الموضوع: مشكلة في اوكتافيا a4 وعايزين نفكر في الحل مع بعض

المشاركة الأصلية كتبت بواسطة mahmoudysf

السلام عليكم

اولا انا عملت الموضوع هنا عشان يشوفة اكبر عدد ممكن
وهعمل نفس الموضوع في في قسم الاسكودا
نبدا بقى بسم الله
العربية اوكتافيا a4 مودييل 2002 sr اخر موتور في موديل a4 بوابة كهربة
العربية بتاعت اختي استيراد معوقين في شهر 5 اللي فات
العربية لما اشترناها كانت عاملة 55 الف كيلو والعربية شكلا وحالة بتقول ان ده عدادها الحقيقي لاكن ما علينا
شايف ناس بتقول لخص فين المشكلة ههههههههه
ماشي نبدا بقى في المشكلة
من ساعة ما خدنا العربية وهي فيها برجلة وبتلت والسحب وحش وفيه دخان من الشكمان
لفيت على اكتر من ميكانيكي من المعروفين هنا في المنتدى وغيرهم معظمهم اجمع ان ده طقم شنبر لان البوجيهات كانت بتطلع معرقة زيت او بالادق بوجيهة واحد هو اللي كان بيطلع كل مرة غرقان زيت وده كان بيخلي العربية تتلت والكل اجمع مش شكل وحالة العربية والموتور ان فعلا العربية عاملة 55 الف لاكن ده حصل من ركنة العربية برا فترة طويلة وعدم تغغير الزيت
المهم فيه منهم قالي نغير موتور وده معظمهم وفي واحد قالي نغير طقم الشنبر لان الموتور ده سليم وخسارة وكدة والموتور الاستيراد مش مضمون وهيبقى مركون برضة وممكن بعد فترة يعمل زي ده
واحنا نعمل لده شنبر وشمايز وهيبقى زي الفل
توكلت على وقولتلو ماشي خصوصا اني شفت عنده اوكتافيا وباسات وجولف واودي وشغال تمام قولت اكيد ده برنس وفاهم تمام
كام يعم التكلفة قالي انا اللي هجيب كل حاجة وهودي للخراط وهجيب طقم السرفيس من سيور وكاتينة وزيت والموضوع هيتكلف 4500 جنية قولتلو ماشي
وبدات رحلة العذاب معاه او عذاب كان المواعيد سيبتلة العربية وكنت بروحلة كل يومين تلاتة وفعلا فك الموتور ووراني البستم وهو بيلق في الشميز بسبب تاكل الشنابر
وفك كل الموتور طبعا وقاللي الموتور زي الالماظ السبيكة تمام والبساتم تمام احنا هنجيب شنبر وهنعمل شمايز ونمسح الوش نضافة وطبعا خدنا في الموضوع ده ييجي شهر رايح جاي ويقولي اصل الخراط ده عالمي والحاجة عندة بالحجز وكدة
بعد حوالي شهر ونصف رحت لقيت فعلا جاب الحاجة من عند الخراط ومستني يوريني الشغل قبل التقفيل
والشغل كالاتي تركيب طقم شنبر وعمل شمايز ودي مش عارف هو غير الشمايز ولا خرط الموجودة ومسح الكرنك مسحة نضافة وخرط الوش نضافة
وقشط وش نضافة من البلوك زي ما قالي وهو ده سبب المصايب والمشكلة كلها زي ما هتعرفو
المهم رحت بعد كدة لقيت العربية دايرة والموتور ثابت والصوت ناعم والعربية زي الفل قولت الحمد لله ده فهلا راجل فاهم بيعمل ايه ودوره ساعتين عندة وقالي سيبهالي يومين لغاية ما اخرج اجربها واسلمهالك وانا مطمن قولت امين
ورحت استلمتها منه وقالي امشي عادي بالعربية بس متعديش 80 ومتقرص عليها
اول يوم خدتها منه بسم الله ما شاء الله الهربية سحبتها تخض والصوت ناعم لاكن فيه مشكلة
العربية بتسقف وتسك في الطلعة من الثبات بس واللمبة كانت منورة رجتعله وقولتلة العربية تمام بس نفس السكة والتسقيف في الطلعة زي قبل العمرة قالي سيبهالي طيب انا عارف فيها ايه
وطبعا كالعادة بيقعد العربية وكل ما راوحلو يقولي لسة لغاية بعد كام يوم قالي كلو تمام
خدت العربية وبجرب وماشي على الدائري ونزلت طريق السويس ورحت لغاية الشروق وراجع سمعت صوت تكتكة وبدا يزيد ركنت ونزلت ابص سمعت الصوت من ناحية وش السلندر الصوت كان بيروح وبييجي المهم لما رحتلة في نفس الوقت كان الصوت راح قالي طيب روح ولما تسمعة ابقى تعالى
