الموضوع: مشكلة في اوكتافيا a4 وعايزين نفكر في الحل مع بعض

المشاركة الأصلية كتبت بواسطة mahmoudysf

طيب شوفو الحل ده يا جماعة
وانا بعرض المشكلة على احد المراكز المشهورة في الاسكودا
صاحب المركز قالي خلاص يعوض عليك ربنا وهات موتور استيراد
المهم الميكانيكي اللي عندو حسيت انو عايز يقولي حاجة بعيد عن صاحب المركز وده راجل معروف هنا في المنتدى
اديتو الامان وطلبت رايه بعيد عن اخونا صاحب المركز اللي اسهل حاجة عندهم غير وخلاص
قالي انا عندي حل ومجرب وكانت نفس المشكلة
قالي هنحل وش السلندر ونشوف البساتم عالية اد ايه على الطبيعة
وانو هيشيل الزيادة من كل بستم وهو راكب والموضوع ده هياخد حوالي 4 ساعات وقالي مش عارف بيستخدم ايه في قشط الزيادة
طبعا هو طلب الامان قبل ما يقولي الكلام ده وطلب ان صاحب المركز ما يعرفش لان على كلامو حرام اغير الموتور عشان حاجة زي كدة
وعرض اني اوفرو مكان وييجي يعملي الحكاية دي وعلى ضمانتو وانو عملها لواحد في باسات قبل كدة ده حتى طلب انو يروح ورشة الراجل اللي عمل العمرة ويعمل الكلام ده عنده عشان العدة يعني معنى كدة واثق هو بيعمل اية
ايه رايكو في الكلام ده

أنا شايف إنك تاخد نمرته وتحتفظ بيها معاك عشان لو احتاجتها

لكن الحل اللى المفروض إنك تعمله هو تركيب جوانين كمان على الأصلي لتعويض النقص في جحم حجرة الحريق

لعدة أسباب

1- إن مهما حاولت أو الصنايعي مهما كان شاطر وحاول إنه بضبط الزيادة اللى هاياخدها من البساتم عمرها ما هاتطلع زي الزيادة اللى اتاخدت من البلوك وفي جميع الأحوال هايكون فيه فرق سواء بالنقصان أو الزيادة .... والفرق بالمللي بيفرق في المواتير دي

2- بعد ما تاخد الزيادة من البساتم هي نفسها هاتكون ضعيفة وهاتبدي تدخل في دائرة مغلقة مع الزمن بإن كل فترة هاتحتاج تعملها حاجة شكل في الخراطة وزيها بالضبظ زي ماتكون كل فترة هاتركب جوان ... مع مراعاة إن تركيب الجوان أسهل الحلول المطروحة ولو باظ هاتركب غيره جديد بدون أي مشاكل بالعكس من خراطة البستم اللى لو مش مضبوطة هاتبتدي تتكلم كل شوية في خراطة جزء تاني من أجزاء الموتور الله أعلم هايكون إيه عشان تضبط الفرق مع البساتم وطبعا الخراطة كل شوية شيء مش سهل وهايوقف العربية تماما غير تكلفته المادية

بعد تركيب الجوانات بإذن الله هايكون نفس تأثير مسح الزيادة من على البساتم مع الفارق إنك حافظت على البساتم وكفاية كدة شغل في الموتور نفسه .... وتعمل حسابك إن بإذن الله في المستقبل القريب تشوف موتور استيراد براحتك تماما وانت مش مستعجل ولما يجيلك فلوس ... وربنا هايرزقك بإذن الله

ولو في خلال مانت بدور على الموتور الاستيراد حسيت إن حوار الجوانات ده مش نافع خالص لأي سبب من الأساباب غير المتوقعة ... يبقى معاك نمرة الراجل وتخليه يعمل اللى بيقول عليه ويمسح الزيادة من البساتم وهي راكبة زي ما بيقول بس تكون واقف على إيده وتشوفه بيعمل إيه

بس ابتدي بحل الجوانات الأول لأنه أسهل وأوفر .. وأقرب .. الحلول إلى الصواب كمان

والقرار لك في النهاية طبعا