الآراء لكن انا شخصيا شايف انه الافضل ان حضرتك تحاول تعدل شويه من طريقه قيادتك و كمان موضوع شداد الفتيس ده لو انا متخيل الوضع صح ده ممكن يبقى نتيجه انك بتجرى جامد و خدت مطب او نقره جامده او هبده محترمه او بتمشى بسرعه فى طرق غير ممهده هى اللى عملت كده فالموضوع. يتلخص فى السرعه الزائده اللى هى اسلوب قياده يجب ان حضرتك تحاول تعدله علشان الامان و فى نفس الوقت توفر فلوسك و تحافظ على العربيه بحاله جيده لاطول فتره ممكنه

ممكن تكون بتدوس فرامل عالاخر في الزحمه في وسط البلد وده غلط لان الطنابير بتكون سخنه وانتا بتدوس جامد

المشاركة الأصلية كتبت بواسطة darkmagician

انا فاهم كلامك يا فندم وحبيت ارد على كل النقاط
وعشان كده سالت هل شداد الفتيس ليه علاقة بالفرامل لان في نوع من الشك فيه
وخد بالك لو سواقتك عنيفة يعني بتجري وتدوس فرامل جامد ممكن التيل يتاكل منك في اقل من 10000
عندي صديقي معاه بيجو 307 وهو سواقتو ماشاء الله بعد 20 الف كيلو التيل على الصاجة ومن ال 15 الف والتوكيل بينبهو ان التيل على الاخر
وجرب حضرتك لو مستغني عن تيل
وبالتالي فلو سواقتك عنيفة ممكن التيل يحصل فيه ما يسمى يقزز يعني يبقى حجر ويبدا ياكل في الطنابير لان الحرارة العالية تسببت في حرق الكاوتش وتحوله لمادة صلبة
فبدل ما يكون التااكل في التيل يبقى التااكل في الطنبورة ودي روح لاي ميكانيكي وقولو يعني ايه التيل يقزز حيقولك تقريبا نفس كلامي
وكلامي ده ما هو الا تنبيه للاخ عشان ميروحش يعمل شكوى وفي الاخر يطلع المشكلة من عندو

فلازم نفكر معاه ايه ممكن يكون هو بيعملو غلط مكانش يبقى في مشكلة عندو ويتوكل على الله في التصعيد

وسعيد جدا بمشاركتك :)

ربنا يخليك و معلش استحملنى

شداد الفتيس ده مفتكرش انه له دعوه بالفرامل ممكن يكون زى شداد الماتور بس فى الفتيس مفتيش فيها دى بس مفتكرش انه له دعوه بالفرامل

و فى الوقت الحالى انا سواقتى معظم الوقت عنيفة بجرى و بدوس فرامل جامد و على تيل مش اصلى و بقاله حاليا 15 الف فمش طبيعى ان التيل يتغير بالسرعه دى و بافتراض انه مغير التيل و الطنابير عشان السواقه غلط و التيل بوظ الطنابير
فالمره التانية الى غير فيها الطنبوره قالوله التيل كويس مش محتاج يتغير هنا بقى الطنابير باظت تانى ليه مهو لو التيل باظ كان اتغير و لو هو السبب كان اتغير برضه

شداد الفتيس بقى ده الى مش طبيعى انه يبوظ فى المده القليلة دى
لان الكاوتش ده بيبوظ مع الاستعمال الكتير و مع الوقت و الحرارة

اعتقد ان العربية دى بتسافر كتير - مفيش حد هيمشى فى البلد 150 كيلو كل يوم تقريبا

و ياريت صاحب العربية يوضحلنا طريقة سواقته و الطرق الى بيمشى فيها

السلام عليكم
انا شغال مصمم دعاية و اعلان بيتي في الشيخ زايد و شغلي في عباس العقاد مدينة نصر
انا عندي ٣٥ سنة بدئت سواقة من سن ١٦ عديت عليا عربيات من اول ما اتعلمت سواقة انا علشان اروح شغلي بعد ساعتين في الزحمة رايح و ساعتين راجع من الشيخ زايد علي المحور ثم كوبري اكتوبر ثم عباس العقاد ( مسافة من البيت الي الشغل ٧٠ كيلو رايح جاي) طبعا لو هاخد الدائري المسافة بقت ١٤٠ كيلو ف علشان البنزين و الوقت فضلت أخد الطريق الاول
انا بجري بس مش جري عرز و شغل أطفال و شد مع ده و ده بكل بساطة الطريق فاضي اجري مش فاضي اديني اهو ماشي مش فرقة و اكبر سرعة جبتها في البلد لا تتعدي ١٥٠ كيلو و كمان فكرت و كنت بدئت اصدق ان رجلي تقيلة و سواقتي عنيفة غيرتها تماماً لدرجة ان المشوار الي في ساعتين بقي ساعتين و نصف حسب تسهيل الطريق و أنتو عارفين الطريق عامل ازاي نرجع لموضوعنا انا غيرت طريقة سواقتي و المشكلة ظهرت تاني عند ال٢٠٠٠٠ و دلوقتي ظهرت رعشة عند الفرملة
و كمان هوا الواحد يدفع ١٧٥٠٠٠ في عربية ياباني و مبيجريش بيها مكنت دفعت نص الفلوس في اي عربية صيني و خلاص
انا تحليلي الشخصي ان السبب في التيل علشان انا لو رجلي تقيلة كان يخلص بسرعة او كنت لقيت الطنابير و التيل يخلصو عند ال ٢٠٠٠٠ مثلا مش الطنابير تخلص و التيل متاكل منو ٥ مل تقريبا انا حاسيس انو هوا المشكلة او في حاجة بتخلي نظام الفرامل شديد علي الطنابير يا الطنابير نوعيتها لا تستحمل التيل بكل الاحوال دي غلطة مواصفات و جوده كمان انا ملقتش تحذير واحد او اي جملة بتقول ان النيسان قشقاي ليها مواصفات معينة لقيادتها ولا تصلح إلا لفئة معينة من الناس انا لو لقيت الجملة دي ماكنتش اشترتها
علي العموم انا قدمت شكوي من كام يوم و لسا خدمة العملاء مكلماني و بيقولو حد من المصنع هاي كلمني و انا بانتظاره
و يا جماعة صدقوني انا فرحت بكل واحد قراء الموضوع و رد و ده الي مشجعني اني أتابع معاكو المشكلة اول باول

ان شاء الله خير و الدنيا تتحل
شوف البوست ده عن مشكله حصلت و اتحلت الحمد لله
http://www.nilemotors.net/Nile/3874470271-post39.html

ان شاء الله خير و الدنيا تتحل
شوف البوست ده عن مشكله حصلت و اتحلت الحمد لله
http://www.nilemotors.net/Nile/3874470271-post39.html