وتاني يوم الصوت زاد جدا وكان ملفت للنظر تكتكة جامدة طالعة من الموتور روحتلة والصوت شغال قالي طيب سيب العربية هشوف فيها ايه
روحتلة قالي هنغير الوش وطبعا خدله فيها كام يوم
لغاية ما روحتلة قالي تمام الوش اتغير وفعلا صوت العربية كان هادي جدا لاكن سحب العربية مش تمام ولسة فيه سك وتسقيف في الطلعة المهم قولت ما بدهاش اروح لحد تاني يقولي ايه الحكاية
عشان لما ارجعلة ابقى عارف اكلمة
المهم رحت للمهندس خالد في مدينة نصر
وقولتلة العربية دي معمولها عمرها والعربية تمام ما عدا تسقيف وسحب ضعيف واللمبة منورة
في الاول قالي ازاي تعمل عمرة انت غلطان كنت هات موتور استيراد
قولتلة دلوقتي العمرة اتعملت ومفيش مشكلة من الحاجة اللي اتعملت انا عايز اعرف التسقيف منين والسحب ضعيف ليه واعرفلي اللمبة منورة ليه
وصل العربية باللاب وقالي د الكاتينة خالفه بهبل وقالي كلمة على الميكانيكي ما ينفعش ااقولها على المنتدى ما علينا
وبالنسب للمبه قالي عايزة حساس كامة قولتلة يعني التسقيف هيروح لما نظبط التقسيمة ونغير حساس الكامة قالي انا معرفش احنا هنظبط المشاكل اللي قدامي ولو فضلت التسقيفة يبقى من العمرة(مش فاهم انا ايه العلاقة بين تغيير طقم الشنبر والتسقيف اظاهر اني غلطت اني قولتلة انا عامل عمرة انا كنت ااقولة على المشكلة وهو يتصرف ما علينا)
المهم قال للصنايعي عندة ظبط التقسيمة والصنايعي بدا يشتغل وظبط الكاتينة على الزنب وجه يدور العربية ما بتدورش يحاول ما بتدورش قالي كدة ممكن يكون مركب طنبورة الكرنك غلط وما تظبتش فوق مع تحت وقال للصنايعي حاول تظبطها بلدي وفعلا حل بوجيه وفضل يضبط وييجي يدور ما تدورش قولتله كدة ممكن الوش يطير او العربية تجيب طقم صباب بسبب التجريب ده حاول ترجعها زي ما كانت على الظبطة الاولانية المهم الصنايعي قالي خلاص كدة ظبطلك الكاتينة تمام العربية سحبها اتعدل واحنا بنجرب لاكن لسة بتسقف في الطلعة قالي ابقى هات حساس كامة وتعالى نغيرة ونشوف النتيجة
وانا رايحلة عشان نجيب حساس الكامة سمعت صوت تكتكة نفس الصوت الاول لغاية شارع رمسيس والعربية بطلت وحلفت ما هي دايرة وكان الصوت وانا بدور زي ما يكون صباب بيخبط في البستم
المهم اتصلت بالميكاني اللي عمل العمرة وقولتلة على اللي حصل بعتلي ميكاني وسحبنا العربية عندة وسيبتها ومشيت ورحتلة قالي هنغير الوش
ورحت بعد ما اغير الوش
وخدتها ومشيت وفيها نفس التسقيفة في الطلعة
واتعايشت مع التسقيفة دي غير كدة العربية سحبها مفيش بعد كدة ولا الزيرو لاكن بعد 150 سحبها بيموت وده عرفت انو بسبب حساس الكامة اللي لسة ما اتغيرش
من كام يوم روحت لمركز هاني في جسر السويس قولتلو العربية بتسقف في الطلعة ولازم تكبسلها في الطلعة عشان ما تبطلش ده في الطلعة بس فك الكاتينة لاقاها خالفة 7 سنات وقالي حساس الكامة هو اللي منور اللمبة ودي عارفها طبعا
وخلى الصنايعي يظبط الكاتينة الصنايعي ظبط العربية مش عايزة تدور راح نده لهاني وقالو ظبطها على الزنب مش عايزة تدور راح سالني انت عامل عمرة قولتلة اه قالي خرط البلك قلتلة اه
قالي كدة مساحة الغرفة قلت والمفروض كان يضظط البستم يعني يشيل منه نفس القيمة اللي شالها من البلوك لان الكاتينة لما بتتظبط صح البستم بيخبط في الصباب فهو ماخر التقسيمة عشان يتفادى العيب دة
طيب ايه الحل قالي نغير موتور وطبعا مغيرتش حساس الكامة لانو قالي طالما الكاتينة خالفة ممكن تنور اللمبة ويدي عطل حساس الكامة
يا ترى ايه الحل في المشكلة دي

وعذرا للاطالة لاكن عشان اللي يقول راية يبقى عندة كل الخلفيات

طبعا اللي فوق ده لازم تقروه عشان تفهم القصة من الاول
والمعاناه اللي شوفتها والخبرات اللي موجودة فيه وتبقى مرجع لكل واحد هيمر بالمشكلة دي
قبل ما اتكلم عن الحل هديكو ملخص بسيط...
1- المشكلة كانت برجلة جامدة ودخان والعربية متلتة وبتاكل زيت.
2-عرضت المشكلة هنا وروحت لمعظم ميكانيكية مصر بتوع الاسكودا والغالبية اجمعت ان الموتور مفوت وعايزة متور افضل من الشنبر.
3- نصيبي وداني عند واحد ميكانيكي اسمة سيد (سبب معاناتي بسبب قلة ضميرة لانة لففني شهور عشان احل المشكلة بسبب شلن ملح)عنوانة المهندسين شارع المشروع متفرع من شارع السودان او بيسمو الشارع محمود عزمي هو متفرع من ش المشروع ده اللي فيه مستشفى سوزان مبارك انا كتبت العنوان بالتفصيل عشان تاخدو بالكو منه.
4- المهم رحت لسيد ده عند ورشة كبير جراج عمارة وعامل لنفسة مكتب وتكييف وشغلانة وعنده عربيات باسات وجولف واودي واسكودا قلت بس هو ده اللي فاهم وهيحل المشكلة وهو الوحيد اللي قالي نعمل شمبر احسن لان ماتورك كويس ومفيش فية ترزيع او اي مشكلة غير الشنبر والاستيراد منعرفش فيه ايه وهاخد 4.5 الاف اجرة وخامات وخراط وطقم كاتينة ومية وزيت وفلاتر وكلة قولتلة امين.
5-بدأ شغل والقصة موجودة في الاقتباس فوق واستلمت العربية بعد معاناه ونفس المشكلة موجودة تسقيف في الطلعة وسحب ضايع لاكن مفيش دخان ولا بتاكل زيت
6- رحت لخالد اسماعيل ورحت لهاني في جسر سويس وعرفوني ان ترس الكامة خالف 7 سنات وكل واحد منهم برأي ومعجبنيش كلامهم لان محدش عايز يتعب ويعرف العيب فين كله يقولك غير ماتور العمر فاشلة واكيد خد من البلوك كتير سبتهم وقعدت فترة ماشي بالعربية كدة تسقيف رهيب في الطلعة وسحب مش تمام.
7- لغاية ما روحت لمحمد فضالي صاحب مركز توب جيرو وحكيتلة على كل التجارب اللي مريت بيها فاتفقنا نحل الوش ونزود جوانات وش عشان نعوض الفارق اللي اتقشط من البلوك(على اساس ان اللي عمل العمرة قشط من البلوك)
8-ولاكن بعد ما حل لقينا البلوك فابريقة ومش متاخد منه حاجة وحتى هو قالي شكل القشط ده بتاع المصنه ومفيش خراط هنا بيخرط بالمظر ده وكمان سأل صديق ليه كان موجود وشغال في توكيل بي ام قال البلوك سليم ونضيف والبساتم مكحمة كويس امممممممممم قعدنا نفكر طيب فين المشكلة وايه مخلي الكاتينة عشان تتظبط الترس لازم يخلف 7 سنات اه وكمان حساس الكامة كان منور لمبة الاعطال على طول لدرجة ان محمد فضالي قالي اكيد الراجل ده معملش حاجة غير انو غير شنبر بس قولتلة يا ريت على الاقل ميكونش لعب في حاجة وتبقى خسارة الماتور والفلوس
بالمناسبة لما فكيت عند اول ميكانيكي كانت السبايك ممتازة هي والكرنك تقريبا زيرو والبساتم كانت نضيفة.
9- نرجع للمشكلة طيب فين المشكلة محمد قال انا شاكك ان ترس الكامة مش بتاع العربية واكيد اتغير عند اللي عملك العمره لكن ان كنت مصر ان الترس هو بتاع العربية لان شوفت كذا ترس زي بتاعي بالظبط وهو هو نفس الترس فهو قالي يبقى الترس مش بتاعها او عمود الكامات مش بتاعها المهم بعد مداولة واخذ وعطا اتفقنا اني اروح اشتري وش من الحرفيين رحت الحرفيين ومحدش عايز يفك وش من مكنة وكمان المفكوك جاهز حالتة تعبانة وتمنة 2500 جنية رجعت من الحرفيين زهقان وقلتلة قفل على كدة.لغاية ما اتفقت معاه ييجي معايا الحرفيين ويشوف الوش بنفسة.
10- رحنا الحرفيين وخدنا الكامة وترس الكامة معانا وعايرناهم هناك مع ترس وكامة بتوع العربية وكانت الفجأة ان الكامة مش هي هي فيه اختلاف في زوايا الكامة ومحمد قالي انا صح هههههههههه.
11- اشترينا عمود الكامة وطبعا انا كنت شاري الجوانا والزيت والسيور واللزي منه وقفلنا وظبطنا الكامة والترس اتظبط على الذنب تمام ولمبة الاعطال طفت بعد كانت منورة بسبب الكامة كانت بتدي قراية غلط لحساس الكامة لحد كده تمام وكنت مبصوط وقفلنا ودورنا والدنيا تمام لكن ظهرت مشكلة كانت مش موجودة وهي ارتفاع درجة الحرارة بتوصل ل 110 على الجهاز وهو قعد يحاول شمال يمين كل حاجة تمام مفيش فايدة الحرارة عالية فهو قالي هي حرارتها كدة عادي في الكاتلوج لكن وانا مروح المؤشر كان بيقرب من الشرطة الحمرا خصوصا مع الجري رجعت لمحمد تاني يوم وقلتلة وموصلناش لنتيجة.
12- فضلت كدة فترة لغاية ما روحت لواحد شغال في توكيل باسات حكيتلة كل حاجة لغاية موضوع الكامة وقولتلة دلوقتي عايز مشكلة الحرارة اللي مكنتش موجودة قبل ما اعمل شغل الكامة وبالمناسبة انا كنت شاري شجرة مياة جديدة اصلي بالثرموثتات وحساس الحرارة من ابو الحسن فضل يغير في حساس الحرارة شمال يمين والعربية برضة بتسخن شال الثرموثتات وركب واحد مفيهاش ثرموثتات من عندة برضة بتسخن قالي اكيد شجرة المية فك بتاعتي وركب واحدة قديمة من عندة برضة بتسخن بعد ده كله خلصت معاه ومشيت بالمشكلة.
13- اخر حاجة رحت انا عند ابو الحسن واشتريت شجرة مياه جديدة وركبتها هناك عند واحد اسمه رمضان في بين السريات والحمد لله الحرارة بقت تمام ما بتعديش 90 ومفيش تسقيف والسحب تمام والعربية بتقفل 180 بسهولة ومحاولتش اجيب اكتر من كدة
ودي كانت تجربتي مع ماتور الاوكتافيا

المشاركة الأصلية كتبت بواسطة amrelsaqqa

ياااااااه ده انت لفيت لفة كبيرة اوى

معلش ، والحمد لله انها جت على كدة وان المشكلة اتحلت الحمد لله :) مبرووك :)

اه والله انا اتبهدلت كتير اوي انا خدت ايام وليالي مع العربية دي والمشكلة مش في العربية المشكلة يا اما واحد معندوش ضمير يا اما واحد بيفتي و معندوش فكرة وبسبب ده العربية اتكلفت اكتر من 8000 جنية وانا شقيت بزيهم والعربية اساسا بتاعة اختي وانا اللي اتوليت الموضوع من البداية وكان لازم اكمل فيه
واخيرا الحمد لله والله يبارك فيك

الف مبروك والحمد لله ان ربنا عوض تعبك والمشكلة اتحلت

المشاركة الأصلية كتبت بواسطة moratoz

ربنا يعوض عليك خير ف تعبك ومجهودك وفولوسك حاجه بشلن تعذب الواحد ويصرف الوفات
ربنا يخليك وهنعمل ايه في قلة الضمير والفهلوة ومحدش بيتعلم ببلاش
بس سؤال انتا من يوم جبت العربيه هي كده ولا عمود الكامه دا اتغير عند الميكانيكي الاولاني وليه
المفروض تروح للميكانيكي وتحاسبه علي الشغل ئل معملهوش والخرط ئل متعملش
لا العمود اتغير عند الميكانيكي الاولاني اللي عمل العمرة وهو اللي كان يقدر يحل المشكلة من الاول لو كان جاب عمود كامة بتاعها لانه الوحيد اللي كان عارف المشكلة فين.
جبت عمود الكامه بكام وفين مزز توب جير دا والراجل كام مصنعيه وهما متخصصين في نوع ايه من العربيات

جبتة من الحرفيين ب 200 جنية تقريبا والمصنعية 500 جنية وتوب جير في الاساس شغالين في الكوري والياباني لكن لما عرضت المشكلة على محمد فضالي رحب انو يشتغل في العربية
وهما عاملين موضوع اعلاني في المنتدى العام للسيارت